Gʼaˬkʼehˇ 12 - Yawshawr Yaerbof Dawqma Sarjax Yawshuif Jaceuq-eu Hawr-eu Dawqdaq

Yaqkov-anr Saef-euq

¹ Khoerngae yamq-anr, sanqpaq Heqlor, aqyawf-euq aqlaf nae Kalizaq armur-euq lafkhoer jawr-eu tiqpavnav deuq-anr yaeqbawq-aer janrnaeq-euq mae.

² Khoernar-aq, aqyawf, micaer nae Yorhaq-euq maernmr Yaqkov-anr saef-euq mae.

³ Khoerlof-aer saef-eu gar Yurdav tsawrhaq nuikhanrshir nga laer, aqyawf ya’mawr ngae, Beqtuvluv-anr khawf parnyaef-euq mae. Khoerngae yamq-aq, Daeqtseq maqdawv-euq kaqmur dzaq-eu yawbui-anr tsaq-eu mae.

⁴ Khoermirnae, Heqlor, Beqtuvluv-anr nyaef-awr kuv-anr dawvtaq-euq mae. Aqyawf-anr guirzaq oeq ghaq tiq mur murtaq-euq, oeq mur nae bilof-euq mae. Baqsaqkaq yawbui dzeur-euq nar-aq, aqyawf-anr mirkhanqzaq-euq maeqshi yarkhaqdar ma laer noeqtaq-euq mae.

⁵ Khoermirnae, Beqtuvluv kuv-anr bi kaflanr taq-euq mae. Aerkhawf, Kalizaq armur-aq, maq naqlerni aqyawf-euq gharduq Miqyaer-anr guiqlanq shar-euq mae.

Beqtuvluv Kuv-anr Nae Dovle-euq

⁶ Heqlor, Beqtuvluv-anr yarkhaq dar-eu laer ghae-eu jeqhu ngae mir, Beqtuvluv-aq, shmrcav nyiq cav nae bi paftaq-awr, guirzaq nyiq ghaq-euq ghanrcae yufluf-eu mae. Lofluf-eu deuq khawf, kuv-euq larghov-euq lafnyir paw lofluf-eu mae.

⁷ Khoerngae, Sanqpaq Miqyaer-euq mqtav ghaqkhaer tiq ghaq Beqtuvluv-euq gardzer yawfle-awr, kuv-euq arlawv-euq lafkhoer yawshaef byalar-euq mae. Aqyawf, Beqtuvluv-euq byaghar-anr taevtaev-aer kurnoeq-eu, “Yawkawr-aer tur-awq.” Khoerngae, shmrcav deuq aqyawf-euq aqlaf-anr nae galaev jir-euq mae.

⁸ Khoernar-aq, mqtav ghaqkhaer, aqyawf-anr aernaeq-eu, “Jofpaf paf-awr saeqnawv arcav paf-awq.” Khoerngae, aqyawf khoerlof-aer janr-euq mae. Mqtav ghaqkhaer khoerghaq paraer-eu, “Nawq-euq paerkhanq paermanr gheudm-awr, ngaq-euq maeqnan cantae lef-awq.”

⁹ Khoernar-aq, Beqtuvluv, aqyawf-euq maeqnan cantaedov ghae-euq mae. Aerkhawf, mqtav ghaqkhaer khoerghaq mrluf-eu deuq aqdir aqmar nga laer Beqtuvluv maq siqnya-aer, mawrle-euq lafkhoer ya’mawr-euq tiqjeq nya laer taef-aer noeq-euq mae.

¹⁰ Aqyawfnyaf yawbae tsanr-anr lof-eu deuq-anr hawr-eu nyiq tsanr tiqtsanr-anr lof-eu deuq-anr irdzeur-awr, meuq-anr ur-ir-eu shmr larghov-anr irkeuv ngae, larghov khoer aqyawxyawf, aqyawf nyaf-anr pannaeq-awr, aqyawfnyaf dov-ir-euq mae. Aqyawfnyaf garma tiqkanr lawcaw-aer irluf ngae, mqtav ghaqkhaer khoerghaq tiqpov taef-aer aqyawf-anr nae ghawq-ir-euq mae.

¹¹ Khoerngae, Beqtuvluv noeqbeur lar-awr aer-eu, “Sanqpaq Miqyaer, aqyawf-euq mqtav ghaqkhaer bi’oe-awr, Heqlor-euq aqlaf hawr-eu Yurdav tsawrhaq nae noeqtmq taq-euq jeq dawqtawv luf-anr nae ngaq-anr bibuq-ir naeqlaf-euq nga laer, nymq-mr ngar aqdir siqduq-euq ma.”

¹² Aqyawf garkawv khoer-anr sharnoeq hawghaq dzeur-euq nar-aq, Maqkuv laer khawf kur-eu Yorhaq-euq aqma Maqliv-euq nymr-anr ir-euq mae. Khoergar, tsawrhaq ghawqmya’ni uiqler taq-awr guiqlanq sharluf-eu mae.

¹³ Beqtuvluv kmrcaer-euq larghov-anr khovluf ngae, Lordeq laer kur-eu aqbur tiq ghaq narhaq le-euq mae.

¹⁴ Aqyawf, Beqtuvluv-euq tersar-anr narhaqsiq ngae, laqkhaq caer-eu mirnae, larghov maq pannaeqni, Beqtuvluv larghov-euq maeqshi yawfluf nya laer irkanr-euq lafkhoer caevur lef-awr, aqyawf maf-anr tsafgaq ler-euq mae.

¹⁵ Khoerngae, aqyawfmaf, aqyawf-anr, “Nawr uq-ir-euq nya laq” laer aernaeq-euq khawf, aqyawf maqjuqni aerluf-eu mirnae, aqyawfmaf, “Beqtuvluv-euq mqtav ghaqkhaer nya” laer aer-eu mae.

¹⁶ Beqtuvluv maq naqlerni larghov-anr khovluf-eu mae. Aqyawfmaf larghov pan-ir ngae, Beqtuvluv-anr ya’mawr-awr, zanq duidui ler-euq mae.

¹⁷ Khoerngae, Beqtuvluv, aqyawf maf-anr ciqcurni jawr-awq laer lafdzawr dzawrnaeq-awr, Sanqpaq Miqyaer, aqyawf-anr kuv-anr nae aqjox-aer sheuqdov naeqlaf-euq garkawv, aqyawf maf-anr ja’naeq-awr aer-eu, “Ir-awr, garkawv heu Yaqkov hawr-eu aqyuif aqnyir deuq-anr dzawrnaeq-ir-awq.” Khoernar-aq, aqyawf dov-ir-awr, yawqgaryawq ir-euq mae.

¹⁸ Uqbya byalar-euq naeq-aer, Beqtuvluv aqgeugar ir-euq nga laer maq siqnya-eu mirnae, guirzaq khoerdeuq suqsaq duidui luf-eu mae.

¹⁹ Heqlor, aqyawf-anr pov ngae maq povmawr nya-euq mirnae, lofpir-eu deuq-anr yawmuiq-aer narhaq ghaq-euq nar-aq, aqyawf maf-anr saef-awq laer dawq bif-euq mae. Khoernar-aq, Heqlor, Yurdav mirkhanq-anr nae irka ghae-awr, Gaersaqlir-anr jawr-ir-euq mae.

Heqlor Shir-euq

²⁰ Heqlor-aq, Durlu hawr-eu Sirdoq-anr jawr-eu tsawrhaq deuq-anr nuima paer duidui-eu mae. Khoermirnae, aqyawfmaf nuima tiqgar gm-awr, aqyawf jawr-eu gar lar-euq mae. Sanqpaq-anr cawba-eu ghaq Baqlaqdur laer kur-eu ghaq-anr bawqdzaq tsaq-awr, tsaqler dzoerlerni sharler-euq mae. Aqjeq mirnae aernar-aq, aqyawf maf-euq dzaqdzaq dawrdawr Heqlor-euq mirkhanq-anr ghoeluf-eu mae.

²¹ Nanpax paxtaq-euq arnan keuvlar ngae, Heqlor-aq, sanqpaq-euq maeqtsoeq dm-awr, nuirmanq-anr nuir-awr nae aqyawf maf-anr dawqngaeq dawqtmr mrnaeq-euq mae.

²² Khoerngae, tsawrhaq khoerdeuq gur-eu, “Tersar teu-aq, tsawrhaqzaq-euq tersar maqngeur nya, miqyaer-euq tersar nya!”

²³ Khoerngae, Heqlor, Miqyaer-anr maq ciqhuiq maq ciqmanr-eu mirnae, Sanqpaq Miqyaer-euq mqtav ghaqkhaer japyuqni tanqghae lef-awr aqyawf-anr arboeq armawr deuq nae bidzaq-awr, aqyawf saf tsaev-euq mae.

²⁴ Aerkhawf, Miqyaer-euq dawq-aq, huiqlar manrlar luf-awr, khawq-ir byan-ir luf-eu mae.

²⁵ Baqnaqbar hawr-eu Sawrluv, aqyawf nyaf-euq guiqlanq-euq gar mrluiv ghaq-euq nar-aq, Yeqlursaqlaeq-anr nae Maqkuv laer khawf kur-eu Yorhaq-anr sheuq-awr ghof-ir-euq mae.