Gʼaˬkʼehˇ 11 - Yawshawr Yaerbof Dawqma Sarjax Yawshuif Jaceuq-eu Hawr-eu Dawqdaq

Beqtuvluv Garkawv Aershaw Naeq-euq

¹ Ghaqkhaer deuq hawr-eu Yurdav mirkhanq-anr jawr-eu aqyuif aqnyir deuq, aqcawq tsawrjeuq tsawrca khawf, Miqyaer-euq dawq hageuf-euq mae laer yagaq-euq mae.

² Khoermirnae, Beqtuvluv, Yeqlursaqlaeq-anr davlar ngae, aqcawq-anr bawkhov maeqdzaq bi yaeqmawf-eu tsawrhaq deuq, aqyawf-anr iqbax taq-eu lafkhoer,

³ aer-eu, “Nawr beu-euq, bawkhov maeqdzaq maqyaeq-euq tsawrhaq-euq nymr-anr urler-euq uqtaf, aqyawfmaf naeq-aer dzaqtaf dawrtaf-euq nga-eq!”

⁴ Khoerngae, Beqtuvluv ardanq bae-eu gar nae, tiqjeq sair tiqjeq aqyawf maf-anr aershaw naeq-euq mae. Aqyawf heulof-aer aer-eu mae,

⁵ “Ngar, Yurbeq meuq-anr jawr-awr guiqlanq sharluf ngae, ngar yufmav mavmawr-eu lof-aer mawrle-euq lafkhoer, lafcoer oeq coer baw-eu saqpar parma lof-aer ghae-eu tiq hmq, mq-anr nae, ngaq-euq maeqshi pyaeqka lef-euq gar, ngar ya’mawr-euq ma.

⁶ Khoer-euq lafkhoer ngar yawmuiq-aer hawduq ngae, mirtsaq-euq khoertav-euq oeq kuir tsof-eu jeqzaq deuq hawr-eu jeqzaq yawghae deuq, joejoe-aer can-eu jeqzaq hawr-eu mqtav zaw-eu arjir deuq ur-eu gar ngar ya’mawr-euq ma.

⁷ Khoerngae, ‘Beqtuvluv-or! Tur-awr, saef-awr dzaq-awq’ laer aer-eu tersar-anr ngar yagaq-euq ma.

⁸ Aerkhawf, ngar, ‘Sanqpaq-or! Maq geufnya-a. Maq dzaqkhmq-eu jeq hawr-eu maqshawr-eu jeq, ngaq-euq khaqmae-anr tiqpov-iq maq dawvluv haw-aq’ laer aernaeq-euq ma.

⁹ Khoerngae, mq-anr nae tersar nyiq pov tiqpov par aerkhof lef-eu, ‘Miqyaer nae shawr-euq jeq-anr maq dzaqkhmq-eu jeq laer nawr taqsawx.’

¹⁰ Khoerlof-aer smq pov keuvni pyeuflar ghaq-awr, khoerdeuq dawqtawvluf mq-anr par gheudav lef-euq mae.

¹¹ Khoerngae khavtseuvni, Gaersaqlir-anr nae ngar jawr-eu gar bi khaerghae lef-euq tsawrhaq smr ghaq, ngar jawr-eu nymr-euq ghovkhaeq-anr oekeuv taq-awr yawfluf-eu mae.

¹² Khoerngae, muiq-eu Saflar, ngaq-anr aernaeq laf-eu, nuima povpov lavlav-aer maqghaeni aqyawfmaf naeq-aer le-awq. Aqyuif aqnyir heu kof ghaq khawf ngaq naeq-aer le-awr, khoerghaq-euq nymr-anr urler-euq ma.

¹³ Mqtav ghaqkhaer tiq ghaq, aqyawf-euq irkanr yawfle-euq gar aqyawf aqjox-aer ya’mawr-euq garkawv, khoerghaq, nga’maf-anr dzawrnaeq laf-euq mae. Mqtav ghaqkhaer khoerghaq, aqyawf-anr heulof-aer aernaeq laf-euq mae laer aer-eu mae, ‘Yurbeq meuq-anr tsawrhaq khaerghae-awr, Beqtuvluv laer kur-eu Sirmoq-anr bi kurlaq-ir-awq.

¹⁴ Nawr hawr-eu nawq-euq miqsawrzaq yawqghaq navluf yabuq-ir ni, aqyawf, nawq-anr dawqja ja’maeq naeqlaf taef-a.’

¹⁵ “Ngar ngaeqdanq bae-euq naeq-aer, yawbae aqdui-euq khoertav Yawshawr Saflar zafka le-euq lof-aer, aqyawf maf-euq khoertav khawf zafka le-euq mae.

¹⁶ Khoerngae, ngar, Sanqpaq Yeqsur nae aernaeq laf-euq dawq heudawq-anr noeqdov lar-euq mir-a. Aqyawf aer-eu, ‘Yorhaq-aq, ircuf nae bartirsaq mrnaeq-euq mae. Aerkhawf, nawmaf-aq, Yawshawr Saflar-euq lafkhoer bartirsaq ya hageuf taef-a.’

¹⁷ Aqdui, Sanqpaq Yeqsur Kali-anr janlar ngae, Miqyaer, aqdui-anr lafsawq bifnaeq laf-euq lof-aer, aqyawf maf-anr khawf bifnaeq-euq ngeur nar-aq, Miqyaer-anr lavtsoeq nya’ni ngar, aqsur ghaq la?”

¹⁸ Aqyawfmaf garkawv khoer-anr yagaq ngae, ciqcur savni jawr-awr Miqyaer-anr ciqhuiq ciqmanr-eu, “Tox-aer mar-iq, aqcawq tsawrjeuq tsawrca-anr khawf daef-eu jeq bi za’ni Miqyaer, aqyawf maf-anr bi noeqpov bi noeqpar-euq ngar-a.”

Aqdirawq Kalizaq Armur

¹⁹ Saqteqpaq-anr khaeq-awr khav-euq mirnae, jawrbyav taq-euq tsawrhaq khoerdeuq, Pirnir mirkhanq, Gurbaqlur irjawlanr hawr-eu Aqdirawq-anr keuvni ir-awr, Yurdav tsawrhaq-anr taef-aer dawqmaeq maeqnaeq-euq mae.

²⁰ Aerkhawf, Gurbaqlur irjawlanr hawr-eu Kurleqniq mirkhanq-anr jawr-eu tiqpavnav deuq-aq, aqyawfmaf, Aqdirawq-anr larkeuv ngae, Heqlaqsar tsawrhaq-anr khawf ngaeqcawq-awr, Sanqpaq Yeqsur-euq garkawv dawqmaeq maeqnaeq-euq mae.

²¹ Sanqpaq Miqyaer-euq aqlaf, aqyawf maf-anr sheuqghae luf-eu mirnae, tsawrhaq ghawqmya’ni Sanqpaq Miqyaer-anr janlar-awr, aqyawf jawr-eu paw pyawrlar-euq mae.

²² Garkawv heudeuq, Yeqlursaqlaeq-anr jawr-eu Kali-anr jan-eu armur deuq-euq naqbawr-anr gaqkeuv ler-awr, aqyawfmaf, Baqnaqbar-anr khaer-awr, Aqdirawq meuq-anr bi’ir-euq mae.

²³ Aqyawf khoergar irkeuv-awr, Miqyaer-euq guiqlanq yawdzanr-anr ya’mawr-euq mirnae, laqkhaq caer-eu mae. Aqyawf, aqyawfmaf yawqghaq navluf-anr nuima zifdanni, Sanqpaq Miqyaer-euq dawqpae taeqni daef-awq laer ghaq bif-euq mae.

²⁴ Baqnaqbar-aq, tsawrmuiq tsawrjaq tiq ghaq pyeuf-awr Yawshawr Saflar hawr-eu jan-eu nuima tiqbyanni anr-eu mae. Khoerngae, tsawrhaq, baqmaf-aer Sanqpaq Miqyaer jawr-eu paw lanqlar-euq mae.

²⁵ Khoernar-aq, Baqnaqbar, Daqsuv-anr ir-awr, Sawrluv-anr pov-ir-euq mae.

²⁶ Aqyawf-anr povmawr ngae, Aqdirawq meuq-anr sheuqlaf-euq mae. Aqyawfnyaf tiq khof byanni khoergar jawr-awr, Kali-anr jan-eu armur naeq-aer uiqler uiqler-aer tsawrhaq ghawqmya ni-anr maeqnaeq tsovnaeq-euq mae. Zaqlanr deuq-anr Kalizaq laer kur-eu-aq, Aqdirawq meuq-anr nae kurbae bae-euq mae.

²⁷ Khoerngae yamq-anr, Miqyaer gharduq ngaeqdan-eu deuq Yeqlursaqlaeq-anr nae Aqdirawq meuq-anr oeka-euq mae.

²⁸ Aqyawf maf-euq lafkhoer, Aqgaqbar laer kur-eu tiq ghaq turlar-awr, muiq-eu Saflar sheuqghae-eu lafkhoer, mirtsaq doeni maefdui shuf duidui-eu jeq keuvle taef-a laer bimawr-euq mae. Maef-awr shuf-eu khoer-aq, sanqpaq Gaersaq Gaqlawrdir dzoeqdzaq mrluf ngae keuvle-euq mae.

²⁹ Khoerngae, zaqlanr deuq yawqha khar ghaenya-eu lof-aer, Yurdav mirkhanq-anr jawr-eu aqyuif aqnyir deuq-anr cawba-eu pyur shaghae ma laer noeqtsaev taq-euq mae.

³⁰ Aqyawfmaf nae noeqtsaev taq-euq lof-aer mr-awr, Baqnaqbar hawr-eu Sawrluv-euq aqlaf-anr ghoe-awr nae Kalizaq armur-euq aqyuif aqtsu deuq jawr-eu gar bi shaha ler-euq mae.