Gʼaˬkʼehˇ 10 - Yawshawr Yaerbof Dawqma Sarjax Yawshuif Jaceuq-eu Hawr-eu Dawqdaq

Beqtuvluv Hawr-eu Gorneqlir

¹ Gaersaqlir-anr Gorneqlir laer kur-eu tiq ghaq jawr-eu mae. Aqyawf-aq, Irdaqliq Guirmaf laer kur-eu guirmaf tiq mur-euq yardzoeq guirhuq tiq ghaq mae.

² Aqyawf hawr-eu aqyawf-euq miqsawrzaq yawqghaq navluf Miqyaer-anr guv-awr uqduq tanq-eu tsawrhaq pyeuf-eu mae. Yawqjawr navluf mirkhanqzaq-anr gamfnaeq-awr, aqmyanluf Miqyaer-anr guiqlanq sharluf-eu mae.

³ Tiqnan, uqciftaw paw naqliq smr laf byanlar ngae, mawrle-eu lafkhoer byacaevni ya’mawr-euq Miqyaer-euq mqtav ghaqkhaer tiq ghaq, aqyawf jawr-eu gar urlar-awr aqyawf-anr aernaeq-eu, “Gorneqlir-or!”

⁴ Khoerngae, Gorneqlir, aqyawf-anr hawtsov taq-awr guv duidui-eu lafkhoer aer-eu, “Sanqpaq-or! Aqjeq aer-eu le?” Khoerngae, mqtav ghaqkhaer khoerghaq, aqyawf-anr heulof-aer aernaeq-euq mae: “Nawq-euq guiqlanq shardawq hawr-eu nawq nae gamfnaeq-euq jeq Miqyaer-euq maeqshi larkeuv-awr, aqyawf noeqmawr luf-eu mae.

⁵ Nymq-mr nawr, tsawrhaq khaerghae-awr, Yurbeq meuq-anr jawr-eu Beqtuvluv laer kur-eu Sirmoq-anr bi kurlaq-ir-awq.

⁶ Aqyawf-aq, iqmalavshav-euq lawrdzer-anr jav-eu bawkhov janranq-eu Sirmoq-euq nymr-anr jawrluf mae. Nawr aqjeq yajanr-a laer aqyawf, nawq-anr aernaeqlaf taef-a.”

⁷ Aqyawf-anr ngaeqcawq le-euq mqtav ghaqkhaer khoerghaq ghofdov-ir dzeur ngae, Gorneqlir, aqyawf-euq nymrkhanq-euq kuirlaf zaqkhav nyiq ghaq hawr-eu, aqmyanluf aqyawf-euq myawqkhaer ghov-eu laer lofluf-eu tsawrhaq deuq-euq lafkhoer nae, Miqyaer-anr guv-eu guirzaq tiq ghaq-anr kurlaf-euq mae.

⁸ Khoernar-aq, khoerdeuq dawqtawvluf, aqyawf, aqyawf maf-anr jashawnaeq ghaq ngae, Yurbeq meuq-anr khaerghae-euq mae.

Beqtuvluv-anr Mawrle-euq

⁹ Nishawq ngae nan, aqyawfmaf garma dov-ir-awr, meuq-euq dawqpae irkeuv-awr, nanlov caelarmawf ngae, Beqtuvluv guiqlanq shar-eu laer nymrmq-anr davler-euq mae.

¹⁰ Khoerngae, aqyawf hawq yawkhav-aer maeflar-awr, hawq dzaqmawf-eu mae. Aerkhawf, aqcawq laeqhmqluf ngae, Beqtuvluv-anr mawrle-eu lafkhoer heulof-aer ya’mawr-euq mae.

¹¹ Mq panlar-awr, saqpar parma lof-aer ghae-eu tiq hmq, lafcoer oeq coer-anr paftawf taq-awr, aqyawf jawr-eu paw mirtsaq-anr pyaeqka lef-eu gar, aqyawf ya’mawr-euq mae.

¹² Saqpar-euq lafkhoer, mirtsaq-euq khoertav-euq oeq kuir tsof-eu jeqzaq kharngeur-eu jeq, jeqzaq yawghae deuq, joejoe-aer can-eu jeqzaq hawr-eu mqtav zaw-eu arjir deuq ur-eu mae.

¹³ Khoerngae, tersar tiq sar aqyawf-anr aernaeq-eu, “Beqtuvluv-or! Tur-awr saef-awr dzaq-awq.”

¹⁴ Aerkhawf, Beqtuvluv aer-eu, “Sanqpaq-or! Maq geufnya-a. Maq dzaqkhmq-eu jeq hawr-eu maqshawr-eu jeq, ngar tiqpov-iq maq dzaqhaw-aq.”

¹⁵ Tersar khoer nyiq pov tiqpov aqyawf-anr paraer-eu, “Miqyaer nae shawr-euq jeq-anr maq dzaqkhmq-eu jeq laer nawr taqsawx.”

¹⁶ Khoerlof-aer smq pov keuvni pyeuflar ghaq-awr, saqpar parma-anr dur-eu khoerhmq, mq-anr par gheukhofdav lef-euq mae.

¹⁷ Beqtuvluv, mawrle-eu lafkhoer ya’mawr-euq khoer aqjeq aermawf-eu nga laer yawqha taef-aer noeqzanq taq-awr jawrluf ngae, hawsher-eq, Gorneqlir nae khaerghae lef-euq tsawrhaq khoerdeuq, Sirmoq-euq nymr-anr narhaq narhaq-aer larkeuv taq-awr ghovkhaeq-anr yawfluf-eu mae.

¹⁸ Khoerngae, Beqtuvluv laer kur-eu Sirmoq khoerghaq, khoergar jawr mae lor laer aqyawfmaf kurkur-aer narhaq-eu mae.

¹⁹ Beqtuvluv mawrle-euq jeq-euq garkawv sharnoeqluf ngae, muiq-eu Saflar, aqyawf-anr heulof-aer aer-eu mae: “Hawsher-eq, tsawrhaq smr ghaq, nawq-anr povluf-eu mae.

²⁰ Teumirnae tur-awr irka-awr, aqyawfmaf naeq-aer ir-awq. Nuima povpov lavlav-aer tiqpawf-iq taqghae. Aqjeq mirnae aernar-aq, ngaq nae aqyawf maf-anr bi’oe-euq ma.”

²¹ Khoerngae, Beqtuvluv irka-awr, Gorneqlir nae khaerghae lef-euq tsawrhaq khoerdeuq-anr aernaeq-eu, “Haeq, nawmaf povluf-eu ghaq-aq ngar ma. Nawmaf aqjeq mirnae oe-euq le?”

²² Khoerngae, aqyawfmaf aer-eu, “Yardzoeq guirhuq Gorneqlir-aq, Miqyaer-anr guv-awr, Yurdav tsawrjeuq tsawrca dawqtawv luf-euq lafkhoer tsawrmyanr muiq-eu, tsaq-awr dawr-eu tiq ghaq mae. Nawq-anr aqyawf-euq irkanr-euq lafkhoer kurur-awr, nawq-euq dawq narhaq-awq laer shawr-eu mqtav ghaqkhaer tiq ghaq, aqyawf-anr aernaeq le-euq mae.”

²³ Khoernar-aq, Beqtuvluv, aqyawf maf-anr irkanr ha’ur-awr, uqcif tiq mir biyaf-euq mae. Nishawq ngae nan, Beqtuvluv, aqyawfmaf naeq-aer le-euq mae. Yurbeq meuq-anr jawr-eu aqyuif aqnyir heumyav ghaq khawf aqyawf naeq-aer lecaw-euq mae.

Beqtuvluv, Gorneqlir-anr Dzoer-euq

²⁴ Sarpaeq ngae nan, aqyawfmaf, Gaersaqlir-anr lekeuv-euq mae. Gorneqlir, aqyawf-euq aqyuif aqnyir hawr-eu cawq yawghoer deuq kuruiq-awr, aqyawf maf-anr dawqluf-eu mae.

²⁵ Beqtuvluv urler-euq naeq-aer, Gorneqlir, aqyawf-anr mawr-awr, aqyawf-euq aqkuir-euq maeqshi awbyav-awr uqduq tanq-eu mae.

²⁶ Khoerngae, Beqtuvluv, aqyawf-anr gheutur-awr aer-eu, “Tur-awq, ngar khawf tsawrhaqzaq taef ma.”

²⁷ Beqtuvluv, aqyawf naeq-aer dawq ngaeqcawq ngaeqcawq-aer urler ngae, tsawrhaq ghawqmya’ni uiqlar taq-euq gar ya’mawr-euq mae.

²⁸ Khoernar-aq, aqyawf, aqyawf maf-anr heulof-aer aernaeq-euq mae, “Yurdav tsawrhaq tiq ghaq, yawqkhanq yawqmir yawq-euq tsawrhaq naeq-aer cawq cawq-eu maqngeur nar-aq, aqyawfmaf jawr-eu gar ir-eu heu, maq janrkhmq-a laer nawmaf siqnya-eu mae. Aerkhawf, tsawrhaq tiqghaq-anr-iq maq cawqkhmq-eu hawr-eu maqshawr-eu laer taqsawx laer, Miqyaer, ngaq-anr maeqnaeq laf-euq mae.

²⁹ Khoermirnae, ngaq-anr kurlar-euq naeq-aer, ngar khoerheu laer maqaerni lar-euq ma. Nawmaf, ngaq-anr aqjeq mirnae bi kurlaq le-euq le laer narhaqmawf mir-a?”

³⁰ Khoerngae, Gorneqlir heulof-aer aer-eu mae, “Dzeurlaf-euq oeq nan ngae nan-anr nae heuyamq-anr keuvni, ngar dzardzaq sheuq-euq ma. Uqciftaw naqliq smr laf-anr ngar, irkanr-euq lafkhoer guiqlanq sharluf ngae, tsawrhaq tiq ghaq yawshaef bya-eu maeqtsoeq dm-awr, ngaq-euq maeqshi yawfle-awr,

³¹ heulof-aer aer-eu mae: ‘Gorneqlir-or! Nawq-euq guiqlanq shardawq-anr Miqyaer gaq-awr, nawq nae gamfnaeq-euq deuq-anr khawf Miqyaer-euq maeqshi aqyawf noeqmawr luf-eu mae.

³² Khoermirnae, nawr, Yurbeq meuq-anr tsawrhaq khaerghae-awr, Beqtuvluv laer kur-eu Sirmoq khoerghaq-anr bi kurlaq-ir-awq. Aqyawf-aq, iqmalavshav-euq lawrdzer-anr jav-eu bawkhov janranq-eu Sirmoq-euq nymr-anr jawr-eu mae. Aqyawf larkeuv ngae, aqyawf, nawq-anr ja’maeq naeqlaf taef-a.’

³³ Khoermirnae, ngar tiqpov taef-aer nawr jawr-eu gar khaerghae lef-euq ma. Nawr lar-euq-aq zawr muiq-eu mae. Miqyaer nae nawq-anr biftaq-euq yawqdawq navluf-anr narhaq-eu laer, nymq-mr nga’maf, Miqyaer-euq maeqshi uiqlar taq-euq ma.”

Beqtuvluv Dawqmaeq Maeq-euq

³⁴ Khoerngae, Beqtuvluv, khaqmae mrnga-awr heulof-aer aer-eu mae, “Yawtsaq yawdawr-euq lafkhoer, Miqyaer-aq, myavpyawq huiqnyir maqtser nga laer, ngar siqduq-euq ma.

³⁵ Aerkhawf, yawqjeuq yawqca navluf-euq lafkhoer, aqyawf-anr guv-awr tsaq-awr dawr-eu jeq mr-eu tsawrhaq yawqghaq navluf-anr aqyawf hageuf-eu mae.

³⁶ Miqyaer, aqyawf-euq dawq, Irsaqleqlav tsawrhaq-anr bif-euq mae. Dawq khoerdawq-aq, dawqtawv luf-euq Sanqpaq pyeuf-eu Yeqsur Kali-euq baqda’nae, nuisar biza’ni maeq-eu guiqlanqdawq mae.

³⁷ Yorhaq, bartirsaq-euq garkawv dawqmaeq maeq-eu khoer dzeur-euq nar-aq, Gaqliqlaer mirkhanq-anr danqbae-awr, Yurdav mirkhanq doeni maeqkhawq jir-euq dawq heu-anr nawmaf siqnya-eu mae.

³⁸ Miqyaer, Naqzaqlaer tsawrhaq Yeqsur-anr Yawshawr Saflar hawr-eu baoq nae tsaqtsov-awr, aqyawf doedoe-aer can ngae, Miqyaer, aqyawf naeq-aer jawr-eu mirnae, yawmuiq jeq mr-awr, naef sanqpaq khaeq-awr khav-eu gar daqluf-eu tsawrhaq dawqtawv luf-anr bi taqler-euq mae.

³⁹ Aqyawf nae Yurdav mirkhanq hawr-eu Yeqlursaqlaeq-anr kharmr-euq yawqjeq navluf-euq garkawv nga’maf sarkir kamq-eu ma. Aqcawq, aqyawf-anr lafyaq-euq khoertav gheuceuq-awr saef-euq mae.

⁴⁰ Aerkhawf, smq nan keuvlar-euq nar-aq, Miqyaer, Yeqsur-anr bi ghofdaef lar-awr, aqyawf-euq mawrdo byacaevni bimawr-euq mae.

⁴¹ Mirkhanqzaq dawqtawv luf-anr bimawr-euq maqngeur-a. Sarkir bikamq-eu laer yawbae ngae nae, Miqyaer nae tserdov taq-euq nga’maf-anr bimawr naeqlaf-euq taef mae. Aqyawf shir-euq gar nae ghofdaef lar-awr, nga’maf, aqyawf naeq-aer dzaqtaf dawrtaf-euq ma.

⁴² Aqcawq-anr dawqmaeq maeq-awr, daefluf-eu tsawrhaq-anr khawf, shir-euq tsawrhaq-anr khawf, yarkhaq dar-eu ghaq geufni, Miqyaer, Yeqsur-anr tserdov taq-euq mae laer, sarkir bikamq-eu gharduq, aqyawf, nga’maf-anr dawq bifyaf-euq mae.

⁴³ Aqyawf-anr kharjan-eu aqsur ghaq maqkaq, aqyawf-euq tsawrmyanr baqda’nae iqbax pyaeq-eu jeq za taef-a laer, Miqyaer gharduq ngaeqdan-eu tsawrhaq yawqghaq navluf aqyawf-euq garkawv sarkir kamqtaq-euq mae.”

Aqcawq Tsawrjeuq, Yawshawr Saflar Za-euq

⁴⁴ Beqtuvluv dawq heudeuq ngaeqluf ngae, aqyawf-euq dawq narhaq luf-eu tsawrhaq dawqtawv luf-euq khoertav, Yawshawr Saflar zafka le-euq mae.

⁴⁵ Aqcawq tsawrjeuq tsawrca-euq khoertav khawf, Miqyaer, Yawshawr Saflar-euq lafsawq shaevdav naeq-euq mirnae, Beqtuvluv naeq-aer lar-euq bawkhov maeqdzaq yaeq-euq jan-eu tsawrhaq khoerdeuq ya’mawr ngae zanqler-euq mae.

⁴⁶ Aqjeq mirnae aernar-aq, tsawrhaq heudeuq yawqjeq yawq-euq dawq bavbav-aer Miqyaer-anr ciqhuiq ciqmanr-eu gar yagaq ya’mawr-euq mae.

⁴⁷ Khoerngae, Beqtuvluv aer-eu, “Tsawrhaq heudeuq khawf aqduimaf lof-aer Yawshawr Saflar za-euq mae. Aqyawf maf-anr ircuf-euq lafkhoer bartirsaq taq hageuf laer aqsur ghaq lavtsoeq nya-eu la?”

⁴⁸ Khoermirnae, Beqtuvluv, aqyawf maf-anr Sanqpaq Miqyaer-euq tsawrmyanr-euq uqmov bartirsaq hageuf-awq laer dawq bif-euq mae. Khoernar-aq, aqyawfmaf naeq-aer heumyav nan parjawr naeqlaf laer Beqtuvluv-anr shar-euq mae.