Gʼaˬkʼehˇ 1 - Yawshawr Yaerbof Dawqma Sarjax Yawshuif Jaceuq-eu Hawr-eu Dawqdaq

Ardanq Bae-eu Dawq

¹ Tawrpirlu-or! Ngaq nae bof-euq sanqbof yawbae pur-euq lafkhoer, Yeqsur nae mrdanq bae-awr, maeqdanq bae-euq dawqtawv luf-anr nae,

² Yeqsur, Yawshawr Saflar-anr ghoe-awr, aqyawf nae tserdov taq-euq ghaqkhaer deuq-anr dawq bifyaf-awr, mqtav bi sheuqdav lef-euq gar keuvni boftaq-euq ma.

³ Aqyawf shaqzanq daqghaq-euq nar-aq, yawduq baw-eu sarkir ghawqmya jeq nae aqyawf daefluf-eu ma laer, ghaqkhaer deuq-anr bimawr-euq mae. Oeqtser nan-euq lafkhoer aqyawf-euq mawrdo aqyawf maf-anr bimawr-awr, Miqyaer uvlanr-eu garkawv ja’maeq naeq-euq mae.

Yawshawr Saflar-anr Dawqtawq Siq

⁴ Yeqsur, aqyawfmaf naeq-aer uiqler-awr jawr ngae, Yeqlursaqlaeq-anr nae taqdov-ir, Aqda Miqyaer nae aertaq-euq dawqma sarjax khoerdawq-anr nawmaf dawqtawq siq laer, Yeqsur, aqyawf maf-anr dawq bif-euq mae. Yeqsur aer-eu, “Garkawv heu-aq, ngar aer-eu gar nawmaf yagaq-euq mae.

⁵ Yorhaq-aq, ircuf nae bartirsaq mrnaeq-euq mae. Aerkhawf, aqkar nar-aq, ghawqmya nan maqghae-aer, nawmaf-aq, Yawshawr Saflar-euq lafkhoer bartirsaq ya hageuf taef-a.”

⁶ Khoermirnae, aqyawfmaf uiqler taq-awr jawr ngae, Yeqsur-anr narhaq-eu, “Sanqpaq-or! Nymq-mr nawr, Irsaqleqlav tsawrhaq yawqhar yawqha parbi uvlanr-eu laer ghae-eu ma lor?”

⁷ Khoerngae, Yeqsur, aqyawf maf-anr heulof-aer aernaeq-euq mae, “Aqda, aqyawf-euq aryaq-euq lafkhoer, aryamq arlaw paxtaq-euq gar nawmaf siqnya-eu laer maqya ghae-ar.

⁸ Aerkhawf, Yawshawr Saflar, nawmaf-euq khoertav zafkale ngae, nawmaf baoq za taef-a. Khoernar-aq, nawmaf, Yeqlursaqlaeq hawr-eu Yurdav mirkhanq-euq lafkhoer, Saqmaqliv mirkhanq doeni hawr-eu mqdzer mirdzer-anr keuvni, ngaq-euq garkawv sarkir kamq-eu tsawrhaq pyeuflar taef-a.”

Yeqsur Mq-euq Khoertav Ghofdav Ler-euq

⁹ Dawq khoerdeuq aerghaq-awr, aqyawfmaf hawluf ngae, aqyawf-anr bi sheuqdav lef-euq mae. Mqdmr tiq tsanq nae aqyawf-anr uvkaq le-awr, aqyawf-anr maqpar mawrnya-aq.

¹⁰ Aqyawf davler luf-eu gar aqyawfmaf mq-anr hawtsovluf ngae, maeqtsoeq yawpyur dmluf-eu tsawrhaq nyiq ghaq, aqyawf maf-euq dawqpae yawfluf-eu mae.

¹¹ Aqyawfnyaf aer-eu, “Gaqliqlaer tsawrhaq deuq-or! Nawmaf aqjeq mirnae yawf-awr mq-anr hawluf-eu le? Nawmaf-anr nae mq-anr bi sheuqdav lef-euq Yeqsur heughaq-aq, aqyawf mq-anr bi sheuqdav lef-eu gar nawmaf nae ya’mawr-euq lof-aer, aqyawf tiq pov par zafka le-eu mae.”

Laftav Tiv-anr Guiqlanq Shar-euq

¹² Khoernar-aq, ghaqkhaer deuq, Saqloq laer kur-eu gawqjawq-anr nae Yeqlursaqlaeq-anr ghof-ir-euq mae. Gawqjawq khoerjawq-aq, Yeqlursaqlaeq-euq dawqpae jav-awr, landaw jawrnan ngae nan cankhmq-eu navni kaq-eu taef mae.

¹³ Aqyawfmaf meuq-anr ghofkeuv-ir-awr, aqyawfmaf yaf-eu laftav tiv-euq kuvlawv-anr ledav-euq-aq heudeuq mae: Beqtuvluv, Yorhaq, Yaqkov, Aqdaeqlaeq, Pirlirpuv, Tormav, Baqtawrlaqmaer, Maqtaeq, Aqlaqpaer-euq zaqyo Yaqkov, Sirmoq Zeqlur hawr-eu Yaqkov-euq zaqyo Yurdav.

¹⁴ Aqyawfmaf dawqtawvluf nuima tiqgar gm-awr, guiqlanq yawkhav-aer shar-awr, maq naqlerni tanqshar luf-eu mae. Zaqmiq aqbur heumyav ghaq, Yeqsur-euq aqma Maqliv hawr-eu Yeqsur-euq maernmr deuq khawf, aqyawfmaf naeq-aer jawrluf-eu mae.

Yurdav-euq Danzar Tserpar-euq

¹⁵ (Khoerngae yamq-anr, tsawrhaq 120 ghaq aerghaqni uiqler taq-awr jawr-eu gar), Beqtuvluv, zaqlanr deuq-euq ghanrcae nae turlar-awr heulof-aer aer-eu mae:

¹⁶ “Aqyuif aqnyir deuq-or! Yawshawr Saflar, Daqbir-euq khaqmae-anr ghoe-awr aerkeuv taq-euq, Yaerbof-euq lafkhoer boftaq-euq dawq heudawq ya byanlar-eu mae. Khoer-aq, Yeqsur-anr nyaef-euq tsawrhaq deuq-anr sheuqmaeq naeq-eu tsawrhaq pyeuflar-euq Yurdav-euq garkawv mae.

¹⁷ Aqyawf khawf nga’maf naeq-aer bi sawxgawf-euq, guiqlanq-euq gar heu-anr taf-eu tiq ghaq mae.”

¹⁸ “(Yurdav, aqyawf nae yawlaeq jeq mr-awr za-euq arpoeq khoer yur-awr, mirtsaq tiq tsanr zeur-euq mae. Yurdav uqduq tanqpov-aer ga-ir-awr, uqmav gapav-awr nae bawur bawma dawqtawvluf yoerdov lef-euq mae.

¹⁹ Garkawv heu-aq, Yeqlursaqlaeq-anr jawr-eu tsawrhaq dawqtawvluf siqnya-eu mae. Khoermirnae, mirtsaq khoertsanr-anr aqyawf maf-euq dawq-anr nae, Aqgeqdaqmaq laer kur-euq mae. Dawqtsuif-aq, ‘Shiq-euq mirtsaq’ laer aermawf-eu mae).

²⁰ “Aqjeq mirnae aernar-aq, Jaceuq-eu sanqbof-euq lafkhoer heulof-aer boftaq-euq mae, ‘Aqyawf-euq jawrduq-anr tsawrhaq tiqghaq-iq maqjawrni, mirtsoeq tsoeq-ir luf-ur. (Jc 69:25) Aqyawf-euq ardeuv artiv-anr, aqcawq nae bi yurluf-ur.’ (Jc 109:8)

²¹ “Khoermirnae, Sanqpaq Yeqsur, aqdui naeq-aer irir larlar-aer can-euq aryamq dawqtawv luf-euq lafkhoer, ardanqbae ngae nae nymq-mr keuvni, aqdui naeq-aer jawrluf-eu tsawrhaq deuq-euq lafkhoer-euq tiq ghaq,

²² Yorhaq bartirsaq mrnaeq-eu aryamq-anr nae bae-awr, Yeqsur, aqdui jawr-eu gar nae bi sheuqdav lef-euq arnan aryamq-anr keuvni, aqdui naeq-aer keuq-eu tiq ghaq, Yeqsur ghofdaef lar-euq garkawv, aqduimaf naeq-aer sarkir kamq-eu tsawrhaq ya pyeuflar-eu mae.”

²³ Khoermirnae, aqyawfmaf, tsawrhaq nyiq ghaq-anr sharnoeq-euq mae. Yawbae ghaq-aq, tsawrmyanr myanrmar Yurtuq laer myanr-awr, Baqsaqbav laer khawf kur-eu Yorsaev mae. Nyiq ghaq tiqghaq-aq, Maqtir laer kur-eu mae.

²⁴ Khoernar-aq, aqyawfmaf guiqlanq heulof-aer shar-euq mae, “Sanqpaq Miqyaer-or! Nawr-aq, tsawrhaq yawqghaq navluf-euq nuima-anr siqnya-eu mae. Nawr, heu nyiq ghaq-anr nae aqgeu ghaq-anr tserdov-euq le laer panmaeq naeqlaf-awq.

²⁵ Yurdav-aq, aqyawf-euq jawrduq jawrzar-anr irni, mrbanq mrlaeq-awr coq-ir-euq mirnae, heughaq-anr ghaqkhaer bigeuf-awr guiqlanq-euq gar heu-anr yabi mrtaf lar-eu mae.”

²⁶ Khoernar-aq, aqyawfmaf, aqyawf nyaf-euq gharduq shaevtsaqtsaq ngae, Maqtir-anr zaqler-euq mae. Khoermirnae, Maqtir-anr ghaqkhaer 11 ghaq naeq-aer sawxgawf-euq mae.