Eˇpeˇsu 4 - Yawshawr Yaerbof Dawqma Sarjax Yawshuif Jaceuq-eu Hawr-eu Dawqdaq

Nuima Gm-awr Daef-eu

¹ Sanqpaq Yeqsur-euq gharduq kuv-anr urluf-eu ngar, nawmaf-anr heulof-aer shar-eu ma. Miqyaer, nawmaf-anr kur-euq lof-aer, kur-euq gar geuxni daef-awq.

² Yawqjeq navluf-euq lafkhoer, nuinanq nuiyu anr-awr, nuima nanqyuni ghae-eu uqtaf, nuinoeq ghawqmanrni noeq-awr, gaq-eu lafkhoer tiqghaq tirghaq or-awq.

³ Tsaqler dzoerler-eu jeq-euq lafkhoer tiqghaq tirghaq bi ganrdzanq-awr, muiq-eu Saflar-euq lafkhoer nuima tiqsiq taef-aer taq-eu jeq maqbi byov-ir ni laejae-awq.

⁴ Miqyaer, nawmaf-anr kur ngae, noeqtmq-eu jeq tiqjeq taef-aer jav-eu lof-aer, mawrdo tiq do taef-aer baw-eu uqtaf, muiq-eu Saflar tiq ghaq jawr-eu taef mae.

⁵ Sanqpaq Miqyaer tiq ghaq taef-aer jawr-awr, jan-eu jeq tiqjeq taef-aer jav-eu uqtaf, bartirsaq mrnaeq-eu tiqjeq jav-eu taef mae.

⁶ Miqyaer khawf tiq ghaq taef-aer jawr-awr, tsawrhaqzaq dawqtawv luf-euq Aqda pyeuf-eu uqtaf, dawqtawv luf-euq khoertav jawr-awr, dawqtawv luf-euq lafkhoer gar mr-awr, nawmaf yawqghaq navluf-euq lafkhoer khawf jawrluf-eu mae.

Muiq-eu Saflar-euq Lafsawq

⁷ Kali-euq lafsawq-anr geuxni, aqdui yawqghaq navluf guiqlanq yawdzanr zataq-euq ma.

⁸ Aqyawf aer-eu, “Aqyawf yawgor-anr ghofdavler ngae, bi kalanr taq-euq deuq-anr sheuqdav lef-awr, tsawrhaqzaq-anr lafsawq bifnaeq-euq mae.” (Jc 68:18)

⁹ “Aqyawf ghofdav ler-euq” laer aer-eu-aq, mirtsaq-euq dawqdan jeqhu irka-euq maqngeur-a lor?

¹⁰ Irka-euq khoerghaq, yawqjeq navluf-euq lafkhoer jawrbyan-eu gharduq, mq ledzeur-eu gar keuvni ghofdav ler-euq khoerghaq mae.

¹¹ Aqyawf, tiqghaq nav-anr ghaqkhaer bigeuf-awr, tiqghaq nav-anr Miqyaer gharduq ngaeqdan-eu tsawrhaq bigeuf-euq mae. Tiqghaq nav-anr guiqlanqdawq maeq-eu tsawrhaq bigeuf-awr, tiqghaq nav-anr saqlaq bigeuf-euq uqtaf, tiqghaq nav-anr maeqzaq bigeuf-euq mae.

¹² Heu-aq, tsawrshawr deuq-anr maeqbym-awr, guiqlanq-euq gar mr-eu mirnae, Kali-euq mawrdo bihuiq bi manrlar-eu gharduq bifnaeq laf-euq mae.

¹³ Aqdui dawqtawvluf, Miqyaer-euq Zaqyo-anr siqnya-eu tsawrganr hawr-eu jan-eu jeq-euq lafkhoer nuima tiqsiq taef-aer taqnya lar-awr, aerkhar maqza-eu tsawrhaq pyeuflar-eu uqtaf, Kali byan-eu lof-aer byanlar ngae keuvni mr-eu gharduq mae.

¹⁴ Khoerngae tiqjawr, aqdui, zaq maqpar pyeuf-eu uqtaf, tsawrhaq-euq tsawrganr hawr-eu jaqmyawf maershuir-euq bawqtov zmq-eu lafkhoer, kharngeur-eu dawqmaeq dawqtsov-euq jaqlaer bawlar ngae, khar bawpyawr ghae-eu paw maqpyawr-ir-ar.

¹⁵ Gaq-eu lafkhoer, yawtsaq yawdawr jeq ngaeq-awq. Khoerlof-aer nar-aq, uqduq pyeuf-eu Kali-euq lafkhoer, yawqpaw navluf huiqlar manrlar taef-a.

¹⁶ Aqyawf-euq lafkhoer, mawrdo dolan-aer yoeqtsuif yawqtsuif navluf nae gheutsaf-awr dzeuftaq-euq mirnae, arsaer yawqsaer navluf, yawqha-euq gar yawqha mrluf ngae, mawrdo dolan-aer gaq-eu lafkhoer huiqlar manrlar luf-eu mae.

Tsawroer Hawr-eu Tsawrshuif

¹⁷ Khoermirnae, ngar, Sanqpaq Miqyaer-euq maeqshi sarkir kamq-eu lafkhoer nawmaf-anr aer-eu ma. Nawmaf, aqcawq tsawrjeuq tsawrca daef-eu lof-aer taqpar daef. Aqyawf maf-euq nuinoeq nuidur-aq, tiqjeq-iq gardanr maqtsoeq-a.

¹⁸ Aqyawf maf-euq nuima myavbaef baef-ir-euq mirnae, aqyawfmaf tiqjeq-iq maq siqnya’ni pyeuf-ir-awr, Miqyaer nae biftaq-euq yawdaef daef-eu jeq-anr nae zanrdof kaq-ir-euq uqtaf, ghovshaw nya-eu jeq zanrtsuini pyeuf-ir-euq mae.

¹⁹ Aqyawfmaf shafdawr-eu maqbawni pyeuf-ir-awr, jawflafni ghae-eu jeq mrni yawqha-euq mawrdo a’naeq-eu uqtaf, maqshawr-eu yawqjeq navluf mrdaev-eu maqbaw-a.

²⁰ Aerkhawf, nawmaf-aq, Kali-anr khoerlof-aer dzawgeuf-euq maqngeur-a.

²¹ Yeqsur-euq lafkhoer yawtsaq yawdawr anr-eu lof-aer, aqyawf nae nawmaf-anr bimaeq-awr, nawmaf, aqyawf-euq dawq yagaq-euq ngeur nar-aq,

²² nawmaf, dzeurlaf ngae mr-euq yawqha-euq mrjeq sharkawv yawoer khoer laevdzae yaf-awq. Tsawroer khoerghaq-aq, jaqmyawf maershuir anr-eu nuikhanr nuilov-euq baqda’nae cawv-ir duidui luf-eu mae.

²³ Khoermirnae, nawmaf-euq nuima saflar, yawshuif bi lavshuif-awq.

²⁴ Nawmaf, aqdir tsaq-awr dawr-eu hawr-eu shawr-eu lafkhoer, Miqyaer-euq arghaer-anr durni baetaq-euq tsawrshuifghaq dmdav-awq.

Yawshawr Saflar Nuima Cawv Paq-aer Taqmr

²⁵ Khoermirnae, nawmaf jaqmyawf myawf-eu jeq-anr byaerdzae-awr, “Nawmaf yawqghaq navluf yawqha-euq dawqpae jawr-eu tsawrhaq naeq-aer, yawtsaq yawdawr jeq ngaeq-awq.” (Zkl 8:16) Aqjeq mirnae aernar-aq, aqdui-aq, tiqghaq tirghaq-euq arsaer pyeuf-eu ma.

²⁶ “Nuima paernya taef-a. Aerkhawf, iqbax taqmr.” (Jc 4:4) Nanrma ga’anr ngae keuvni nuima paerpaer-aer taqjawr.

²⁷ Naef sanqpaq-anr jawrduq taqbif.

²⁸ Dzeurlaf ngae, smrkhoeq khoeq-euq tsawrhaq taqpar khoeq. Mawf-eu tsawrhaq-anr bif-eu tiqjeqnav javlarni khawf, laejae-awr yawqha-euq aqlaf nae gar yawmuiq jeq mr-awq.

²⁹ Nawmaf-euq khaqmae-anr nae dawqdoer taqbi dovle. Yagaq-eu tsawrhaq guiqlanq yawdzanr za’ni, huiqlar manrlar-eu gar gardanr tsoeq-eu dawqmuiq ngaeq-awq.

³⁰ Miqyaer-euq Yawshawr Saflar nuima cawv paq-aer taqmr. Miqyaer, Yawshawr Saflar-anr ghoe-awr nawmaf-anr kakhof naeqlaf-eu arnan-euq gharduq, jmq diqtaq-euq mae.

³¹ Nawmaf, nuima khaqjawfni ghae-eu jeq, nuima dav-eu jeq, nuima paer-eu jeq, pyaerdzaq-eu jeq, dawqdoer ngaeq-eu jeq hawr-eu, aqcawq-anr coeqler civlerni janrmawf-eu yawqjeq navluf, nawmaf-euq lafkhoer nae byaerdzae jir-awq.

³² Kali-euq lafkhoer, Miqyaer, nawmaf-anr iqbax pyaeqnaeq-euq lof-aer, nawmaf khawf tiqghaq tirghaq iqbax pyaeq-awr, nuima nanqyuni ghae-eu lafkhoer, tiqghaq tirghaq ghawqshaq gaq-awq.