Eˇpeˇsu 1 - Yawshawr Yaerbof Dawqma Sarjax Yawshuif Jaceuq-eu Hawr-eu Dawqdaq

Dawqcawq Puq-eu Dawq

¹ Ngar-aq, Miqyaer nuima tsaq-eu mirnae, Yeqsur Kali-euq ghaqkhaer geufluf-eu Pawrluv ma. Yeqsur Kali-euq lafkhoer sarjax zif-eu tsawrhaq pyeuf-eu, Erpersu-anr jawr-eu tsawrshawr deuq-anr sanqbof bofanr lef-eu ma.

² Aqdui-euq Aqda Miqyaer hawr-eu Sanqpaq Yeqsur Kali-euq guiqlanq yawdzanr hawr-eu, nuisar of-eu jeq nawmaf-euq khoertav jav luf-ur.

Kali-euq Lafkhoer Za-euq Guiqlanq

³ Aqdui-euq Sanqpaq Yeqsur Kali-euq Aqda Miqyaer-anr jaceuq kar-eur. Aqyawf, mqtav mirkhanq-anr jav-eu saflar paw-euq guiqlanq yawqjeq navluf, Kali-euq lafkhoer aqdui-anr bifnaeq laf-euq mae.

⁴ Aqdui, Miqyaer-euq maeqshi iqbax tiqpawf-iq taqkhar maqza-eu shawr-eu tsawrhaq pyeuflarni, mirtsaq tanqkhawr maqbae-euq minav-aer, gaq-eu lafkhoer Kali-anr ghoe-awr aqdui-anr tserdov taq-euq mae.

⁵ Miqyaer nuima tsaq-awr nuikhanr shir-eu lof-aer, Yeqsur Kali-anr ghoe-awr nae aqdui, aqyawf-euq zaq pyeuflarni, Miqyaer yawbae ngae nae tserdov taq-euq mae.

⁶ Aqdui, aqyawf-euq guiqlanq yawdzanr-euq yawshaef khanqsaer-anr bi jaceuq-eu laer Miqyaer, aqyawf zawr gaq-eu ghaq-anr ghoe-awr, aqdui-anr hageuf naeqlaf-euq mae.

⁷ Miqyaer-euq guiqlanq yawdzanr sanr duidui-eu lafkhoer, aqdui, Zaqyo-euq shiq baqda’nae kakhof-eu jeq za-awr, iqbax pyaeqnaeq-eu jeq za-euq ma.

⁸ Miqyaer, guiqlanq yawdzanr khoer-anr ghoe-awr, aqdui-anr ghovshaw nya-eu jeq hawr-eu zaqsiq tsawrganr tiqbyan tiqlof bifnaeq laf-euq mae.

⁹ Miqyaer, aqyawfghaq nae noeqtsaev taq-euq jeq, aqyawf nuikhanr shir-eu mirnae, zaftaq-euq aqyawf nuima tsaq-eu jeq aqdui-anr bi siqnya naeqlaf-euq mae.

¹⁰ Zaftaq-euq jeq khoer-aq, aryamq byanlar ngae, mq-euq khoertav hawr-eu mirtsaq-euq khoertav kharjawr kharjav-eu dawqtawvluf, Kali-euq lafkhoer taef-aer bigawf bi bawvlar-eu laer mae.

¹¹ Aqdui khawf Kali-euq lafkhoer jeqbir of-eu tsawrhaq pyeuflar-euq ma. Miqyaer-euq arpyar jav-eu lof-aer, aqyawf yawbae ngae nae tserdov taq-awr, dawqtawv luf-euq lafkhoer aqyawf nuinoeq nuidur jav-awr nuima tsaq-eu lof-aer mr-euq mae.

¹² Khoer-aq, aqcawq-euq maeqhu Kali-euq lafkhoer noeqtmq-eu deuq, aqyawf-euq yawshaef khanqsaer-anr bi jaceuq-eu gharduq mae.

¹³ Nawmaf-anr kakhof nya-eu yawtsaq yawdawr-euq guiqlanq dawq-anr yagaq ngae, nawmaf, Kali-anr ghoelar-euq mae. Khoermirnae, jan-eu lafkhoer sarjax biftaq-euq lof-aer, Yawshawr Saflar-anr ghoe-awr nawmaf-anr jmq diqtaq-euq mae.

¹⁴ Aqyawf-euq yawshaef khanqsaer-anr jaceuq-eu jeq dovlarni, zeurtsaev taq-euq kakhof-eu jeq maqza-euq khoerkeuvni, Yawshawr Saflar-aq, aqdui jeqbir za-eu yawduq bawmae laer kamq-eu ghaq pyeuf-eu mae.

Pawrluv-euq Guiqlanq Shardawq

¹⁵ Khoermirnae, nawmaf, Sanqpaq Yeqsur-anr nuijan anr-awr, tsawrshawr dawqtawv luf-anr gaq-eu garkawv ngar yagaq-awr,

¹⁶ ngar, nawmaf-euq gharduq maq naqlerni Miqyaer-anr jaceuq-eu lafkhoer, nawmaf-anr aerkeuv aerkeuv-aer guiqlanq sharluf-eu ma.

¹⁷ Aqdui-euq Sanqpaq Yeqsur Kali-euq Miqyaer pyeuf-eu, yawshaef khanqsaer-euq Aqda, nawmaf-anr zaqsiq tsawrganr hawr-eu panmaeq-eu Saflar bifnaeq-awr, aqyawf-anr siqnya-eu tsawrganr anrlarni, ngar guiqlanq sharluf-eu ma.

¹⁸ Miqyaer, nawmaf-anr kur-euq khoer, noeqtmq-eu jeq aqjox-aer jav-awr, tsawrshawr deuq-euq lafkhoer jeqbir-euq yawshaef khanqsaer arnavni sanr-eu nga laer, nawmaf-euq ghovshaw nya-eu myavnuiv panlarni khawf, ngar guiqlanq sharluf-eu ma.

¹⁹ Aqyawf-euq baoq huiq-eu lafkhoer gar mr-eu gar ghoe-awr, jan-eu tsawrhaq pyeuf-eu aqdui-euq khoertav, aqyawf-euq baoq arnavni huiq-awr myaq-eu nga laer, nawmaf siqnya larni khawf, ngar guiqlanq sharluf-eu ma.

²⁰ Aqyawf-euq baoq khoer Kali-euq lafkhoer gar mr ngae, aqyawf-anr shir-euq gar nae bi ghofdaef lar-awr, mq-euq khoertav, Miqyaer, Kali-anr aqyawf-euq armar paw binuir-euq mae.

²¹ Kali-aq, mqsanr deuq, aryaq deuq, baoqdeuq, sanqpaq deuq hawr-eu tsawrmyanr khar myanrtaq-euq dawqtawv luf-euq khoertav huiq-eu ghaq pyeuf-awr, heuzir-anr taef-aer maqngeur-eu, aqkar karzir-anr khawf, huiq-eu ghaq pyeuf-eu mae.

²² Miqyaer nae yawqjeq navluf, Kali-euq aqkuir-euq uqmov bijawr bijav-awr, Kali-anr, Kalizaq armur-anr khartaf-eu yawqjeq navluf-euq khoertav, uqduq bipyeuf-euq mae.

²³ Kalizaq armur-aq, Kali tiqbyanni byan-eu Kali-euq mawrdo mae. Aqyawf-aq, yawqjeq navluf-anr bi byanlar-eu mae.