Dawqdaq 3 - Yawshawr Yaerbof Dawqma Sarjax Yawshuif Jaceuq-eu Hawr-eu Dawqdaq

Ya’we Miqyaer-anr Ghoe-awq

¹ Ngaq-euq zaqyo-or! Ngaq nae maeqnaeq tsovnaeq-euq zanrdawq-anr maqngaer-aer, Nawq-euq nuima, ngaq-euq khaerdawq jeqhmq taq-awq.

² Aqjeq mirnae aernar-aq, Heu-aq, nawr daef-eu arnan lavmanr nya-awr, zir bibaw bi zale-eu uqtaf, Nuisar of-eu jeq khawf nawq-anr lanqnaeq laf-eu mae.

³ Ghawqshaq gaq-eu jeq hawr-eu yawtsaq yawdawr jeq, nawq-anr taqbi byaerdzae, Zanrdawq khoer nawq-euq kawqlanr-anr dan-awr, Nawq-euq nuima-euq terbyaf-anr bofmyanq taq-awq.

⁴ Khoerlof-aer nar-aq, Miqyaer hawr-eu tsawrhaq-euq maeqshi, Ghoer mr-eu jeq hawr-eu tsawrmyanr muiq-eu jeq povmawr taef-a.

⁵ Nawq-euq nuima dawqtawvluf, Ya’we Miqyaer-anr ghoe-awq. Yawqha ghovshaw nya-eu jeq-anr dawqpaeq taqtaq.

⁶ Nawr kharmr kharshar-eu jeq, aqyawf-anr bi siqnya-awq. Aqyawf, nawq-euq garma toeqmaeq naeqlaf taef-a.

⁷ Yawqhar yawqha tsawrganr anr-eu ma laer taqnoeq. Ya’we Miqyaer-anr guv-awr, yawdoer jeq-anr garjaw jaw-awq.

⁸ Heulof-aer janr-eu-aq, nawq-euq mawrdo-anr jawrsar bidov-awr, Nawq-euq shaqyoeq-anr ghaq bi khavlar-eu mae.

⁹ Nawq-euq pyurshuir myawqganq hawr-eu, Mrkar sharkar dawqtawv luf-euq lafkhoer keuvbae baele-euq jeq nae, Ya’we Miqyaer-anr taqhuiq taqmanr-awq.

¹⁰ Nawr khoerlof-aer janr nar-aq, nawq-euq myawq taq-eu nymr byan-awr, Nawq-euq aqgaf dzaruir nawqdovduq, aqgaf dzaruir yawshuif byankhar taef-a.

¹¹ Ngaq-euq zaqyo-or! Ya’we Miqyaer dzawpar naeqlaf-eu jeq-anr taqbyaer, Maeqpar naeqlaf-eu jeq-anr taqbyae.

¹² Aqjeq mirnae aernar-aq, aqda, aqyawf gaq-eu zaq-anr maeqpar-eu lof-aer; Ya’we Miqyaer, aqyawf gaq-eu ghaq-anr maeqpar-eu mae.

¹³ Zaqsiq tsawrganr-anr povmawr-euq tsawrhaq hawr-eu, Ghovshaw-eu jeq-anr za-euq tsawrhaq-aq, guiqlanqhuiq taef-a.

¹⁴ Aqjeq mirnae aernar-aq, zaqsiq tsawrganr-euq jirjeuq-aq, pyur-euq jirjeuq navmaqtser muiqdzaeq-awr, Zaqsiq tsawrganr-euq jirjeuq-aq, zawr muiq-eu shuir-euq jirjeuq navmaqtser muiqdzaeq-eu mae.

¹⁵ Zaqsiq tsawrganr-aq, nertseuvni ghae-eu khaqlo saerdeuq navmaqtser arpoeq bawdzaeq-awr, Nawr khar geufmawf-eu jeq tiqjeq-iq zaqsiq tsawrganr-anr ciqcaevnyaf maqnyeuv-a.

¹⁶ Zaqsiq tsawrganr-euq armar laf-anr zirbaw zirza-eu jeq anr-awr, Arcar laf-anr smrmuiq muiq-eu jeq hawr-eu taqhuiq taqmanr-eu jeq anr-eu mae.

¹⁷ Zaqsiq tsawrganr-euq garma-aq, ghawqshaq gaq-eu garma pyeuf-awr, Aqyawf-euq cankawv dawqtawvluf nuisar of-eu mae.

¹⁸ Zaqsiq tsawrganr-anr khar nyaeftaeq taq-euq tsawrhaq deuq-euq gharduq-aq, Daef-eu jeq bif-eu arbawr-anr dur-awr, Aqyawf-anr khar nyaefzif taq-euq deuq-aq, guiqlanq huiq-eu mae.

¹⁹ Ya’we Miqyaer, zaqsiq tsawrganr-anr ghoe-awr, mirtsaq tanqkhawr gawr-euq mae. Ghovshaw nya-eu jeq-anr ghoe-awr, mq-anr bae-euq mae.

²⁰ Aqyawf-euq siqnya-eu tsawrganr-euq baqda’nae, Yawnaf-anr jav-eu ircuf deuq tanqpavdov laf-awr, Mqdmr khawf ceuq bi gadov lef-eu mae.

²¹ Ngaq-euq zaqyo-or! Muiq-eu zaqsiq tsawrganr hawr-eu noeqdanr doe-eu jeq-anr jeqhmq taq-awr, Nawq-euq myavnuiv-anr nae taqbi ghawq-ir.

²² Heu nyiq jeq, nawq-euq nuima saflar-anr daef-eu jeq bif-awr, Nawq-euq kawqlanr-anr hawmuiq-eu lanrdan pyeuf taef-a.

²³ Khoeruqtaf, nawq-euq aqkuir sanqtif tifkhar maqza-aer, nawr, nawq-euq garma-anr nuisar of-eu lafkhoer yacan taef-a.

²⁴ Nawr gayuf ngae, guv-eu jeq maqjav-aer, Nawr coqyuf-awr yufkhav ngae, tmqjawvni ghae taef-a.

²⁵ Japyuqni keuvle nya-eu guv-awr gav-eu jeq-anr taqguv. Tsawrcawv deuq-anr nae lavbyov lavbyav-eu jeq keuvle ngae khawf taqguv.

²⁶ Aqjeq mirnae aernar-aq, Ya’we Miqyaer, nawq-euq zifduq pyeuf-awr; Aqyawf, nawq-euq aqkuir lanrju-anr maqbi paflerni hawpir naeqlaf taef-a.

²⁷ Nawq-euq aqlaf-euq lafkhoer yawmuiq jeq mrnya-eu baoq anr-eu nar-aq, Yawmuiq jeq, za paq-aer ghae-eu tsawrhaq-anr yawmuiq jeq maq mrnaeqni taqbyaer.

²⁸ Nawr jav-eu ngeur nar-aq, nawq-euq dawqpae jawr-eu tsawrhaq-anr, “Ghof-ir-awq. Nishawq ghoflar ngae, ngar bifnaeq ma” laer taq aernaeq.

²⁹ Nawq-anr jan-awr, nawq-euq dawqpae yawmuiq-aer jawr-eu tsawrhaq-anr, Yawdoer janr-eu bawqtov taqtov.

³⁰ Nawq-anr yawdoer maq janrlar-eu tsawrhaq-anr, Garkawv maqjav-eu gar tsawrpyaer taqpyaer.

³¹ Coeqler deuqler-eu jeq mr-eu tsawrhaq-anr myavnav taqnav. Aqyawf-euq garma tiqpawf-iq taq tsergeuf.

³² Aqjeq mirnae aernar-aq, Kharngeur-eu jeq yurpyawv-eu tsawrhaq-anr, Ya’we Miqyaer nuidav dav-awr; Dawrcoeni ghae-eu tsawrhaq-anr, aqyawf maeqbawq bif-eu mae.

³³ Ya’we Miqyaer, tsawrcawv deuq-euq nymrjir-anr yaqkhaer yaq-awr, Tsaq-awr dawr-eu tsawrhaq deuq-euq jawrduq-anr guiqlanq bif-eu mae.

³⁴ Yawduq bawni, aqcawq-anr aqjaf jaf-eu tsawrhaq-anr aqyawf aqjaf jafnaeq-awr, Nuinanq nuiyu anr-eu tsawrhaq-anr guiqlanq yawdzanr bif-eu mae.

³⁵ Khanqsaer-aq, tsawrganr anr-eu tsawrhaq-anr of-awr, Daqga-eu jeq-aq, aqdzawq argan-euq jeqbir pyeuf taef-a.