Dawqdaq 27 - Yawshawr Yaerbof Dawqma Sarjax Yawshuif Jaceuq-eu Hawr-eu Dawqdaq

Aernoeq-awr Maeqbawq Bif-eu

¹ Nishawq-euq garkawv khanqsaer taqjaev. Aqjeq mirnae aernar-aq, Nawr, aqgeu nan-anr aqjeq pyeuflar-eu la laer maq siqnya-a.

² Yawqha-euq khaqmae nae yawqhar yawqha taq jaceuq, Aqcawq nae bi jaceuq-awq, Yawqha-euq maeqluq nae maqngeur-eu, Maqsiq maqsux-eu deuq nae bi jaceuq-awq.

³ Khaqlo-aq, zawr kan-awr kharshuif khawf yawkan mae. Aerkhawf, aqdzawq argan-euq nuima paer-eu jeq-aq, Heu nyiq jeq-euq navmaqtser kan-eu mae.

⁴ Nuima dav-eu jeq-aq, ghawqshaq gaq-eu maq siqnya-aer, Nuima paer-eu jeq-aq, irkhawr khav duidui-eu mae. Aerkhawf, myavnav nav-eu jeq-anr, aqsur ghaq yawfdaqcoer nmr-mq?

⁵ Byacaevni maeqpar naeq-eu-aq, Zaftaq-euq gaq-eu jeq navmaqtser muiqdzaeq-eu mae.

⁶ Cawq nae lavnar naeqlaf-euq jeq-aq, sarjax pyeuf-awr, Muir-eu tsawrhaq-euq maeqsaw-aq, ardzaeq dzeur-eu mae.

⁷ Daev ngae-aq, byaqyav-euq lafkhoer danq-eu byaquir-anr maq hawnanr-a. Aerkhawf, maef ngae-aq, yawkhaq yawqjeq navluf yawcoer-anr dur-eu mae.

⁸ Yawqha-euq nymr-anr nae, irbyov ghae-euq tsawrhaq-aq, Yawqha-euq banq-anr nae, zawbyov ghae-euq jartseuv-anr dur-eu mae.

⁹ Tsir hawr-eu tsir yawsaw-aq, Nuima-anr laqkhaq bi caerlar-eu lof-aer, Cawq nae nuigaq anr-eu maeqbawq bif-euq-aq, Coerovni ghae-awr, laqkhaq bi caerlar-eu mae.

¹⁰ Nawq-euq cawqdeuq hawr-eu, nawqda-euq cawqdeuq-anr taq byaerdzae. Shaqzanq keuvle ngae, nawq-euq maernmr-euq nymr-anr taqir. Garmanr kaq-eu gar jawr-eu, nawq-euq maernmr navmaqtser, Nawq-euq dawqpae jawr-eu, cawqdeuq, nawq-anr cawba naeqnya dzaeq-eu mae.

¹¹ Ngaq-euq zaqyo-or! Yawganr ganr-aer daef-awr, Ngaq-euq nuima laqkhaq bicaer naeqlaf-awq. Khoerlof-aer nar-aq, Ngaq-anr jadoer-eu deuq-anr, ngar ngaeqkhofnya taef-a.

¹² Noeqsiq noeqmawr nya-eu tsawrhaq-aq, Yawcawv jeq oe nga laer hawmawr-awr caevzaf-eu mae. Aerkhawf, maqdzaw-euq zaq-aq, Maeqhu paw can’ur ghae-awr, khaeq-eu gar yadaq-eu mae.

¹³ Boermiq siqkhaq-euq gharduq kamq-eu tsawrhaq-euq maeqtsoeq yurtaq-awr, Maqsiq maqsux-eu tsawrhaq-euq gharduq kamq-eu tsawrhaq-euq, Kamq-eu myawqganq lof-aer nyaeftaeq taq-awq.

¹⁴ Uqshawq yawnaf-aer tur-awr, tersar yawkhav-aer gurgur-aer, Yawqha-euq cawq-anr dawq ngaeqghae naeq-eu-aq, Yaqkhaer yaq-eu nya laer yabi sawx-eu mae.

¹⁵ Caecawq taef-aer shar-eu zaqmiq aqbur-aq, Nan’ga-i maq tsirlerni, yaer-awr dzavluf-eu uqyaer-anr dur-eu mae.

¹⁶ Aqyawf-anr gheunaq-eu-aq, jaqlaer-anr gheunaq-awr, Armar laf nae tsir-anr tsuv-eu gar dur-eu mae.

¹⁷ Shmr-anr shmr nae siqtav-eu lof-aer, Tsawrhaqzaq khawf, yawqha-euq cawq-anr yasiq tav-eu mae.

¹⁸ Siqguq arbawr-anr hawpir-eu tsawrhaq-aq, Siqguq arsiq yadzaq-awr, Yawqha-euq yawsanr-anr lof-awr dawq-eu tsawrhaq-aq, Taqhuiq taqmanr-eu jeq za taef-a.

¹⁹ Myavpyawq, ircuf-anr cuhu nar-aq, myavpyawq mawrlar-eu lof-aer, Nuima-anr cuhu nar-aq, aqjox-aer ghae-eu tsawrhaq nga laer mawrlar-eu mae.

²⁰ Shiqbuir lanma hawr-eu lavcawv-eu jeq-aq, Byanlar-eu maqbaw-eu lof-aer, Tsawrhaq-euq myavnuiv khawf, Hawdaev-euq maqbaw-a.

²¹ Pyur shawr-eu oeqlanq nae pyur shawr-awr, Shuir shawr-eu miqdzaq tsawqbym nae, shuir shawr-eu lof-aer, Tsawrhaq-anr khawf, japoeq-eu dawq nae tsermr nya-eu mae.

²² Aqdzawq argan, lawqloer naeq-aer tanqtsmr-anr nyaefur-awr tanqjer nae tanq-eu khawf, Aqyawf-euq yawdzawq yawgan khoer maqbyov-ir-ar.

²³ Yawqha-euq yawrmaf, aqjox-aer pyeufluf-eu nga laer yawmuiq-aer siqnya-awr, Mawrner mawrmaf-anr yawmuiq paq-aer bosav-awq.

²⁴ Aqjeq mirnae aernar-aq, Pyurshuir myawqganq-aq, aqmyanluf maqgmq-aer, Shuir uqkhov khawf, tiqzir sair tiqzir maq zifnya-a.

²⁵ Yarmof yawgui bafdzae nar-aq, Yarmof yawnanq daefdovlar ngae, Gawqjawq-anr daef-eu dzarnyoer yaequiq taef-a.

²⁶ Yawr-euq baqda’nae, nawr dmghaq dmlmr javlar-awr, Cifmyaef-euq baqda’nae, mirtsaq zeur-eu arpoeq javlar taef-a.

²⁷ Nawr, nawq-euq dzaqdzaq dawrdawr, Nawq-euq paeqzaq-euq dzaqdzaq dawrdawr hawr-eu, Nawq-euq aqbur zaqkhav deuq, dzaqdaev dawrdaev nya’ni, cifmyaef-euq aqcoer javlof taef-a.