Dawqdaq 26 - Yawshawr Yaerbof Dawqma Sarjax Yawshuif Jaceuq-eu Hawr-eu Dawqdaq

Ciqcaev-awr Maeq-eu Maeqdawq

¹ Jawrla-anr ngaer gale-awr, Mrkar lavluiv ngae uqyaer yaerle-eu lof-aer, Aqdzawq argan-anr, taqhuiq taqmanr naeq-eu maqtsaq-a.

² Tiqjeq-iq maqngeur-eu gar yaqkhaer yaq-eu-aq, Ghoflaf ghofdmr-aer zaw-eu jartseuv, Hawr-eu maq naqlerni zaw-eu jawfjirjawfghaf-anr dur-eu mae.

³ Manq-anr arcav nae yajuif-awr, Manq tanqlav-anr maeqkawf yadawv-eu lof-aer, Aqdzawq argan-euq narkhan ganqkawq nae yadiq-eu mae.

⁴ Aqdzawq argan-anr, aqyawf khardzawq khargan-eu lof-aer taq aerkhofnaeq. Maqngeur nar-aq, nawr khawf aqyawf lof-aer durlar nya-eu mae.

⁵ Aqdzawq argan-anr, aqyawf khardzawq khargan-eu lof-aer aerkhof naeq-awq. Maqngeur nar-aq, aqyawf-euq myavnuiv haw ngae, Yawqhar yawqha, yawganr le laer haw-eu mae.

⁶ Aqdzawq argan-anr ghoe-awr nae, Dawqtsaf dawqdzawr bisha-eu-aq, Yawqha-euq aqkuir yawqha deuvtsaev-awr, Coeqlar deuqlar-eu jeq dawr-eu gar dur-eu mae.

⁷ Aqdzawq argan-euq khaqmae-anr nae dovle-euq dawqdaq-aq, Ghaq maqanr-aer, gagheu luf-eu aqkuir-anr dur-eu mae.

⁸ Aqdzawq argan-anr ciqpoeq-eu-aq, Caqoeq-anr khaqlo paftawf-eu gar dur-eu mae.

⁹ Aqdzawq argan-euq khaqmae-anr nae dovle-euq dawqdaq-aq, Jirbaq yaef-eu tsawrhaq-euq aqlaf-anr anr-eu aqgan-anr dur-eu mae.

¹⁰ Khar cantsaev-eu tsawrhaq hawr-eu, Aqdzawq argan-anr ghaqmanr bi manrlar-eu-aq, Kharngeur-eu ghaq-anr beuvnar-eu, Kav beuv-euq tsawrhaq-anr dur-eu mae.

¹¹ Aqkuiq-aq, yawqha nae uqpaef paefdzae-euq gar par ghofkhof-ir-eu lof-aer, Aqdzawq argan khawf, yawqha-euq yawdzawq yawgan par mrpov-eu mae.

¹² Nawr, yawqhar yawqha yawganr ma laer haw-eu tsawrhaq-anr mawrhaw-euq ma laq? Aqdzawq argan khawf, heughaq-anr navmaqtser noeqtmqkhar za-eu mae.

¹³ Nymrgawq yawdoer tsawrhaq aer-eu, “Garma-anr arlaqjaqshir jawr-a! Guvlar paq-aer ghae-eu arlaqjaqshir laevkawv-anr yawf nga!”

¹⁴ Larghov-anr ghovbaq nae gheutaeq taq-awr, Khoerpaw mapaw-aer gheu-eu lof-aer durni, Nymrgawq yawdoer tsawrhaq khawf, Yufzar-anr povlav parpar-aer ga-eu mae.

¹⁵ Nymrgawq yawdoer tsawrhaq-aq, Yawqha-euq aqlaf, hawqghawv-anr cawqanr taq-euq gar nae, Yawqha-euq khaqmae-anr dawvluv-eu laer cawqkhof-eu taef khawf, Aqyawf-anr ghaqdoer bi doerler-eu mae.

¹⁶ Nymrgawq yawdoer tsawrhaq-aq, Yawqha-euq myavnuiv nae haw ngae, Noeqdanr doe-awr aerkhof nya-eu, Tsawrhaq shif ghaq navmaqtser, ganrdzaeq le laer noeq-eu mae.

¹⁷ Yawqha-anr tiqjeq-iq maqtaf-eu gar, Aqcawq tsawrpyaer pyaer-eu gar urler-eu tsawrhaq-aq, Aqkuiq-euq naqpaf-anr tsuvtaeq-ir-eu gar dur-eu mae.

¹⁸ Miqdzaq dof-eu miqgeur biqghae-awr, Kavmyaq beuvghae-eu uqtaf, Shir-eu jeq bif-eu tsawruq-anr dur-eu tsawrhaq-aq;

¹⁹ Yawqha-euq dawqpae jawr-eu tsawrhaq-anr maershuir shuir-awr, “Naqgha-eu taef le” laer aer-eu tsawrhaq mae.

²⁰ Miqdzaq miqkawq maqanr nar-aq, miqdzaq miv-ir-eu lof-aer, Jabu jadoer-eu tsawrhaq maqjawr nar-aq, iqdaeq iqcae byov-ir-eu mae.

²¹ Khaqgheuq-euq baqda’nae miqdziv ner-awr, Miqdzaq miqkawq-euq baqda’nae, miqlmr dovlar-eu lof-aer, Dawqja lavdov-eu tsawrhaq-euq baqda’nae, iqdaeq iqcae jav-eu mae.

²² Dawqsav savkhoeq-eu tsawrhaq-euq dawq-aq, Dzarkuir dzarmyaer-anr dur-awr, Dawq khoerdeuq uqmav-euq lafkhoer nyif-ir-eu mae.

²³ Nuima doer-awr maeqluq bym-eu tsawrhaq-aq, Pyur-euq khaqlaer nae laeftaq-euq, mirtsaq-euq oeqlanq-anr dur-eu mae.

²⁴ Aqcawq-anr byae-eu tsawrhaq-aq, yawqha-euq lafkhoer anr-eu maershuir-anr, Yawqha-euq maeqluq nae daeqkaq-awr, tsawrmuiq janrgeuf-eu mae.

²⁵ Aqyawf ghawqshaq gaq-awr, ngaeq-eu gar dur-eu khawf taqjan. Aqjeq mirnae aernar-aq, aqyawf-euq nuima-euq lafkhoer, Nuidav davlar paq-aer ghae-eu shif jeq anr-eu mae.

²⁶ Aqyawf byae-eu khoer, maershuir shuir-eu jeq nae daeqkaq taq-euq khawf, Uiqler taq-awr jawr-eu tsawrhaq-euq maeqshi, Aqyawf-euq yawdoer byacaevni ya dovlar taef-a.

²⁷ Aqcawq bi ga’anr-eu laer duqkhanq khanq-eu tsawrhaq-aq, Yawqha ya ga’anr ghae-awr, Aqcawq-anr khaqlo ngawqdae-eu laer ngawq-eu tsawrhaq-aq, Yawqha jawr-eu gar povkhof lef-awr yabi povtaeq taef-a.

²⁸ Jaqmyawf myawf-eu maeqlar-aq, Aqyawf nae nyaefpyaev-euq deuq-anr byae-awr, Dawqja nya-eu khaqmae-aq, Lavcawv-eu gar mr-eu mae.