Dawqdaq 23 - Yawshawr Yaerbof Dawqma Sarjax Yawshuif Jaceuq-eu Hawr-eu Dawqdaq

Daefzir-euq Mrjeq Cankawv

¹ Nawr, nuir-awr dzaq-eu laer uvlanr-eu deuq naeq-aer, hawqjawq jawqluf ngae, Nawq-euq maeqshi jav-eu jeq-anr, Yawmuiq-aer sharnoeq sharsawx duq-awq.

² Nawr dzaq-eu gar gaq-eu tsawrhaq pyeuf nar-aq, Micaer yur-awr yawqha-euq kawqlanr-anr yurmawq taq-awq.

³ Aqyawf nae shardanr taq-euq dzarkuir deuq-anr nuikhanr taqjav. Aqjeq mirnae aernar-aq, dzarkuir khoerdeuq-aq, Maershuir shuir-eu jeq pyeufnya-eu mae.

⁴ Smrmuiq muiqlarni taef-aer mr-eu ardzaeq-aer taq laejae. Yawqha ghovshaw nya-eu jeq-euq baqda’nae, Naq paq-aer ghae ngae naq-awq.

⁵ Nawr, nawq-euq myavnuiv, Yawqngaef pyeuf-ir-eu jeq-anr hawluf-eu le laq? Aqjeq mirnae aernar-aq, pyurshuir myawqganq-aq, Yawqha yawqha aqdanr tsoflar-awr, Khaqdzer lof-aer mq paw zawbyovghae nya-eu mae.

⁶ Tsawrtsir-euq hawqje-anr, dzaq-eu laer hawqjawq taqjawq. Aqyawf nae shardanr taq-euq dzarkuir-anr nuikhanr taqjav.

⁷ Aqjeq mirnae aernar-aq, Tsawrhaqzaq-aq, yawqha-euq nuima-euq lafkhoer noeq-eu lof-aer pyeuf-eu mae. Aqyawf, nawq-anr, “Dzaq-awr dawr-awq!” laer aer-eu khawf, Aqyawf-euq nuima-aq, nawq naeq-aer maqjav-a.

⁸ Nawq nae dzar uicuiv dzaqanr taq-euq khoer, uqpaef ya paefdzae-awr, Nawq nae aqyawf-anr japoeq-euq dawq, Yawfngaef pyeuf-ir taef-a.

⁹ Aqdzawq argan gaqnya-eu gar, dawq taqngaeq. Aqjeq mirnae aernar-aq, Aqyawf, nawq-euq dawq-euq zaqsiq tsawrganr-anr hawdoer nya-eu mae.

¹⁰ Arhuba nae tsaqtsov taq-euq, mirkaq-euq lotsov taq lavjiv. Murcoeq aqnmr-euq mirtsaq-anr taq yurgeufnaeq.

¹¹ Aqjeq mirnae aernar-aq, Aqyawf maf-anr kakhof-eu ghaq-aq, Ghaq khav-awr, aqyawfmaf jawr-eu paw pyawq-awr, Nawq-anr yarkhaq jalar taef-a.

¹² Nawq-euq nuima maeqdawq tsovdawq-anr hageuf-awr, Nawq-euq naqbawr siqnya-eu tsawrganr-anr narhaq-awq.

¹³ Maq nyinaqni, zaq-anr dzawpar naeq-awq. Aqjeq mirnae aernar-aq, Nawr, aqyawf-anr darcuir nae diqnaeq nar-aq, aqyawf maqshir-ar.

¹⁴ Nawr, aqyawf-anr darcuir nae diq-eu baqda’nae, Aqyawf-euq saflar shiqbuir lanma-anr nae buq-ir taef-a.

¹⁵ Ngaq-euq zaqyo-or! Nawq-euq nuima yawganr nar-aq, Ngaq-euq nuima khawf, Aqdir laqkhaqcaer ma.

¹⁶ Nawr, nawq-euq maeqluq nae tsaq-eu jeq ngaeq ngae, Ngaq-euq nuima-euq lafkhoer keuvni, nuikhanrshir duidui nya.

¹⁷ Nawq-euq nuima iqbaxzaq-anr myavnav taqbi nav. Aerkhawf, nawq-euq tiqzir, Ya’we Miqyaer-anr guv-eu jeq-anr nuima keuv-awq.

¹⁸ Khoerlof-aer janr nar-aq, Nawr maeqhu paw yadaef-eu yawduq baw-awr, Nawq nae noeqtmq taq-euq jeq, Maqya bi deuvtsaev dzae-ar.

¹⁹ Ngaq-euq zaqyo-or! Narhaq-awr ganrlar-awq. Nawq-euq nuima-anr, tsaq-eu garma kanr-anr sheuqmaeq naeq-awq.

²⁰ Jirbaq dawryaef-eu deuq hawr-eu, Shaqjir dzaqbov bov-eu deuq naeq-aer taq keuqler.

²¹ Aqjeq mirnae aernar-aq, Dzaqyaef dawryaef-eu deuq hawr-eu, Dzaqdaev dawrdaev-eu maqbaw-eu deuq-aq, irshaq yashaq-ir-awr, Yuf-eu gar gaq-awr, yufnoeq maqbeurni taef-aer ghae nar-aq, Saqpar parcaer yadm taef-a.

²² Nawq-anr bi daefle-euq nawqda-anr narhaq-awr, Nawqma mawq-ir ngae, aqyawf-anr taq hawdoer.

²³ Yawtsaq yawdawr jeq zeur-awr taq anqdzae, Zaqsiq tsawrganr, maeqdawq tsovdawq hawr-eu ghovshaw nya-eu jeq khawf zeur-awq.

²⁴ Tsaq-awr dawr-eu tsawrhaq-euq aqda-aq, laqkhaq yacaer-awr, Tsawrganr anr-eu zaq-anr bi daefle-euq tsawrhaq-aq, Aqyawf-euq baqda’nae yalur ya caergha taef-a.

²⁵ Nawqda hawr-eu nawqma-anr, laqkhaq bicaer-awq, Nawq-anr baw-euq aqma-anr laqkhaq bicaer duidui-awq.

²⁶ Ngaq-euq zaqyo-or! Nawq-euq nuima, ngaq-anr bifnaeq laf-awr, Nawq-euq myavnuiv, ngaq-euq garma-anr hawtsov taq-awq.

²⁷ Aqjeq mirnae aernar-aq, Mawrdo anq-eu tsawrhaq-aq, naf-eu duqkhanq-anr dur-awr, Cirpir-aq, landuq yawsuf-anr dur-eu mae.

²⁸ Aqyawfmaf shaqlof lof-awr, Zaqyo aqli deuq-euq ghanrcae, yawbanq yawlaeq mr-eu tsawrhaq bi myaqlar-eu mae.

²⁹ Ghawqshaq-aer ghaesaef-eu aqsur ghaq la? Nuima cawvsaef-eu aqsur ghaq la? Aqcawq-anr caecawq shar-eu aqsur ghaq la? Dawqghof dov-eu aqsur ghaq la? Gardanr maqtsoeq-eu gar marnar baw-eu aqsur ghaq la? Myavnuiv nerkanni ghae-eu aqsur ghaq la?

³⁰ Khoer-aq, jirbaq kharjav-eu gar nuirtsov taq-euq tsawrhaq hawr-eu, Jirbaq jirkeuq povdawr-eu tsawrhaq mae.

³¹ Nertseuvni ghae-awr, khmqmaq-anr kharanr ngae, narguir guirlar guirlar-aer jav-eu uqtaf, Dawranrmuiq duidui-eu jirbaq-anr taqhaw.

³² Arsaq saqlar ngae-aq, arlawr lof-aer tovlar-awr, Dof khav-eu arlawr-euq dof lof-aer dur-eu mae.

³³ Nawq-euq myavnuiv-anr kharngeur-eu jeq mawrlar-awr, Nawq-euq nuima-anr nae, Birpyawv-aer ghae-eu jeq ngaeqdov laf-eu mae.

³⁴ Nawr, iqmalavshav-euq ghanrcae, Gayuf taq-awr buluf-eu tsawrhaq tiq ghaq lof-aer dur-awr, Lawq-euq lafkhoer, saqpar gheutaw-eu khawrzeur-euq uqdu yufluf-eu gar dur taef-a.

³⁵ Nawr aer-eu, “Aqyawfmaf, ngaq-anr diq-euq khawf ngaq-anr maq narlar-a. Aqyawfmaf, ngaq-anr khov-euq khawf, ngaq-anr maq siqlar nya. Aqjeq mirnae ngaq-anr maq noeqganr lar-eu nya heu? Ngar, parya povdawr-ir nya siq.”