Dawqdaq 2 - Yawshawr Yaerbof Dawqma Sarjax Yawshuif Jaceuq-eu Hawr-eu Dawqdaq

Zaqsiq Tsawrganr-euq Guiqlanq

¹ Ngaq-euq zaqyo-or! Nawr, ngaq-euq dawq hageuf-awr, Ngaq-euq khaerdawq nawq-euq lafkhoer jeqhmq taq-eu uqtaf,

² Nawr, zaqsiq tsawrganr-anr nawq-euq naqbawr ciqkhmr taq-awr, Ghovshaw nya’ni nawq-euq nuima pantaq nar-aq,

³ Euq, nawr tserpav birpav nya-eu jeq-anr gurgur-aer pov-awr, Tersar lavkhav-awr ghovshaw nya-eu jeq-anr shar-eu uqtaf,

⁴ Nawr, aqyawf-anr pyur pov-eu lof-aer pov-awr, Zaftaq-euq pyurshuir myawqganq-anr pov-eu lof-aer pov nar-aq,

⁵ Arsaq saqlar ngae, nawr, Ya’we Miqyaer-anr guv-eu jeq-anr ghovshawnya lar-awr, Miqyaer-euq siqnya-eu tsawrganr-anr povmawr taef-a.

⁶ Aqjeq mirnae aernar-aq, Ya’we Miqyaer-aq, zaqsiq tsawrganr bif-awr, Aqyawf-euq khaqmae-anr nae siqnya-eu tsawrganr hawr-eu ghovshaw nya-eu jeq dovle-eu mae.

⁷ Aqyawf, dawrcoeni daef-eu tsawrhaq-euq gharduq, Tsaq-awr tsanr-eu zaqsiq tsawrganr jeqhmq taq-awr; Aqyawf-aq, aerkhar maqza’ni daef-eu tsawrhaq deuq-euq gharduq, daeqdaqduq pyeuf-eu mae.

⁸ Aqyawf, tsaq-awr dawr-eu cankawv-anr lofpir-awr, Aqyawf-euq tsawrshawr deuq-euq garma-anr hawpir-eu mae.

⁹ Khoernar-aq, tsaq-awr dawr-eu jeq, dawrcoeni dar-eu jeq, didaeqni janr-eu jeq, Hawr-eu muiq-eu cankawv yawqkanr navluf-anr nawr ghovshaw nyalar taef-a.

¹⁰ Zaqsiq tsawrganr, nawq-euq nuima-euq lafkhoer anrle-awr, Siqnya-eu tsawrganr, nawq-euq nuima saflar nuikhanr shir-eu jeq pyeuflar ngae,

¹¹ Noeqdanr doe-eu jeq, nawq-anr hawpir-awr, Ghovshaw nya-eu jeq, nawq-anr hawlanr naeqlaf taef-a.

¹² Nawq-anr tsawrdoer-euq garma-anr nae bibuq-ir naeqlaf-awr, Lavpyawv-awr ngaeq-eu deuq-anr nae bidzeur-ir naeqlaf taef-a.

¹³ Yawzanr-euq garma-anr can-ir-eu gharduq, Dawrcoeni daef-eu cankawv-anr byaerdzae-eu mae.

¹⁴ Aqyawfmaf yawdoer jeq mr-eu gar lurgha caergha-awr, Yurpyawv-euq yawcawv jeq-anr laqkhaq caer-eu mae.

¹⁵ Aqyawf maf-euq garma-aq, garngof ngof-awr; Aqyawf maf-euq cankawv-aq, jaqmyawf maershuir-euq cankawv mae.

¹⁶ Banq-awr joe-eu zaqmiq aqbur-anr nae nawq-anr bibuq-ir naeqlaf-awr, Aqyawf-euq dawq nae jaceuq lar-awr, murjur jurlar-eu jeq-anr nae bidzeur-ir naeqlaf taef-a.

¹⁷ Aqyawf miqdaf daf ngae yur-euq cawq-anr byaer-awr, Aqyawf-euq Miqyaer-euq dawqma sarjax-anr ngaer-euq mae.

¹⁸ Aqjeq mirnae aernar-aq, Aqyawf-euq nymr-aq, shir-eu gar keuvni sheuqka ghae-awr, Aqyawf-euq cankawv-aq, shir-euq tsawrhaq jawr-eu gar sheuqghae-eu mae.

¹⁹ Aqyawf jawr-eu gar ir-euq deuq tiqghaq-iq maq ghofdov lar-aer, Tiqghaq-iq ghoflar-awr daef-eu cankawv-anr maq canlar-a.

²⁰ Khoermirnae, nawr, tsawrmuiq-euq garma-anr can-awr, Tsaq-awr dawr-eu tsawrhaq-euq cankawv-anr can’ghae-awq.

²¹ Aqjeq mirnae aernar-aq, Dawrcoeni daef-eu tsawrhaq-aq, mirtsaq-euq khoertav yajawr-awr, Aerkhar maqza-eu deuq khawf khoergar yajawr taef-a.

²² Aerkhawf, tsawrcawv deuq-aq, mirtsaq-anr nae yabi deuvtsaev dzae-awr, Sarjax maqzif-eu tsawrhaq-aq, khoergar nae duqpur yabi gheulaevdov taef-a.