Dawqdaq 18 - Yawshawr Yaerbof Dawqma Sarjax Yawshuif Jaceuq-eu Hawr-eu Dawqdaq

Tsawrmuiq, Tsawrdoer Beugar-eu

¹ Yawqha taef-aer yawceuv ceuv-aer jawr-eu tsawrhaq-aq, Yawqha-euq yawmawf ya’mrni pov-awr, Tsawrganr-euq lafkhoer dartsaev-euq yawqjeq navluf-anr caeler-eu mae.

² Aqdzawq argan-aq, ghovshaw nya-eu jeq-anr laqkhaq maqcaer-a. Aerkhawf, yawqha-euq nuima bimawr-eu gar taef-aer laqkhaq caer-eu mae.

³ Yawcawv jeq oe ngae, hawdoer-eu jeq khawf oe-awr, Daqga-eu jeq naeq-aer bi shafdawr-ir-eu jeq oe-eu mae.

⁴ Tsawrhaq-euq khaqmae-anr nae dovle-euq dawq-aq, Ircuf tmqnaf-anr dur-awr, Zaqsiq tsawrganr-euq cuq-aq, Yoerluf-eu ircuf lawrgawv-anr dur-eu mae.

⁵ Zaqhuiq zaqnyir tser-awr tsawrcawv paw pyawq-eu-aq maqmuiq-a. Tsaq-awr dawr-eu tsawrhaq-anr gheucoqni dar-eu khawf maqmuiq-a.

⁶ Aqdzawq argan-euq maeqluq-aq, Iqdaeq iqcae bi dovlar-awr, Aqyawf-euq khaqmae-aq, Darcuir nae bidiq-eu laer kur-eu mae.

⁷ Aqdzawq argan-aq, yawqha-euq khaqmae nae yabi lavcawv-awr, Aqyawf-euq maeqluq-aq, yawqha-euq nuima saflar-anr, khmrpaf-eu lanrju pyeuf-eu mae.

⁸ Dawqsav savkhoeq-eu tsawrhaq-euq dawq-aq, Dzarkuir dzarmyaer-anr dur-awr, Dawq khoerdeuq uqmav-euq lafkhoer nyif-ir-eu mae.

⁹ Yawqha ya’mr-eu jeq maq mrnanr-eu tsawrhaq-aq, Lavcawv-eu tsawrhaq naeq-aer maernmr pyeuf-eu mae.

¹⁰ Ya’we Miqyaer-euq tsawrmyanr-aq, Zifdanni ghae-eu lofpir-eu nymrgor pyeuf-awr, Tsaq-awr dawr-eu tsawrhaq deuq caevzafler ngae, Yabuq-ir-eu mae.

¹¹ Smrmuiq aqda-euq pyurshuir myawqganq-aq, Yawqha-euq gharduq zifdanni ghae-eu meuq-anr dur-awr, Gorca’ni ghae-eu meuqlanr-anr dur-eu ma laer noeq-eu mae.

¹² Nuima huiq-eu tsawrhaq-euq maeqnan, Lavcawv-eu jeq tae-awr, Nuinanq nuiyu-euq maeqnan, Taqhuiq taqmanr-eu jeq caw-eu mae.

¹³ Garkawv maqgaq-euq minav-aer aerkhof-eu tsawrhaq-aq, Daqgalar paq-aer ghae-eu, aqdzawq argan-anr dur-eu mae.

¹⁴ Tsawrhaq-euq saflar-aq, nargawr-anr daqcoer-eu mae. Aerkhawf, nuima saflar pav-ir-euq nar-aq, Aqsur ghaq kamqcoer nmr-mq?

¹⁵ Ghovshaw nya-eu tsawrhaq-euq nuima-aq, Siqnya-eu tsawrganr za-awr, Tsawrganr anr-eu tsawrhaq-euq naqbawr-aq, Siqnya-eu tsawrganr-anr pov-eu mae.

¹⁶ Lafnmf nmf-eu jeq-aq, lafnmf nmf-eu ghaq-anr garma pannaeq-awr, Yawhuiq yawmanr tsawrhaq-euq maeqshi, sheuqghaelef nya-eu mae.

¹⁷ Yawqha-euq dawqpae jawr-eu tsawrhaq lar-awr nae maq tsermr haw-euq khoerkeuv ni-aq, Yawbae yawqha-euq garkawv aerdov-euq khoerghaq, tsaq-eu gar dur-eu mae.

¹⁸ Shaevtsaq tsaq-eu jeq-aq, iqdaeq iqcae-anr lavbyov-awr, Ghaq khav-eu tsawrhaq deuq-euq yawkaq jav-eu garkawv, Lavtsaqgeuf nya-eu mae.

¹⁹ Maernmr tiq ghaq tov-ir-euq gar, Nuima bi muiqkhof lar-eu-aq, Zifdanni ghae-eu meuq-anr, Deuvdzaq-eu navmaqtser shaq-awr, Maernmr yawkaq caedzaq-eu jeq-aq, Sanqpaq-euq nymr-euq larghov ghovkaf-anr dur-eu mae.

²⁰ Tsawrhaq tiq ghaq, yawqha-euq khaqmae-euq arsiq-euq baqda’nae uqmav byan-awr, Yawqha-euq maeqluq-anr nae zalar-euq jeq-euq baqda’nae daev taef-a.

²¹ Maeqlar-aq, toeqshir toeqdaef-eu baoq anr-eu mae. Maeqlar-euq baoq-anr gaq-eu tsawrhaq-aq, Baoq khoer-euq arsiq yadzaq-eu mae.

²² Miqzaq povmawr-euq tsawrhaq-aq, Yawmuiq jeq povmawr-awr, Ya’we Miqyaer ghoer mr-eu jeq za-euq mae.

²³ Irshaqzaq dawqnanq zmq-awr shar-eu khawf, Smrmuiqzaq dawqkhav ngaeq-awr aerkhof-eu mae.

²⁴ Tsawrhaq tiq ghaq, cawq ghawqmya’ni jawr-eu khawf, cawv-ir nya-eu mae. Aerkhawf, maernmr navmaqtser dawqpae taeqni jawr-eu cawq jawr-eu mae.