Dawqdaq 17 - Yawshawr Yaerbof Dawqma Sarjax Yawshuif Jaceuq-eu Hawr-eu Dawqdaq

Tsawrmuiq, Tsawrdoer Beugar-eu

¹ Hawqbyawr lawr-awr yawbui myaq-eu lafkhoer, iqdaeq iqcae jav-eu nymr-anr jawr-eu navmaqtser, Ciqcurni ghae-eu nymr-anr jawr-awr dzarkov dzaq-eu-aq, muiqdzaeq-eu mae.

² Tsawrganr anr-eu kuirlaf zaqkhav-aq, Daqga-eu jeq mr-eu zaqyo-anr ya uvlanr-awr, Maernmr deuq naeq-aer jeqbir of-eu mae.

³ Pyur shawr-eu oeqlanq nae pyur shawr-awr, Shuir shawr-eu miqdzaq tsawqbym nae shuir shawr-eu lof-aer, Ya’we Miqyaer, tsawrhaqzaq-euq nuima-anr tsermr-eu mae.

⁴ Yawdoer jeq mr-eu tsawrhaq-aq, Tsawrcawv-euq maeqluq-anr narhaq-awr, Jaqmyawf myawf-eu tsawrhaq-aq, Coeqler-eu jeq mrmawf-eu tsawrhaq-euq maeqlar-anr yawkhav-aer narhaq-eu mae.

⁵ Irshaqzaq-anr aqjaf jafdoer-eu tsawrhaq-aq, Yawqha-anr bae-euq ghaq-anr hawdoer-eu jeq pyeuf-awr, Aqcawq shaqzanq daq-eu gar laqkhaq caer-eu tsawrhaq-aq, Dar-eu jeq-anr nae maqdzeur-ir nya-ar.

⁶ Oeqpaq oeqma-aq, tsawrmawq-euq shuir uqkhov pyeuf-awr, Zaqdeuq-euq khanqsaer-aq, yawqha-euq aqda mae.

⁷ Zawr muiq-eu dawqngaeq dawqtmr-aq, Aqdzawq argan-anr maqgeux-eu lof-aer, Jaqmyawf myawf-eu maeqluq ngeurdzaeq, Dzoeqda-anr tiqpawf-iq maqgeux-a.

⁸ Lafnmf nmf-eu ghaq-euq myavnuiv-anr, lafnmf nmf-eu jeq-aq, Poeq-eu khaqlo saer pyeuf-awr, Khar ciqpyawr-eu paw myaqlar sanrlar-eu mae.

⁹ Yawbanq yawlaeq-anr daeqkaq-eu tsawrhaq-aq, Gaq-eu jeq pov-eu mae. Aerkhawf, gardzaq ngaeqpov-eu tsawrhaq-aq, Cawqdeuq lavghawq-eu mae.

¹⁰ Aqdzawq argan-anr tiq yar laf diq-eu navmaqtser, Ghovshaw nya-eu tsawrhaq-anr, maeqnaeq-eu dawq ngaeq-eu-aq, Gardanr tsoeqler dzaeq-eu mae.

¹¹ Tsawrdoer-aq, puiq-eu laer taef-aer pov-eu mirnae, Ghawqshaq maq gaqnya-eu ghaqzaq ghaqkhaer, aqyawf-anr deuvni, Aqyawf jawr-eu gar khaerghaelef taef-a.

¹² Zaq binyaef-euq khaqhmr aqma-anr tanqpuq-ir-eu-aq, Aqdzawq argan tiq ghaq, yawdzawq yawgan jeq mrmr-aer jawr-eu gar tanqpuq-ir-eu navmaqtser ghaqdzaeq-eu mae.

¹³ Yawmuiq jeq-anr, yawdoer jeq khar janrkhof naeq-eu tsawrhaq-aq, Aqyawf-euq nymr-anr nae yawdoer jeq byov-ir-eu maqbaw-ar.

¹⁴ Iqdaeq iqcae ardanq bae-eu-aq, irtsanr tanqpav-eu gar dur-eu mirnae, Dawqpyaer pyaer-eu ardanq maqbae lar-euq minav-aer lavnaq-eu tsaq mae.

¹⁵ Tsawrcawv deuq-anr mrshawr naeq-awr, Tsaq-awr dawr-eu deuq-anr darnaeq-eu, Heu nyiq jeqluf mr-eu tsawrhaq-anr, Ya’we Miqyaer nuidav dav-eu mae.

¹⁶ Aqdzawq argan tiq ghaq, aqyawf-euq aqlaf-euq lafkhoer, Zaqsiq tsawrganr-euq arpoeq bif-eu jeq anr-eu khawf, Geufmawf-eu nuima maqanr nar-aq, Aqjeq gardanr tsoeq-eu la?

¹⁷ Cawq-aq, yawqjawr navluf gaq-awr, Maernmr-aq, shaqzanq cawpi-eu gharduq daefle-euq mae.

¹⁸ Ghovshaw nya-eu jeq maqanr-eu tsawrhaq-aq, Lafma daeq-awr dawqpae jawr-eu tsawrhaq-euq maeqshi kamq-eu mae.

¹⁹ Yawbanq yawlaeq jeq-anr gaq-eu tsawrhaq-aq, Iqdaeq iqcae-anr gaq-awr, Yawqha-euq lanrkhaeq ciqgor-eu ghaq-aq, Cawv-ir-eu jeq povluf-eu mae.

²⁰ Jaqmyawf maershuir nuima anr-eu tsawrhaq-aq, Yawmuiq jeq maq povmawr nya-aer, Maeqlar birpyawv-aer tsof-eu tsawrhaq-aq, Yawdoer jeq-euq lafkhoer ya ga’anrghae taef-a.

²¹ Aqdzawq argan gan-eu zaq jawr-eu tsawrhaq-aq, nuima yacawv-awr, Dawrga-euq aqda-aq, laqkhaq maqya caerhaw-ar.

²² Nuima laqkhaq caer-eu jeq-aq, javghaq lof-aer muiq-eu mae. Aerkhawf, nuima saflar pav-ir-euq nar-aq, shaqyoeq gui-ir-eu mae.

²³ Tsawrcawv-aq, barzaf-anr lafnmf nmflar-eu gar yur-awr, Dawr-awr tsaq-eu garma-anr yurpyawv-eu mae.

²⁴ Ghovshaw nya-eu jeq anr-eu tsawrhaq-euq maeqshi, Zaqsiq tsawrganr jav-eu mae. Aerkhawf, aqdzawq argan-euq myavnuiv-aq, Mqdzer mirdzer-anr haw-eu mae.

²⁵ Aqdzawq argan gan-eu zaqyo jawr-eu aqda-aq, nuima yacawv-awr, Aqyawf-anr baw-euq aqma-aq, nuima ya’nar-eu mae.

²⁶ Tsaq-awr dawr-eu tsawrhaq-anr guirof tif-eu-aq maqmuiq-a. Khoerlof-aer durni, dzoeqda deuq dawrcoeni ghae-eu baqda’nae, Aqyawf maf-anr diq-eu khawf maqmuiq-a.

²⁷ Siqnya-eu tsawrganr anr-eu tsawrhaq-aq, Dawq kharngeur-eu maqngaeq-aer, Ghovshaw nya-eu tsawrhaq-aq, saflar sarlaevni jav-eu mae.

²⁸ Aqdzawq argan pyeuf-eu khawf, ciqcurni jawrnya nar-aq, Tsawrganr anr-eu laer sawx-awr, Maeqluq piqtaeq-awr jawrnya nar-aq, Ghovshaw nya-eu tsawrhaq laer sawx-eu mae.