Dawqdaq 16 - Yawshawr Yaerbof Dawqma Sarjax Yawshuif Jaceuq-eu Hawr-eu Dawqdaq

Tsawrmuiq, Tsawrdoer Beugar-eu

¹ Bawqtov-aq, tsawrhaq-euq nuima-anr of-eu khawf, Maeqlar-anr aerkhof-eu jeq-aq, Ya’we Miqyaer-anr nae oe-eu mae.

² Tsawrhaqzaq-euq garma dawqtawvluf, Yawqha-euq myavnuiv haw ngae yawshawr mae. Aerkhawf, Ya’we Miqyaer-aq, nuima-anr savhaw-eu mae.

³ Nawr mr-eu gardeuq Ya’we Miqyaer-anr a’naeq-awq, Nawq-euq arpyar pyeufler taef-a.

⁴ Ya’we Miqyaer, yawqjeq navluf bae ngae, Tiqjeqpaq-euq gharduq baetaq-euq mae. Tsawrcawv khawf, gardzaq garkawv-euq arnan-euq gharduq bae-euq mae.

⁵ Ya’we Miqyaer, nuima-euq lafkhoer nuima huiq-eu jeq anr-eu tsawrhaq yawqghaq navluf-anr nuidav dav-awr, Yawduq bawni darnaeq-eu jeq-anr, maqya daq-aer maqya dzeur-ir-ar.

⁶ Ghawqshaq gaq-eu jeq hawr-eu yawtsaq yawdawr jeq-euq baqda’nae, Yawbanq yawlaeq-euq gharduq lawrdan-awr, Tsawrhaq tiq ghaq, Ya’we Miqyaer-anr guv-eu jeq-euq baqda’nae, Yawcawv jeq-anr garjaw jawnya-eu mae.

⁷ Ya’we Miqyaer, tsawrhaq tiq ghaq-euq garma-anr nuikhanrshir nar-aq, Aqyawf-anr muir-eu deuq khawf, Aqyawf-anr tsaqler dzoerlerni janrnaeq-eu mae.

⁸ Maqtsaq maqdawr-eu lafkhoer pyurshuir ghawqmya’ni za-eu navmaqtser, Tsaq-awr dawr-eu lafkhoer, pyurshuir uicuiv taef-aer za-eu-aq, muiqdzaeq-eu mae.

⁹ Tsawrhaqzaq-euq nuima-aq, Yawqha-euq garma-euq gharduq, bawqtov tov-eu mae. Aerkhawf, Ya’we Miqyaer-aq, Aqyawf-euq kuirtof ciqtsaq naeq-eu ghaq pyeuf-eu mae.

¹⁰ Sanqpaq-euq maeqluq aertsaev-eu dawq ngaeq-eu mae. Aqyawf-euq khaqmae yarkhaqdar ngae, yawbanq yawlaeq maqanr-a.

¹¹ Tsaq-eu pavyawq hawr-eu darsav-aq, Ya’we Miqyaer-euq pyeuf-awr, Paertanr-euq lafkhoer anr-eu darsav losiq dawqtawvluf, Aqyawf nae mr-euq gar mae.

¹² Sanqpaq deuq-aq, yawcawv jeq mr-eu gar nuidav dav-eu mae. Aqjeq mirnae aernar-aq, tsaq-awr dawr-eu jeq-euq baqda’nae, nuirmanq zifnya-eu mae.

¹³ Sanqpaq deuq-aq, tsaq-awr dawr-eu maeqluq-anr nuikhanr shir-awr, Yawtsaq jeq ngaeq-eu tsawrhaq-anr gaq-eu mae.

¹⁴ Sanqpaq-euq nuipaer-aq, shir-eu jeq-euq ghaqzaq ghaqkhaer pyeuf-eu mae. Aerkhawf, tsawrganr anr-eu tsawrhaq, Nuipaer khoer-anr daeqkaq nya-eu mae.

¹⁵ Sanqpaq-euq myavpyawq-anr nae, Yawshaef byadovlef ngae, daef-eu jeq anr-awr, Aqyawf-euq ghoer mr-eu jeq-aq, jawrla yamq-anr uqyaer bi yaerle-eu mqdmr-anr dur-eu mae.

¹⁶ Shuir za-eu navmaqtser, Zaqsiq tsawrganr za-eu arnavni muiqdzaeq-eu nga. Pyur za-eu navmaqtser, ghovshaw nya-eu jeq za’ni tsergeuf-eu tsaq mae.

¹⁷ Dawrcoeni ghae-eu tsawrhaq-euq garjawq jawqma-aq, Yawcawv jeq-anr garjaw jaw-eu mae. Yawqha-euq garma-anr lofpir-eu tsawrhaq-aq, Yawqha-euq daefzir-anr hawpir-eu jeq pyeuf-eu mae.

¹⁸ Nuima huiq-eu jeq-aq, cawv-ir-eu jeq-euq maeqhu canluf-awr, Janrghae-eu nuima-aq, coq-ir-eu jeq-euq maeqhu canluf-eu mae.

¹⁹ Nuima huiq-eu tsawrhaq naeq-aer yurgeuf-euq myawqganq birdzaq-eu navmaqtser, Tsawrshaqzaq naeq-aer nuinanq nuiyu anr-awr daef-eu-aq, muiqdzaeq-eu mae.

²⁰ Tsawrganr zmq-awr Yaerdawq-anr povtser-eu tsawrhaq-aq, Yawmuiq jeq ya povmawr-awr, Ya’we Miqyaer-anr ghoe-eu tsawrhaq-aq, guiqlanqhuiq taef-a.

²¹ Nuima-euq lafkhoer tsawrganr anr-eu tsawrhaq-aq, Ghovshaw nya-eu tsawrhaq laer yabi kur-awr, Yaler paq-aer ngaeq-eu-aq, Aqcawq-anr bi dzawgeuf nyadzaeq lar-eu mae.

²² Ghovshaw nya-eu jeq anr-eu tsawrhaq-euq gharduq, Ghovshaw nya-eu jeq-aq, daef-eu jeq bif-eu cuq pyeuf-eu mae. Aerkhawf, aqdzawq argan deuq-euq maeqdawq tsovdawq-aq, yawdzawq yawgan mae.

²³ Tsawrganr anr-eu tsawrhaq-euq nuima-aq, Aqyawf-anr noeqdanr doe-awr bingaeq-eu mirnae, Aqyawf-euq maeqluq-anr bi maeqnya dzaeqlar-eu mae.

²⁴ Ghawqshaq gaq-eu dawq-aq, Byaqyav-euq lafkhoer danq-eu byaquir lof-aer dur-awr, Nuima saflar-anr coerovni bi ghaelar-awr, Shaqyoeq-anr jawrsar bi dovlar-eu mae.

²⁵ Tsawrhaqzaq-euq gharduq tsaq-eu gar dur-eu garma tiq kanr jav-eu mae. Aerkhawf, arsaqsaq ngae, shir-eu gar saqler-eu garma mae.

²⁶ Myawqkhav laejae-awr mr-eu tsawrhaq-aq, Yawqha-euq gharduq mr-eu mae. Aqjeq mirnae aernar-aq, maef-eu khaqmae khaer-eu mirnae, Aqyawf ya’mr-eu mae.

²⁷ Gardanr maqtsoeq-eu tsawrhaq-aq, Yawdoer jeq duqdov laf-awr, Aqyawf-euq maeqluq-euq khoertav, Miqdzaq puivluf-eu gar dur-eu mae.

²⁸ Birpyawv-aer ghae-eu tsawrhaq-aq, Iqdaeq iqcae pyaeqkhawq-awr, Khoeqsav-eu tsawrhaq-aq, ghoercawq lavghawq-eu mae.

²⁹ Coeqler civlerni mr-eu tsawrhaq-aq, Yawqha-euq dawqpae jawr-eu tsawrhaq-anr maershuir shuirtawv-awr, Maqmuiq-eu garma-anr sheuqghae-eu mae.

³⁰ Myavnuiv khovtaev myawvmyawv-aer taev-eu tsawrhaq-aq, Birpyawv-aer ghae-eu jeq tovluf-awr, Maeqluq mrcuf-eu tsawrhaq-aq, Yawdoer jeq mrdov laf-eu laer ghaeluf-eu mae.

³¹ Tsaq-awr dawr-eu garma-anr povza-euq ngeur nar-aq, Uqduq tsaerkanr yawpyur-aq, Yawshaef khanqsaer-euq shuir uqkhov mae.

³² Nuima paer-eu maqkawr-eu tsawrhaq-aq, Ghaq khav-eu navmaqtser muiqdzaeq-awr, Meuq tiq meuq deuvdzaq-eu navmaqtser, Yawqha-euq nuima-anr uvlanr nya-eu-aq, muiqdzaeq-eu mae.

³³ Shaevtsaq tsaq-eu jeq, bawkhanr-anr shaevdav taq-euq khawf, Yawqjeq navluf dartsaev-eu ghaq-aq, Ya’we Miqyaer mae.