Dawqdaq 15 - Yawshawr Yaerbof Dawqma Sarjax Yawshuif Jaceuq-eu Hawr-eu Dawqdaq

Tsawrmuiq, Tsawrdoer Beugar-eu

¹ Dawq yawnanq nanq-aer ngaeqkhof-eu-aq, Nuima dav-eu jeq bibyov-ir-eu mae. Aerkhawf, dawqkhav ngaeq-eu-aq, Nuima paer-eu jeq-anr lavnyaev-eu mae.

² Tsawrganr-euq maeqlar-aq, Siqnya-eu tsawrganr yawmuiq-aer zmq-eu mae. Aqdzawq argan deuq-euq khaqmae-aq, Yawdzawq yawgan jeq yoerdov lef-eu mae.

³ Ya’we Miqyaer-euq myavnuiv yawqgar navluf jav-awr, Tsawrmuiq-anr khawf, tsawrdoer-anr khawf hawluf-eu mae.

⁴ Lavsav nya-eu maeqlar-aq, daef-eu jeq bif-eu arbawr mae. Aerkhawf, maeqlar-euq lafkhoer anr-eu birpyawv-aer ghae-eu jeq, Saflar-anr lavcawv-eu mae.

⁵ Aqdzawq argan-aq, yawqha-euq aqda maeqpar tsovpar lar-eu gar hawdoer-eu mae. Aerkhawf, maeqpar naeq-eu gar narhaq-eu ghaq-aq, Noeqsiq noeqmawr nya-eu tsawrhaq mae.

⁶ Tsaq-awr dawr-eu tsawrhaq-euq nymr-euq lafkhoer, Pyurshuir myawqganq ghawqmya’ni jav-eu mae. Aerkhawf, tsawrcawv-euq zakhaeq-anr shaq-eu jeq keuvle taef-a.

⁷ Tsawrganr-euq maeqluq-aq, siqnya-eu tsawrganr khawq-eu khawf, Aqdzawq argan-euq nuima-aq, khoerlof-aer maqghae-a.

⁸ Ya’we Miqyaer, tsawrcawv nae lawr-euq jeq-anr nuidav dav-eu mae. Aerkhawf, dawrcoeni ghae-eu tsawrhaq-euq guiqlanq shardawq-anr, aqyawf nuima tsaq-eu mae.

⁹ Ya’we Miqyaer, tsawrcawv-euq garma-anr nuidav dav-eu mae. Aerkhawf, aqyawf, tsaq-awr dawr-eu jeq-anr cantae-eu tsawrhaq-anr gaq-eu mae.

¹⁰ Garma khoer-anr byaerdzae-euq tsawrhaq-aq, Yawkhav-aer dzawpar-eu jeq-anr yadaq-awr, Maeqpar-eu gar byae-eu tsawrhaq-aq yashir taef-a.

¹¹ Shir-eu mirkhanq hawr-eu cawv-ir-eu mirkhanq khawf, Ya’we Miqyaer-euq maeqshi byacaevni javluf-eu-aq, Tsawrhaqzaq-euq nuima ngeurdzaeq aqjox-aer javzaf nya-eu?

¹² Aqjaf jaf-eu tsawrhaq-aq, maeqpar lar-eu gar maqgaq-a. Aqyawf, tsawrganr anr-eu tsawrhaq jawr-eu gar maqir-a.

¹³ Laqkhaq caer-eu nuima-aq, myavpyawq bi byalar-eu mae. Aerkhawf, ghawqshaq-aer ghae-eu nuima-aq, saflar-anr nyaefpyaev-eu mae.

¹⁴ Ghovshaw nya-eu jeq anr-eu tsawrhaq-euq nuima-aq, Siqnya-eu tsawrganr pov-eu mae. Aerkhawf, aqdzawq argan-euq khaqmae-aq, Yawdzawq yawgan jeq dzaq-eu mae.

¹⁵ Shaqzanq naf-eu tsawrhaq-euq gharduq, Yawqnan navluf yawdoer mae. Aerkhawf, nuima laqkhaq caer-eu tsawrhaq-aq, Maq tsaevlerni yawbui builuf-eu mae.

¹⁶ Pyurshuir myawqganq ghawqmya’ni jav-awr, shaq-eu jeq cantae-eu navmaqtser, Ya’we Miqyaer-anr guv-awr uicuiv taef-aer jav-eu-aq, muiqdzaeq-eu mae.

¹⁷ Byae-eu tsawrhaq naeq-aer mawrner yawlov saefdzaq-eu navmaqtser, Gaq-eu tsawrhaq naeq-aer ghawqnyoer dzaq-eu-aq, muiqdzaeq-eu mae.

¹⁸ Nuima zawr suq-eu tsawrhaq-aq, iqdaeq iqcae lavdov-eu mae. Aerkhawf, nuima paer-eu maqkawr-eu tsawrhaq-aq, caedzaq-eu jeq lavbyov-eu mae.

¹⁹ Nymrgawq yawdoer-euq garma-anr aqgan bawduv-euq yarkmr lof-aer daefbyan taq-euq mae. Aerkhawf, dawrcoeni ghae-eu tsawrhaq-euq cankawv-aq, sarlaevni ghae-eu garjawq jawqma pyeuf-eu mae.

²⁰ Tsawrganr anr-eu zaqyo-aq, Aqda-anr laqkhaq bi caerlar-eu mae. Aerkhawf, aqdzawq argan gan-eu tsawrhaq-aq, Yawqha-euq aqma-anr hawdoer-eu mae.

²¹ Tsawrganr maqanr-eu tsawrhaq-aq, Yawdzawq yawgan jeq-anr laqkhaq caer-eu mae. Aerkhawf, ghovshaw nya-eu tsawrhaq-aq, Garma dawrcoeni can-eu mae.

²² Maeqbawq maqjav nar-aq, bawqtov maq pyeufler nya-a. Aerkhawf, maeqbawq bif-eu tsawrhaq yawmyaq nar-aq, tov-euq lof-aer mrpyeuf nya-eu mae.

²³ Tsaq-eu dawq aerkhof nya-eu tsawrhaq-aq, laqkhaq caer-awr, Aryamq-anr ngaeqtsaq-euq dawq, arnavni muiq-eu nga.

²⁴ Daef-eu jeq bif-eu cankawv-aq, tsawrganr anr-eu tsawrhaq-anr laftav paw sheuqdav lef-eu mae. Khoer-aq, aqyawf-anr lafov paw jav-eu shir-eu mirkhanq-anr sheuqjaw-eu gharduq mae.

²⁵ Ya’we Miqyaer, nuima huiq-eu tsawrhaq-euq nymr pyavdzae-eu mae. Aerkhawf, miqcoeq miqma-euq mirkaq lavbaw naeq-eu mae.

²⁶ Ya’we Miqyaer, tsawrcawv deuq-euq nuinoeq-anr nuidav dav-eu mae. Aerkhawf, ghawqshaq gaq-eu dawq-aq, shawrjaevni ghae-eu mae.

²⁷ Maerjuir juir-awr maqtsaq maqdawr-eu lafkhoer zalarni mr-eu tsawrhaq-aq, Yawqha-euq nymrjir lavshaq-eu mae. Aerkhawf, lafnmf nmf-eu gar byae-eu tsawrhaq-aq, yadaef-eu mae.

²⁸ Tsaq-awr dawr-eu tsawrhaq-euq nuima-aq, Aqjox-aer aerkhof-eu paq nga laer sharsawx-eu mae. Aerkhawf, tsawrdoer-euq khaqmae-anr nae, Yawcawv jeq yoerdov lef-eu mae.

²⁹ Ya’we Miqyaer, tsawrcawv deuq-anr nae garmanr kaq-eu gar jawr-eu khawf, Tsaq-awr dawr-eu tsawrhaq-euq guiqlanq shardawq-anr narhaq luf-eu mae.

³⁰ Myavnuiv-euq yawshaef, nuima-anr laqkhaq bi caerlar-awr, Yagaq-euq dawqmuiq, shaqyoeq-anr ghaq bi anrlar-eu mae.

³¹ Daef-eu jeq bif-eu maeqpar-eu dawq-anr, Narhaq nya-eu naqbawr tsof-eu tsawrhaq-aq, Tsawrganr anr-eu tsawrhaq naeq-aer yajawr taef-a.

³² Maeqdawq tsovdawq-anr hawdzeur-eu aqgeu ghaq maqkaq, Yawqhar yawqha hawdoer-eu jeq pyeuf-eu mae. Aerkhawf, maeqpar-eu gar narhaq-eu tsawrhaq-aq, Ghovshaw-eu jeq za-eu mae.

³³ Ya’we Miqyaer-anr guv-eu jeq-aq, Zaqsiq tsawrganr za-eu maeqdawq tsovdawq pyeuf-awr, Nuinanq nuiyu-euq maeqnan, Taqhuiq taqmanr-eu jeq caw-eu mae.