Dawqdaq 12 - Yawshawr Yaerbof Dawqma Sarjax Yawshuif Jaceuq-eu Hawr-eu Dawqdaq

Tsawrmuiq, Tsawrdoer Beugar-eu

¹ Maeqdawq tsovdawq-anr gaq-eu tsawrhaq-aq, Siqnya-eu tsawrganr-anr gaq-eu mae. Aerkhawf, maeqpar-eu jeq-anr byae-eu tsawrhaq-aq, Yawlaf dawrga mae.

² Tsawrmuiq-aq, Ya’we Miqyaer-euq ghoer mr-eu jeq za-eu mae. Aerkhawf, yawdoer jeq tov-eu tsawrhaq-anr-aq, aqyawf darnaeq-eu mae.

³ Tsawrhaq tiqghaq-iq yawcawv jeq-anr ghoe-awr nae maq lavzif nya-a. Aerkhawf, tsaq-awr dawr-eu tsawrhaq deuq-euq duqcir-anr, maq lavjiv nya-a.

⁴ Bym-awr nya-eu zaqmiqzaq-aq, khaqdzerzaq-euq shuir uqkhov pyeuf-eu mae. Aerkhawf, daqgalar paq-aer ghae-eu jeq mr-eu zaqmiqzaq-aq, Khaqdzerzaq-euq shaqyoeq-euq lafkhoer anr-eu yawbuf-anr dur-eu mae.

⁵ Tsaq-awr dawr-eu tsawrhaq-euq nuinoeq-aq, yawtsaq mae. Aerkhawf, tsawrcawv nae bif-euq maeqbawq-aq, Jaqmyawf maershuir mae.

⁶ Tsawrcawv deuq-euq dawq-aq, dzurzaf-awr aqcawq-euq shiq lavdov-eu mae. Aerkhawf, dawrcoeni ghae-eu tsawrhaq-euq khaqmae-aq, Aqyawf maf-anr bibuq-ir-eu mae.

⁷ Tsawrcawv deuq-aq, byav-ir-awr byov-ir jir-eu mae. Aerkhawf, tsaq-awr dawr-eu tsawrhaq-euq nymr-aq, Zifdanni javnya taef-a.

⁸ Tsawrhaqzaq-aq, yawqha zaqsiq tsawrganr anr-eu navni yabi ciqpoeq taef-a. Aerkhawf, nuima biryawf-aer ghae-eu tsawrhaq-aq, Hawdoer-eu gar yadaq taef-a.

⁹ Myavpyawq narmaer maqjav-eu khawf, Kuirlaf jawr-eu tsawrhaq tiq ghaq-aq, Yawqhar yawqha taqhuiq-eu gar nae, Hawq dzaq-eu maqjav-eu tsawrhaq navmaqtser muiqdzaeq-eu mae.

¹⁰ Tsaq-awr dawr-eu tsawrhaq-aq, Yawqha-euq jeqzaq-euq daefzir-anr noeqkeuv-eu mae. Aerkhawf, tsawrcawv-euq ghawqshaq gaq-eu khoer-aq, Coeqler deuqler-eu jeq pyeuf-eu mae.

¹¹ Yawqha-euq mirtsaq-anr mrdzaq-eu tsawrhaq-aq, Tiqdaev dzaq-eu jeq jav taef-a. Aerkhawf, gardanr maqtsoeq-eu jeq-anr cantae-eu tsawrhaq-aq, Ghovshaw nya-eu jeq maqanr-eu tsawrhaq mae.

¹² Tsawrcawv-aq, tsawrdoer deuq nae mrza laf-euq jeq-anr maerjuir juir-eu mae. Aerkhawf, tsaq-awr dawr-eu tsawrhaq-euq duqcir-aq, arsiq bi siqle-eu mae.

¹³ Tsawrdoer-aq, yawqha-euq maeqluq-euq yawbanq yawlaeq-euq lanrju-anr pafler-eu mae. Aerkhawf, tsaq-awr dawr-eu tsawrhaq-aq, Gardzaq garkawv-anr nae yadzeur-ir taef-a.

¹⁴ Tsawrhaqzaq, yawqha-euq khaqmae-euq arsiq-euq baqda’nae, Yawmuiq jeq ya dzaqdaev-awr, Yawqha-euq aqlaf nae mr-euq jeq, Yawqha jawr-eu gar ghofkhoflar taef-a.

¹⁵ Aqdzawq argan deuq-aq, yawqha-euq hawkhaeq-anr nae, Yawqha-euq garma tsaq ma laer taef-aer noeq-eu mae. Aerkhawf, tsawrganr anr-eu tsawrhaq-aq, Aqcawq maeqbawq bif-eu gar narhaq-eu mae.

¹⁶ Aqdzawq argan-euq nuipaer-aq, Tiqpov taef-aer siqlar-eu mae. Aerkhawf, noeqdanr doe-eu tsawrhaq-aq, Daqga paq-aer ghae-eu jeq-anr daeqkaq-eu mae.

¹⁷ Yawtsaq yawdawr jeq ngaeq-eu tsawrhaq-aq, Tsaq-awr dawr-eu jeq dzawr-eu mae. Aerkhawf, maqtsaq maqdawr-eu tsawrkaq-aq, Jaqmyawf maershuir shuir-eu mae.

¹⁸ Tiqghaqnav micaer tsawv-eu lof-aer, Dawqdoer ngaeq-eu mae. Aerkhawf, tsawrganr anr-eu tiq ghaq-euq maeqlar-aq, Bi taqler-eu mae.

¹⁹ Yawtsaq yawdawr dawr-aer ngaeq-eu maeqluq-aq, Li-eu maqbawni zif-eu mae. Aerkhawf, jaqmyawf myawf-eu maeqlar-aq, Tiqkhaeq gmq-eu taef mae.

²⁰ Yawdoer jeq tov-eu tsawrhaq-euq nuima-euq lafkhoer, Jaqmyawf maershuir anr-eu mae. Aerkhawf, tsaqler dzoerlerni maeqbawq bif-eu tsawrhaq deuq-aq, Laqkhaq caer-eu jeq byan-eu mae.

²¹ Tsaq-awr dawr-eu tsawrhaq-anr-aq, Ardzaeq-aer doer-eu gardzaq garkawv maq keuvle-ar. Aerkhawf, tsawrcawv-aq, yawdoer jeq tiqbyanni ya’mawr taef-a.

²² Ya’we Miqyaer, jaqmyawf myawf-eu maeqluq-anr, Nuidav dav-eu mae. Aerkhawf, sarjax zif-eu lafkhoer mr-eu deuq-anr, Aqyawf nuikhanr shir-eu mae.

²³ Noeqdanr doe-eu tsawrhaq-aq, Siqnya-eu tsawrganr zaftaq nya-eu mae. Aerkhawf, aqdzawq argan-euq nuima-aq, Yawdzawq yawgan jeq gurdov lef-eu mae.

²⁴ Yawbym tsawrhaq-euq aqlaf-aq, ya uvlanr taef-a. Aerkhawf, nymrgawq yawdoer tsawrhaq-aq, Aqcawq nae katir-euq lof-aer ya’mr taef-a.

²⁵ Tsawrhaq-euq nuima-euq lafkhoer khanqlanr-eu jeq, Yawqha-anr ghawqshaq-aer bi ghaelar-eu mae. Aerkhawf, dawqmuiq-aq, laqkhaq bi caerlar-eu mae.

²⁶ Tsaq-awr dawr-eu tsawrhaq-aq, Yawqha-euq cawq yawmuiq-aer yanryanr-aer tser-eu tsaq mae. Maqngeur nar-aq, tsawrcawv deuq, Aqyawf maf-anr garma sheuqbanq nya-eu mae.

²⁷ Nymrgawq yawdoer tsawrhaq-aq, Yawqha nae taemi-euq shaqjir maq badzaq nanr-a. Yawbym bym-eu-aq, tsawrhaq tiq ghaq-euq gharduq poeq-eu myawqganq pyeuf-eu mae.

²⁸ Tsaq-awr dawr-eu jeq-euq garma-anr daef-eu jeq jav-awr, Cankawv heukanr-euq lafkhoer shir-eu jeq maqjav-a.