Dawqdaq 11 - Yawshawr Yaerbof Dawqma Sarjax Yawshuif Jaceuq-eu Hawr-eu Dawqdaq

Tsawrmuiq, Tsawrdoer Beugar-eu

¹ Ya’we Miqyaer, maqdawr maqtsaq-eu pavyawq-anr nuidav dav-eu mae. Aerkhawf, aqyawf, dawr-awr tsaq-eu darsav losiq-anr nuikhanr shir-eu mae.

² Nuima huiq-eu maeqnan daqga-eu jeq caw-eu mae. Aerkhawf, nuima nanqyuni ghae-eu tsawrhaq naeq-aer, Zaqsiq tsawrganr jav-eu mae.

³ Dawrcoeni ghae-eu tsawrhaq deuq-euq yawmuiq yawjaq, Aqyawf maf-anr sheuqmaeq taef-a. Aerkhawf, sarjax maqzif-eu tsawrhaq deuq-aq, Yawqha nae yurpyawv-euq jeq nae yabi lavcawv taef-a.

⁴ Miqyaer nuima paer-eu arnan keuvle ngae, Pyurshuir myawqganq gardanr maqtsoeq-a. Aerkhawf, tsaq-awr dawr-eu jeq-aq, Shir-eu jeq-anr nae bibuq-ir nya-eu mae.

⁵ Iqbax taqkhar maqza-eu tsawrhaq-euq tsaq-awr dawr-eu jeq, Aqyawf-anr garma dawrcoeni bican-eu gharduq, toeqmaeqnaeq taef-a. Aerkhawf, tsawrcawv-aq, yawqha-euq yawcawv-euq baqda’nae yacoq-ir taef-a.

⁶ Dawrcoeni ghae-eu tsawrhaq deuq-euq tsaq-awr dawr-eu jeq, Aqyawf maf-anr bibuq-ir taef-a. Aerkhawf, sarjax maqzif-eu tsawrhaq deuq-aq, Yawqha-euq shiqshaq nuikhanr-anr pafler taef-a.

⁷ Tsawrcawv tiq ghaq shir ngae, Aqyawf nae noeqtmq taq-euq jeq cawv-ir-awr, Ghaq khav-awr noeqtmq-euq jeq khawf yacawv-ir taef-a.

⁸ Tsaq-awr dawr-eu tsawrhaq-aq, Gardzaq garkawv-anr nae yabuq-ir-eu khawf, Tsawrcawv-euq khoertav-aq, Gardzaq garkawv keuvle taef-a.

⁹ Miqyaer-anr maqguv-eu tsawrhaq-aq, Aqyawf-euq khaqmae nae, aqyawf-euq dawqpae jawr-eu tsawrhaq-anr lavcawv-eu mae. Aerkhawf, tsaq-awr dawr-eu tsawrhaq-aq, Siqnya-eu tsawrganr-anr ghoe-awr nae yabuq-ir taef-a.

¹⁰ Tsaq-awr dawr-eu tsawrhaq tiq ghaq daefdzaqlar ngae, Meuq meuqlan-aer laqkhaq caer-awr, Tsawrcawv deuq cawv-ir ngae, Laqkhaq caer-awr gur-eu mae.

¹¹ Dawrcoeni ghae-eu tsawrhaq-euq guiqlanq-euq baqda’nae, Meuq meuqlan-aer ciqpoeq-eu jeq za-eu mae. Aerkhawf, tsawrcawv-euq khaqmae-euq baqda’nae, Meuq khoermeuq yabyav-ir-eu mae.

¹² Zaqsiq tsawrganr maqanr-eu tsawrhaq-aq, Yawqha-euq dawqpae jawr-eu tsawrhaq-anr hawdoer-eu mae. Aerkhawf, ghovshaw nya-eu tsawrhaq-aq, ciqcurni jawr-eu mae.

¹³ Maeqboeq myaq-eu tsawrhaq-aq, Zaftaq-euq jeq jaja-aer can-eu mae. Aerkhawf, sarjax zif-eu tsawrhaq-aq, Maq japaq-aer ghae-eu jeq zaftaq nya-eu mae.

¹⁴ Aqgeugar maqkaq, maeqbawq bif-eu maqjav nar-aq, tsawrhaq coq-ir-eu mae. Aerkhawf, maeqbawq bif-eu tsawrhaq myaq nar-aq zifnya-eu mae.

¹⁵ Maqsiq maqsux-eu tsawrhaq-anr kamqnaeq-eu ghaq-aq, yashaq taef-a. Aerkhawf, kamqnaeq-eu jeq-anr byae-eu tsawrhaq-aq, khanqlanrkhar maqza-ar.

¹⁶ Ghawqshaq gaqnya-eu zaqmiq aqbur-aq, Taqhuiq-eu jeq za-awr, Zirtovni ghae-eu zaqyo aqli-aq, Pyurshuir myawqganq za’nya-eu taef mae.

¹⁷ Ghawqshaq gaqnya-eu tsawrhaq-aq, Yawqha-euq nuima saflar-anr muiq-eu jeq mr-eu mae. Aerkhawf, ghawqshaq maq gaqnya-eu tsawrhaq-aq, Yawqha-euq shiqshaq-anr coeq-eu jeq mr-eu mae.

¹⁸ Tsawrcawv-aq, jaqmyawf maershuir-euq gar mr-eu mae. Aerkhawf, tsaq-awr dawr-eu siqyoeq saeq-eu tsawrhaq-aq, Mrpoeq lafsawq za-eu yawduq baw-eu mae.

¹⁹ Tsaq-awr dawr-eu jeq-aq, daef-eu jeq jav-eu gar sheuqghae-eu mae. Aerkhawf, yawdoer jeq-anr cantae-eu tsawrhaq-aq, Yawqha yashir-eu jeq-anr cantae luf-eu mae.

²⁰ Nuima birpyawv-aer ghae-eu tsawrhaq deuq-anr, Ya’we Miqyaer nuidav dav-eu mae. Aerkhawf, Miqyaer, aerkhar maqza-eu tsawrhaq, Yawqha-euq garma-anr can-eu gar, nuikhanr shir-eu mae.

²¹ Tsawrcawv deuq-aq, darnaeq-eu jeq-anr nae, Maqdzeur-ir nya-eu yawduq baw-eu mae. Aerkhawf, tsaq-awr dawr-eu deuq-euq nanqzaq-aq, yabuq-ir taef-a.

²² Arghaer muiq-eu khawf, noeqdanr maqdoe-eu zaqmiq aqbur-aq, Aqzaf-euq narmaerbanq-anr, shuir-euq naqkhan bigeuf taq-euq gar dur-eu mae.

²³ Tsaq-awr dawr-eu tsawrhaq-aq, Yawmuiq jeq taef-aer geufmawf-eu mae. Aerkhawf, tsawrcawv nae noeqtmq taq-euq jeq-aq, Nuima paer-eu jeq-anr saqler-eu mae.

²⁴ Tsawrhaq tiqghaq nav-aq, Bifdov ghae-eu khawf, javmyaq lar-eu mae. Tiqghaq nav-aq, tsawrtsir tsir paq-aer maqghae-eu gar keuvni, Tsir-eu khawf, irshaq shaq-ir-eu mae.

²⁵ Nuima jerloni bifdov ghae-eu tsawrhaq-aq, bawle zale-awr, Aqcawq-anr ircuf shaeqnaeq-eu tsawrhaq-aq, Aqcawq, aqyawf-anr ircuf shaeqnaeq taef-a.

²⁶ Caer maqanqni jeqhmq-eu tsawrhaq-anr, aqcawq yaqkhaer yaq-awr, Caer anqnaeq-eu tsawrhaq-euq khoertav, guiqlanq keuv-eu mae.

²⁷ Nuima keuv-awr yawmuiq jeq-anr pov-eu tsawrhaq-aq, Miqyaer ghoer mr-eu jeq povmawr taef-a. Aerkhawf, yawdoer jeq-anr pov-eu tsawrhaq-anr, shaqzanq keuvle taef-a.

²⁸ Yawqha-euq pyurshuir myawqganq-anr ghoe-eu tsawrhaq-aq, yacoq-ir taef-a. Aerkhawf, tsaq-awr dawr-eu tsawrhaq-aq, maerlar luf-eu arpaf-anr dur-eu mae.

²⁹ Yawqha-euq nymrjir-anr lavshaq-eu tsawrhaq-aq, jaqlaer za-awr, Aqdzawq argan deuq-aq, nuima tsawrganr anr-eu deuq-euq kuirlaf yageuf taef-a.

³⁰ Tsaq-awr dawr-eu tsawrhaq-euq arsiq-aq, Daef-eu jeq bif-eu arbawr pyeuf-awr, Aqcawq-euq nuima saflar-anr za’nya-eu tsawrhaq-aq yawganr mae.

³¹ Hawsher-eq, tsaq-awr dawr-eu tsawrhaq deuq, Mirtsaq-euq khoertav daef ngae, Yawqha nae mr-euq jeq-euq baqda’nae yadaq nar-aq, Miqyaer-anr yawzeu maqbaw-eu tsawrcawv hawr-eu Iqbaxzaq ngeurdzaeq arnavni parya daq nmr-mq?