Dawqdaq 10 - Yawshawr Yaerbof Dawqma Sarjax Yawshuif Jaceuq-eu Hawr-eu Dawqdaq

Sorlaqmoq-euq Dawqdaq Deuq

¹ Heu-aq, Sorlaqmoq-euq dawqdaq deuq mae. Tsawrganr anr-eu zaqyo-aq, aqda-anr laqkhaq bicaer-awr, Aqdzawq argan gan-eu zaqyo-aq, aqma-euq nuima lavcawv-eu mae.

² Yawdoer jeq mr-eu lafkhoer, lavza-euq pyurshuir myawqganq-aq, Tiqjeq-iq gardanr maqtsoeq-a. Aerkhawf, tsaq-awr dawr-eu jeq-aq, Shir-eu jeq-anr nae bibuq-ir nya-eu mae.

³ Ya’we Miqyaer, tsaq-awr dawr-eu tsawrhaq-anr maef-eu gar maqbi keuv-a. Aerkhawf, tsawrcawv deuq geufmawf-eu jeq-anr taedzae-eu mae.

⁴ Nymrgawq yawdoer aqlaf tsof-eu tsawrhaq-aq, irshaq yashaq-ir-awr, Yawbym tsawrhaq-euq aqlaf-aq, smrmuiq bi muiqlar-eu mae.

⁵ Jawrla yamq-anr povuiq-eu tsawrhaq-aq, noeqdanr doe-eu zaqyo mae. Sanqlanqdar lavluiv-eu yamq-anr yuf-eu tsawrhaq-aq, daq lavga-eu zaqyo mae.

⁶ Tsaq-awr dawr-eu tsawrhaq-euq uqduq-euq khoertav guiqlanq keuv-eu mae. Aerkhawf, tsawrcawv-euq khaqmae-anr-aq, Coeqler deuqler-eu jeq mymrluf-eu mae.

⁷ Tsaq-awr dawr-eu tsawrhaq-anr noeqkeuv-eu-aq, guiqlanq huiq-eu mae. Aerkhawf, tsawrcawv-euq tsawrmyanr buf-ir taef-a.

⁸ Nuima-euq lafkhoer tsawrganr anr-eu deuq-aq, khaerdawq-anr hageuf-eu mae. Aerkhawf, khar lovlar-eu jeq ngaeq-eu aqdzawq argan-aq, yacoq-ir taef-a.

⁹ Dawrcoeni can-eu tsawrhaq-aq, zifdanni cannya taef-a. Aerkhawf, birpyawv-aer ir-euq tsawrhaq-aq, Aqyawf-euq cankawv yabi siqnya taef-a.

¹⁰ Myavnuiv myawvmyawv-aer taev-eu tsawrhaq-aq, noeqshaq-eu jeq bi dovlar-eu mae. Aerkhawf, khar lovlar-eu jeq ngaeq-eu aqdzawq argan-aq, yacoq-ir taef-a.

¹¹ Tsaq-awr dawr-eu tsawrhaq-euq khaqmae-aq, Daef-eu jeq bif-eu landuq pyeuf-eu mae. Aerkhawf, tsawrcawv-euq khaqmae-anr-aq, Coeqler deuqler-eu jeq mymrtaq-euq mae.

¹² Byae-eu jeq-aq, iqdaeq iqcae bi dovlar-eu mae. Aerkhawf, gaq-eu jeq-aq, yawbanq yawlaeq dawqtawv luf-anr daeqkaq-eu mae.

¹³ Ghovshaw nya-eu tsawrhaq-euq maeqluq-euq khoertav-aq, Zaqsiq tsawrganr povmawr nya-eu mae. Aerkhawf, ghovshaw nya-eu jeq maqanr-eu tsawrhaq-euq narkhan-aq, Darcuir of-eu mae.

¹⁴ Tsawrganr anr-eu tsawrhaq-aq, Siqnya-eu tsawrganr jeqhmq taq-eu mae. Aerkhawf, aqdzawq argan-euq khaqmae-aq, Lavcawv-eu jeq-euq dawqpae jav-eu mae.

¹⁵ Smrmuiq muiq-eu jeq-aq, smrmuiqzaq-euq gharduq zifdanni ghae-eu meuq lof-aer dur-awr, Irshaq shaq-eu jeq-aq, irshaqzaq-anr lavcawv-eu jeq pyeuf-eu mae.

¹⁶ Tsaq-awr dawr-eu tsawrhaq nae gar mr-euq khoer-aq, daef-eu jeq bi dovlar-awr, Tsawrcawv deuq nae mr-euq arpoeq-aq iqbax mae.

¹⁷ Maeqdawq tsovdawq-anr cantae-eu tsawrhaq-aq, Daef-eu garma-anr canluf-eu mae. Aerkhawf, maeqpar-eu gar maq narhaq-eu tsawrhaq-aq, Garbanq banq-ir luf-eu mae.

¹⁸ Byae-eu jeq zaftaq-euq tsawrhaq-euq maeqboeq-aq, jaqmyawf myawf-awr, Yawdoer jakhawq-eu tsawrhaq-aq, aqdzawq argan mae.

¹⁹ Dawq ngaeqmyaq-eu mirnae iqbax cuiv-ir-eu maqngeur-a. Aerkhawf, yawqha-euq maeqluq-anr lavnaq nya-eu tsawrhaq-aq, yawganr mae.

²⁰ Tsaq-awr dawr-eu tsawrhaq-euq maeqlar-aq, shawr-eu pyur pyeuf-awr, Tsawrcawv-euq nuima-aq, arpoeq uicuiv baw-eu taef mae.

²¹ Tsaq-awr dawr-eu tsawrhaq-euq maeqluq-aq, Tsawrhaq ghawqmya ni-anr bi dzaqdaev-eu mae. Aerkhawf, aqdzawq argan-aq, zaqsiq tsawrganr maqanr-eu mirnae yashir-eu mae.

²² Ya’we Miqyaer-euq guiqlanq-euq baqda’nae smrmuiq muiqlar ngae, Aqyawf, nuima cawv paq-aer ghae-eu jeq maq lanqnaeq-a.

²³ Yawdoer jeq mr-eu-aq, aqdzawq argan deuq-euq gharduq, Aqmui mui-eu jeq lof-aer pyeuf-eu mae. Aerkhawf, ghovshaw nya-eu tsawrhaq-aq, Zaqsiq tsawrganr-anr lurgha caergha-eu mae.

²⁴ Tsawrcawv deuq-euq khoertav, Yawqha guv-eu jeq keuvle-eu mae. Aerkhawf, tsaq-awr dawr-eu deuq-aq, Yawqha geufmawf-eu jeq za taef-a.

²⁵ Jaqlaer laerzeuv yawkawr-aer bawbyov ghae-eu lof-aer, Tsawrcawv deuq maqpar dzaeqlar-ar. Aerkhawf, tsaq-awr dawr-eu tsawrhaq-aq, Li-eu maqbawni dawqpaeq zif taef-a.

²⁶ Yawcaer jeq, seuq-anr seuqkmq bi kmqlar-awr, Uqkhoeq, myavnuiv-anr bi pirlar-eu lof-aer, Nymrgawq yawdoer tsawrhaq khawf, Yawqha-anr khaer-eu ghaq-anr khoerlof-aer bi pyeufler-eu mae.

²⁷ Ya’we Miqyaer-anr guv-eu jeq-aq, Zirlanq lanq-eu jeq pyeuf-eu mae. Aerkhawf, tsawrcawv deuq-euq arkhof arla-aq, Yabi lavnymr taef-a.

²⁸ Tsaq-awr dawr-eu tsawrhaq nae noeqtmq-euq jeq-aq, laqkhaq caer-eu jeq keuvle-awr, Tsawrcawv nae noeqtmq taq-euq jeq-aq, yacawv-ir taef-a.

²⁹ Ya’we Miqyaer-euq garma-aq, Dawrcoeni ghae-eu tsawrhaq deuq-euq gharduq ghaq pyeuf-awr, Yawlaeq yawca jeq mr-eu deuq-anr, lavcawv-eu jeq pyeuf-eu mae.

³⁰ Tsaq-awr dawr-eu tsawrhaq-aq, tiqjawr-iq maqya bi yurdzae-ar. Aerkhawf, tsawrcawv-aq, mirtsaq-euq khoertav maqya jawr-ar.

³¹ Tsaq-awr dawr-eu tsawrhaq-euq khaqmae-aq, Zaqsiq tsawrganr anr-eu dawq dovle taef-a. Aerkhawf, dawq yurpyawv-eu maeqlar-aq, Yabi tovtsaevdzae taef-a.

³² Tsaq-awr dawr-eu tsawrhaq-euq maeqluq-aq, Hageuf paq-aer ghae-eu dawq ngaeq-eu siqnya-eu mae. Aerkhawf, tsawrcawv-euq khaqmae-aq, Dawq yurpyawv-awr nae taef-aer ngaeq-eu mae.