Dawqdaq 1 - Yawshawr Yaerbof Dawqma Sarjax Yawshuif Jaceuq-eu Hawr-eu Dawqdaq

Dawqdaq-euq Arpyar

¹ Daqbir-euq zaqyo Irsaqleqlav-euq sanqpaq Sorlaqmoq-euq dawqdaq deuq-aq:

² Zaqsiq tsawrganr hawr-eu maeqdawq tsovdawq bi siqnya-awr, Dawqtsuif naf-eu dawqdeuq-anr bi ghovshaw nya-eu gharduq mae.

³ Dawr-awr tsaq-eu jeq, yarkhaq dar-eu jeq, tsaq-awr dawr-eu jeq hawr-eu Zaqsiq tsawrganr-euq maeqdawq tsovdawq-anr bi hageuf-eu gharduq mae.

⁴ Maqdzaw-euq zaq-anr bisiq bi nyalar-awr, Zaqguq deuq-anr siqnya-eu tsawrganr hawr-eu noeqdanr doe-eu jeq bif-eu gharduq mae.

⁵ Tsawrganr anr-eu deuq narhaq ngae dzawlanq-eu jeq biza-awr, Ghovshaw nya-eu tsawrhaq maeqbawq biza-eu gharduq mae.

⁶ Dawqdaq hawr-eu sheucaev-eu dawq bi ghovshaw nya-awr, Tsawrganr anr-eu tsawrhaq-euq dawqdzawr hawr-eu tsaqdzov dzov-eu dawq-anr bi ghovshaw nya-eu gharduq mae.

⁷ Ya’we Miqyaer-anr guv-eu jeq-aq, siqnya-eu tsawrganr-euq ardanq baeduq mae. Aerkhawf, aqdzawq argan-aq, zaqsiq tsawrganr hawr-eu maeqdawq tsovdawq-anr hawdoer-eu mae.

Cawq Yawdoer-anr Yanr-eu

⁸ Ngaq-euq zaqyo-or! Nawqda-euq maeqdawq tsovdawq-anr narhaq geuf-awr; Nawqma-euq zanrdawq-anr taqbyaer.

⁹ Aqjeq mirnae aernar-aq, Dawq heudeuq-aq, nawq-euq uqduq-anr hawmuiq-eu uqdzanq hawr-eu, Nawq-euq kawqlanr-anr dan-eu lanrdan lof-aer dur-eu mae.

¹⁰ Ngaq-euq zaqyo-or! Iqbaxzaq deuq, nawq-anr cawqlar ngae, Aqyawf maf-euq maershuir-anr taq tawvler.

¹¹ Aqyawfmaf heulof-aer cawqlar-eu baw-mr: “Nga’maf naeq-aer oe-awq, aqduimaf, tsawrhaq-euq shiq lavdov-eu gharduq joeyuf-awr lof-ir kar-eur. Aqduimaf dzurzaf taq-awr tiqjeq-iq maqlaeq maqca-eu deuq-anr lavsaef-ir kar-eur.

¹² Aqduimaf, shir-eu mirkhanq lof-aer aqyawf maf-anr yawdaef-aer myeufanr-awr, Mawrdo dolanni duqkhanq-anr ga’anrbyov ghae-euq lof-aer myeufanrnaeq kar-eur.

¹³ Khoernar-aq, aqduimaf, Poeq duidui-eu pyurshuir myawqganq yawqjeq navluf ya’mawr-awr, Yurgeuf-euq myawqganq deuq, irkanr tiqbyanni ya bafbyantaq taef-a.

¹⁴ Nga’maf naeq-aer gawflar-awq. Aqdui dawqtawvluf pyur pawqbaev tiqgar taf kar-eur.” Aqyawfmaf heulof-aer aerlar nar-aq,

¹⁵ Ngaq-euq zaqyo-or! Aqyawfmaf naeq-aer garma khoerkanr-anr taqir. Nawq-euq aqkuir, aqyawf maf-euq cankawv-anr taqcan.

¹⁶ Aqjeq mirnae aernar-aq, Aqyawf maf-euq aqkuir-aq, yawdoer jeq mr-eu laer caevghae-awr, shiq lavdov-eu yawkawr mae.

¹⁷ Arjir hawluf ngae bawghaf khmr-eu-aq, tiqjeq-iq gardanr maq tsoeqler-a.

¹⁸ Aerkhawf, aqyawf maf-aq, Yawqha-euq shiq lavdov-eu laer joeyuf-awr lofluf-eu mae. Aqyawfmaf, yawqha-euq daefzir yur-eu laer dzurzaf taq-euq mae.

¹⁹ Javlarni maerjuir juir-awr mr-eu tsawrhaq yawqghaq navluf-euq garma-aq heulof-aer mae; Mrmyawq khoer, yawsanr ghaq-euq daefzir yurgeuf lar-eu mae.

Zaqsiq Tsawrganr-euq Tersar

²⁰ Zaqsiq tsawrganr, tersar yawkhav-aer povka doeni kurluf-eu mae. Aqyawf, tersar lavkhav-awr laevkawv doeni gurluf-eu mae.

²¹ Aqyawf, tsawrhaq uiqler duq-anr gurgaq-awr, Aqyawf-euq dawq, meuq-euq lanrkhaeq-euq povka heulof-aer dzawrgaq luf-eu mae:

²² “Maqdzaw-euq zaqdeuq-or! Aqmyan keuvni maqsiq maqnya-eu jeq-anr gaq-eu laer ghae-eu le? Aqjaf jaf-eu deuq khawf, aqmyan keuvni aqjaf jaf-eu gar laqkhaq caer-awr, Aqdzawq argan deuq khawf, aqmyan keuvni siqnya-eu tsawrganr-anr byae-eu laer ghae-eu le?

²³ Ngaq-euq maeqpar-eu dawq-euq baqda’nae pyawrlar-awq. Ngar, ngaq-euq saflar, nawmaf-euq khoertav aqdir shaevdav naeq-awr, Ngaq-euq dawq nawmaf-anr bi siqnya ma.

²⁴ Ngar, nawmaf-anr kur-euq khawf, nawmaf maq narhaq-aer, Ngar, aqlaf cawqja naeq-euq khawf, tiqghaq-iq maq hageuf-a.

²⁵ Nawmaf, ngaq-euq maeqbawq dawqtawv luf-anr byaerdzae-awr, Maeqpar-eu dawq-anr maq hageuf-eu mirnae,

²⁶ Nawmaf shaqzanq-anr yadaq ngae ngar uir-awr, Nawmaf-anr guv-awr gav-eu jeq keuvle ngae aqjaf jafdoernaeq ma.

²⁷ Nawmaf-anr guv-awr gav-eu jeq, Jaqlaer laerma lof-aer ciqtanq ciqtuv lar-awr, Shaqzanq, jaqlaer laerzeuv lof-aer keuvle-eu uqtaf, Noeqshaq duidui-awr nuima cawv duidui-eu jeq, nawmaf-euq khoertav keuvle ngae;

²⁸ Aqyawfmaf, ngaq-anr kur-eu khawf, ngar oq maqtoq-aer, Aqyawfmaf, ngaq-anr povsaeflef khawf, ngaq-anr maq povmawr nya-ar.

²⁹ Aqjeq mirnae aernar-aq, Aqyawfmaf, siqnya-eu tsawrganr-anr byae-awr, Ya’we Miqyaer-anr guv-eu jeq-anr maq tsergeuf-a.

³⁰ Aqyawfmaf, ngaq-euq maeqbawq-anr tiqpawf-iq maqgeuf-aer, Maeqpar naeq-eu dawq yawqdawq navluf-anr hawdoer-eu mae.

³¹ Khoermirnae, aqyawfmaf, Yawqha-euq garma-euq arsiq yadzaq-awr, Yawqha-euq bawqtov-euq baqda’nae tiqdaev yadzaq taef-a.

³² Aqjeq mirnae aernar-aq, Maqdzaw-euq zaq-aq, maq narhaq geuf-eu mirnae yashir-awr; Aqdzawq argan-aq, khar daefmawf-eu lof-aer daef-eu mirnae yacawv-ir taef-a.

³³ Aerkhawf, ngaq-anr khar narhaq-eu tsawrhaq-aq, Khanqlanrkhar maqza’ni yadaef-awr, Yawdoer-anr guvkhar maqza-aer zifdanni yadaef taef-a.”