3 Yoˇhaˬ 1 - Yawshawr Yaerbof Dawqma Sarjax Yawshuif Jaceuq-eu Hawr-eu Dawqdaq

Dawqcawq Puq-eu Dawq

¹ Ngar-aq, aqyuif aqtsu ma. Aqdui zawr gaq-awr yawtsaq yawdawr-euq lafkhoer ngar zawr gaq-eu Gaqyur-anr sanqbof bofanr lef-eu ma.

² Ngar zawr gaq-eu cawq-or! Nawr saflar paw bawle zale luf-eu lof-aer, yawqdzer dzaq-anr navluf bawle zale-awr, yawmuiq jawrsar dovni ngar guiqlanq sharluf-eu ma.

³ Aqyuif aqnyir tiqpavnav deuq lar-awr nawr yawtsaq yawdawr-anr zif-awr, aqdirma-aer yawtsaq yawdawr-euq lafkhoer daefluf-eu garkawv sarkir kamq-eu mirnae, ngar laqkhaqcaer duidui nya.

⁴ Ngaq-euq zaqdeuq yawtsaq yawdawr-euq lafkhoer daefluf mae laer yagaq-euq taf-aer, ngar laqkhaq caerdzaeq-eu jeq maqpar jav mir-a.

Gaqyur-anr Jaceuq-eu

⁵ Ngar zawr gaq-eu cawq-or! Nawr, aqyuif aqnyir hawr-eu boermiq siqkhaq deuq-euq gharduq aqjeq mr-eu khawf, nawr sarjax-euq lafkhoer mr-eu mae.

⁶ Aqyawfmaf, nawr gaqnya-eu garkawv, Kalizaq armur-anr ja’naeq-euq mae. Nawr, Miqyaer-anr geuxni aqyawfmaf garma-anr dov-ir ngae ngaeqghaenaeq nar-aq, muiq duidui-eu mae.

⁷ Aqjeq mirnae aernar-aq, aqyawfmaf, Miqyaer-anr maqjan-eu tsawrhaq-anr maqghoeni, Kali-euq tsawrmyanr-euq gharduq garma dov-ir luf-eu mae.

⁸ Khoermirnae, yawtsaq yawdawr-euq lafkhoer, aqdui heulof-aer ghae-eu tsawrhaq naeq-aer gar mrcawq pyeufnya’ni, aqdui, aqyawf maf-anr yawmuiq-aer hageuf-eu tsaq mae.

Daqyawrdaqlar Hawr-eu Deqmeqdeqlir

⁹ Ngar, Kalizaq armur-anr sanqbof bofnaeq-euq ma. Aerkhawf, Kalizaq armur-euq khoertav aqyuif geufmawf-eu Daqyawrdaqlar khoerghaq, nga’maf-anr maq hageuf naeqlaf-a.

¹⁰ Khoermirnae, ngar oe nar-aq, aqyawf mrluf sharluf-eu deuq aerdov ma. Aqyawf, nga’maf-anr dawqdoer ngaeqlar-eu taef-aer nuikhanr maqshir-aer, aqyuif aqnyir deuq-anr maqha-eu uqtaf, ha’mawf-eu deuq-anr lavtsoeq-awr, Kalizaq armur-anr nae taedov-eu mae.

Deqmeqdeqlir Muiq Mae Laer Kamq-eu

¹¹ Ngar zawr gaq-eu cawq-or! Yawdoer jeq-anr taq hawgeuf, taq dzawgeuf, yawmuiq jeq-anr taef-aer hawgeuf dzawgeuf-awq. Yawmuiq jeq mr-eu tsawrhaq-aq, Miqyaer-anr taf-eu tsawrhaq mae. Yawdoer jeq mr-eu tsawrhaq-aq, Miqyaer-anr maq mawrhaw-euq tsawrhaq mae.

¹² Deqmeqdeqlir yawmuiq mae laer tsawrhaq dawqtawvluf sarkir kamq-eu mae. Yawtsaq yawdawr jeq khawf aqyawf-euq gharduq sarkir kamqluf-eu mae. Nga’maf khawf aqyawf-euq gharduq sarkir kamq-eu ma. Nga’maf kamq-eu jeq tsaq-awr dawr mae laer nawr siqnya mae.

Arsaq Saq-eu Dawq

¹³ Ngar, nawq-anr bofanrlef paq-aer ghae-eu ghawqmya jeq jav-eu le siq. Aerkhawf, sanqdur hawr-eu sanquir nae maq bofmawf nya.

¹⁴ Ghawqmyanr maqghae-aer nawq-anr myavpyawq tanqdzoer-awr dawqja ya jacawq-eu gar, ngar noeqtmq luf-eu ma. Nawr nuisar of luf-ur. Aqdui-euq cawqdeuq, nawq-anr dawqcawq puqanr lef-euq mae. Cawqdeuq tiqghaq sair tiqghaq-anr dawqcawq puqdan naeqlaf law de-eq.