2 Yoˇhaˬ 1 - Yawshawr Yaerbof Dawqma Sarjax Yawshuif Jaceuq-eu Hawr-eu Dawqdaq

Dawqcawq Puq-eu Dawq

¹ Ngar-aq, aqyuif aqtsu ma. Miqyaer nae tserdov taq-euq zaqmiq tiq ghaq-anr hawr-eu aqyawf-euq zaqdeuq-anr sanqbof bofanr lef-euq ma. Yawtsaq yawdawr-euq lafkhoer, ngar, nawmaf-anr gaq-eu ma. Ngar taef-aer gaq-eu maqngeur-eu, yawtsaq yawdawr jeq-anr siqnya-eu tsawrhaq dawqtawvluf khawf gaq-eu mae.

² Aqdui-euq lafkhoer anrluf-eu yawtsaq yawdawr jeq-euq baqda’nae, nawmaf-anr gaq-eu ma. Yawtsaq yawdawr jeq khoer-aq, mqmaq maqbyav yarzir aqdui-euq lafkhoer anr taef-a.

³ Yawtsaq yawdawr hawr-eu gaq-eu lafkhoer, Aqda Miqyaer hawr-eu Aqda Miqyaer-euq Zaqyo, Yeqsur Kali-euq guiqlanq yawdzanr, ghawqshaq gaq-eu jeq hawr-eu nuisar of-eu jeq nawmaf-anr of luf-ur.

Yawtsaq Yawdawr Hawr-eu Gaq-eu Jeq

⁴ Aqda Miqyaer nae aqdui-anr dawq biftaq-euq lof-aer nawq-euq zaq tiqpavnav deuq yawtsaq yawdawr-euq lafkhoer daefluf-eu gar ngar ya’mawr-euq mirnae, laqkhaqcaer duidui nya.

⁵ Zaqmiq-or! Aqdui tiqghaq tirghaq gaq kar-eur laer nymq-mr ngar, nawq-anr shar-eu ma. Biftaq yaf-euq dawq yawshuif ngar, nawq-anr bofanr lef-eu maqngeur. Yawbae ngae nae aqdui zataq-euq dawq khoerdawq, ngar, nawq-anr bofanr lef-eu ma.

⁶ Gaq-eu laer aer-eu-aq, Miqyaer nae dawq biftaq-euq lof-aer daef-eu gar aer-eu mae. Tiqghaq tirghaq gaq-awq laer biftaq-euq dawq khoerdawq-anr yawbae ngae nae, nawmaf yagaq-euq mae. Nawmaf khoerlof-aer daef-eu tsaq mae.

⁷ Jaqmyawf myawf-eu tsawrhaq ghawqmya ghaq mirtsaq doeni ir-awr, Yeqsur Kali-aq, mawrdo baw-awr zafka le-euq mae laer sarkir maqkamq-a. Khoerdeuq-aq, jaqmyawf myawf-eu tsawrhaq hawr-eu Kali-anr muir-eu tsawrhaq mae.

⁸ Aqdui nae mr-awr shar-euq deuq maqbi byov-ir-aer mrpoeq lafsawq tiqbyanni za’nya paq-aer yawqhar yawqha yanr-awq.

⁹ Kali-euq dawqmaeq dawqtsov-euq lafkhoer maqdaefni, daefbanq daeflaeq-eu aqsur ghaq maqkaq, aqyawf-euq lafkhoer Miqyaer maqjawr-a. Kali-euq dawqmaeq dawqtsov-euq lafkhoer daef-eu aqsur ghaq maqkaq, Aqda Miqyaer hawr-eu Zaqyo-anr taf-eu mae.

¹⁰ Tsawrhaq tiqghaqnav nawmaf jawr-eu gar lar-awr, dawqmaeq dawqtsov heu maqmaeq nar-aq, aqyawf-anr irkanr-euq lafkhoer taq ha’anr, dawqcawq khawf taq puqnaeq.

¹¹ Aqjeq mirnae aernar-aq, aqyawf-anr dawqcawq puq-eu tsawrhaq-aq, aqyawf naeq-aer yawdoer jeq cawmr-eu gar dur-eu mae.

Arsaq Saq-eu Dawq

¹² Ngar, nawmaf-anr bofnaeq paq-aer ghae-eu ghawqmya jeq jav-eu le siq. Aerkhawf, seuqghaq hawr-eu sanquir nae maq bofmawf nya. Aqdui-euq laqkhaq caer-eu jeq byanlarni, ngar, nawmaf jawr-eu gar oe-awr, myavpyawq tanqdzoer-awr dawqja jacawq ma laer noeqtmq taq-euq ma.

¹³ Nawq-euq dmrma, Miqyaer nae tserdov taq-euq khoerghaq-euq zaqdeuq, nawq-anr dawqcawq puqanr lef-euq mae.