2 Tiˆmoˇseˬ 4 - Yawshawr Yaerbof Dawqma Sarjax Yawshuif Jaceuq-eu Hawr-eu Dawqdaq

Yaerdawq Yawmuiq-aer Maeq-awq

¹ Miqyaer hawr-eu Sanqpaq Yeqsur Kali-euq maeqshi, ngar, nawq-anr dawq bif-eu ma. Yeqsur dovle ngae, aqyawf uvlanr-eu lafkhoer daefluf-eu tsawrhaq hawr-eu shirdzeur-euq tsawrhaq-anr yarkhaqdar taef-a.

² Yaerdawq yawmuiq-aer maeq-awq! Aryamq za ngae khawf, maqza ngae khawf maeq-eu laer laeqhmq taq-awq. Mrlaeq-euq deuq-anr toeqmaeq-awr, yawkhav khav-aer maeqpar tsovpar naeq-awq. Yawqjeq navluf-euq lafkhoer nuinoeq ghawqmanrni noeq-awr maeq-eu uqtaf, ghaq khawf bif-awq.

³ Aqjeq mirnae aernar-aq, tsaq-awr tsanr-eu dawqmaeq dawqtsov-anr maq narhaq nanr-eu aryamq keuvle taef-a. Aqyawfmaf narhaq mawf-eu jeq taef-aer narhaq-awr, yawqha-euq nuima-anr tsaqni maeq-awr tsov-eu saqlaq ghawqmya ghaq povuiq taef-a.

⁴ Khoeruqtaf, aqyawfmaf yawtsaq yawdawr-euq dawq-anr maq narhaq-aer yawqpawyawq ghawrpyawr-awr, dawqmawq dawqoer taef-aer narhaq taef-a.

⁵ Aerkhawf, nawr-aq, yawqjeq navluf-euq lafkhoer yawqha-euq nuima-anr ghaqler-eu tsawrhaq pyeuf-awq. Shaqzanq nargawr-anr daq-awr, guiqlanqdawq maeq-eu uqtaf, nawq-euq guiqlanq-euq gar mrluiv-awq.

⁶ Lawrduq-euq khoertav shaevdav-awr lawr-eu jeq lof-aer ngar danlar taq-euq ma. Ngar, mirtsaq-anr nae ghawq-ir-eu aryamq paelar-euq mae.

⁷ Ngar guirdeuv yawmuiq-aer deuv-awr, ngar caev paq-aer ghae-eu garma caevli-euq ma. Ngar jan-eu jeq-anr zifdanni nyaeftaeq laf-euq ma.

⁸ Nymq-mr tsaq-awr dawr-eu uqdzanq ngaq-euq gharduq laeqhmq taq-euq mae. Arnan khoernan keuvle ngae, tsaq-awr dawr-eu lafkhoer yarkhaq dar-eu ghaq pyeuf-eu Sanqpaq Yeqsur-aq, uqkhov khoersiq ngaq-anr bifnaeqlaf taef-a. Ngaq-anr taef-aer maqngeur-eu aqyawf zafka le-eu gar gaq-eu tsawrhaq yawqghaq navluf-anr khawf bifnaeq taef-a.

Bi Byaerdzae-euq Ghaqkhaer

⁹ Nawr, ngar jawr-eu gar yawkawr-aer larnya’ni laejae duidui-awq.

¹⁰ Aqjeq mirnae aernar-aq, Deqmav-aq, heuzir-anr taf-eu mirtsaq-anr gaq-eu mirnae, ngaq-anr byaerdzae-awr, Tersaqlorni-anr ir-euq mae. Gaqleqgeq-aq, Gaqlaqtiv-anr le-euq mae. Tirtuv khawf Daqlaqmaqdir-anr ir-euq mae.

¹¹ Ngaq naeq-aer-aq, Lurkaf jawr-eu taef mae. Maqkuv-anr cawq-awr, nawq naeq-aer sheuqcaw laf-awq. Aqjeq mirnae aernar-aq, aqyawf-aq, ngar guiqlanq-euq gar mr-eu gar gardanr tsoeq-eu mae.

¹² Durjir-anr-aq, ngar Erpersu-anr khaerghae-euq ma.

¹³ Nawr lar ngae, Daqlor-anr jawr-eu Gaqpuv jawr-eu gar ngaq nae bijav yaf-euq paerkhanq paermanr khoerkanr hawr-eu sanqbof khoerdeuq yurlaf-awq. Shaqkhov-anr boftaq-euq sanqbof khoerdeuq, ngeurdzaeq maq yurlaf-aer taqghae de-eq.

¹⁴ Guiqshuir bajiq Aqleqsaqdur, ngaq-anr ghawqmya jeq janrdoer naeqlaf-euq mae. Aqyawf nae janrnaeq laf-euq lof-aer geuxni Sanqpaq Yeqsur, aqyawf-anr janrkhofnaeq luf-ur.

¹⁵ Nawr khawf aqyawf-anr yanr de-eq. Aqjeq mirnae aernar-aq, aqyawf-aq, aqdui maeq-eu dawq-anr lavtsoeq duidui-eu mae.

¹⁶ Yarkhaq darduq-anr, ngaq-euq garkawv ngar yawbae pov jashawler ngae, yawqghaq navluf, ngaq-anr byaerdzae naeqlaf-awr ngaq-anr cawba naeqlaf-eu tiqghaq-iq maqjawr-a. Aerkhawf, iqbax heu aqyawf maf-euq khoertav taqtaq.

¹⁷ Tsawrhaq dawqtawvluf, ngaq-anr byaerdzae naeqlaf-euq khawf, ngar guiqlanqdawq tiqbyanni maeqnaeq-awr, aqcawq tsawrjeuq tsawrca dawqtawvluf yagaqni, Sanqpaq Yeqsur, ngaq naeq-aer jawr-awr, ghaq bifnaeqlaf luf-eu mae. Khoermirnae, ngar, arlaqjaqshir-euq khaqmae-anr nae yabuq-ir-euq ma.

¹⁸ Sanqpaq Yeqsur, ngaq-anr yawdoer yawqjeq navluf-anr nae bibuq-ir naeqlaf-awr, ngar, aqyawf-euq mqtav mirkhanq-anr ya urler ngae keuvni, ngaq-anr sheuqkeuv naeqlaf taef-a. Li-eu maqbawni yawshaef khanqsaer dawqtawvluf, aqyawf-anr damqnaeq kar-eur. Aqmeq.

Arsaq Saq-eu Dawq

¹⁹ Birgirla hawr-eu Aqgurla-anr khawf, Awqneqsiqpawq-euq nymrjir-anr khawf, “Ngar noeqmawrluf ma jer” laer tsafnaeq law de-eq.

²⁰ Erlaqdur-aq, Gawrliqtu-anr jawryaf-euq mae. Daqlorbeq nar-eu mirnae, ngar, aqyawf-anr Meqleqdur meuq-anr bi jawryaf-euq ma.

²¹ Tsanqgav yamq maq keuvlar-euq minav-aer nawr, ngar jawr-eu gar larnya’ni laejae duidui-awq. Urburlur, Purdeq, Lirnmr, Gaqlawrdir hawr-eu aqyuif aqnyir Kalizaq yawqghaq navluf, “Nawq-anr noeqmawr luf-eu ma” laer dawqtsaf tsafanr lef-euq mae.

²² Sanqpaq Miqyaer, nawq-euq saflar-euq lafkhoer jawr luf-ur. Nawq-euq khoertav guiqlanq yawdzanr jav luf-ur.