2 Tiˆmoˇseˬ 1 - Yawshawr Yaerbof Dawqma Sarjax Yawshuif Jaceuq-eu Hawr-eu Dawqdaq

Dawqcawq Puq-eu Dawq

¹ Ngar-aq, Miqyaer nuima tsaq-eu mirnae, Yeqsur Kali-euq ghaqkhaer geufluf-eu Pawrluv ma. Yeqsur Kali-euq lafkhoer daef-eu jeq za mae laer sarjax dzaqtaq-euq lof-aer maeqnaeq-awq laer Miqyaer, ngaq-anr khaer-eu mae.

² Ngar zawr gaq-eu ngaqli Tivmorseq-anr sanqbof bofanr lef-eu ma. Aqda Miqyaer hawr-eu aqdui-euq Sanqpaq Yeqsur Kali-euq guiqlanq yawdzanr, ghawqshaq gaq-eu jeq hawr-eu nuisar of-eu jeq, nawq-euq khoertav jav luf-ur.

Miqyaer-euq Guiqlanq-anr Jaceuq-awr Ghaq Bif-eu

³ Ngar guiqlanq kharshar ngae, uqcif nan’ghanr maqaer, aqmyanluf nawq-anr noeqkeuv-awr, Miqyaer-anr jaceuq-eu ma. Aqpoeq aqbawr deuq shawrjaevni ghae-eu zaqsiq nuisiq anranr-aer, Miqyaer-euq gar mr-euq lof-aer ngar khawf mrluf-eu ma.

⁴ Nawr myavbir dov-euq gar ngar noeqdovlar ngae, nawq-anr mawrmawf duidui mir-a. Nawq-anr ya’mawr lawnmr-aq, ngar laqkhaqcaer duiduilar taef-a.

⁵ Nawr shawrjaevni jan-eu gar ngar noeqdov lar-euq mir-a. Nawr jan-eu heu-aq, yawbae nawqpiq Lawriv hawr-eu nawqma Urnir-euq lafkhoer anr-awr, nymq-mr nawq-euq lafkhoer khawf anr-eu gar ngar yawduq baw-eu ma.

⁶ Khoermirnae, ngaq nae nawq-euq khoertav aqlaf bafdav-euq gar ghoe-awr, Miqyaer, nawq-anr bif-euq lafsawq khoer maqbi miv-ir ni lavnyaev-awq laer ngar, nawq-anr aernoeq-eu ma.

⁷ Aqjeq mirnae aernar-aq, Miqyaer, aqdui-anr guv-eu nuima saflar bifnaeq laf-euq maqngeur-a. Aerkhawf, baoq anr-eu, gaq-eu hawr-eu yawqha-euq nuima-anr ghaqler-eu nuima saflar bifnaeq laf-euq mae.

⁸ Khoermirnae, aqdui-euq Sanqpaq Miqyaer-euq garkawv sarkir kamq-eu taq shafdawr, aqyawf-euq gharduq kuv-anr urluf-eu ngar baqda’nae khawf taq shafdawr. Aerkhawf, Miqyaer-euq baoq-anr ghoe-eu lafkhoer, guiqlanq dawq-eu gharduq ngaq naeq-aer tiqkawv lof-aer shaqzanq daq-awq.

⁹ Aqyawf, aqdui-anr kakhof naeqlaf-awr kur-eu yawshawr jeq nae aqdui-anr kur-euq khoer-aq, aqdui mr-awr shar-eu mirnae maqngeur-a. Aerkhawf, aqyawf nae noeqtmq taq-euq jeq hawr-eu guiqlanq yawdzanr baqda’nae mae. Guiqlanq yawdzanr khoer-aq, ardanq maqbae-euq minav-aer, Yeqsur Kali-euq lafkhoer aqdui-anr bifnaeq laf-euq mae.

¹⁰ Aerkhawf, nymq-mr-aq, aqdui-euq Kakhof-eu ghaq Yeqsur Kali dovle-euq mirnae, aqdui guiqlanq yawdzanr khoer-anr byacaevni ya’mawr-euq ma. Aqyawf guiqlanq dawq-anr ghoe-awr shir-eu jeq-anr lavbyov-awr, daef-eu jeq hawr-eu maq shirnya-eu jeq yurlef-awr byacaevni bimawr naeqlaf-euq mae.

¹¹ Ngar, aqcawq tsawrjeuq tsawrca-euq gharduq ghaqkhaer geuf-awr dawqmaeq maeq-eu ghaq geuf-eu uqtaf, maeqnaeq tsovnaeq-eu ghaq geuf-awq laer Miqyaer, ngaq-anr kadar naeqlaf-euq mae.

¹² Khoer baqda’nae, ngar khaeq-awr khav-eu heudeuq-anr ya daqluf-eu ma. Aerkhawf, ngar maq shafdawr. Aqjeq mirnae aernar-aq, ngar, aqsur ghaq-anr janluf-eu le laer ngar siqnya ma. Ngar, aqyawf-anr khar a’naeq-euq deuq, Arnan khoernan-anr keuvni, aqyawf hawlanr-awr hawpir mae laer ngar janduq taq-euq ma.

¹³ Nawr, ngaq nae maeq-euq gar yagaq-euq jancoer paq-aer ghae-eu dawq khoer-anr daefcaw ghae-awr, Yeqsur Kali-euq lafkhoer anr-eu jan-eu jeq hawr-eu gaq-eu jeq-anr khawf zifdanni tuvtaeq taq-awq.

¹⁴ Aqdui-euq lafkhoer jawr-eu Yawshawr Saflar-anr ghoe-awr, nawq-anr a’naeq taq-euq yawmuiq jeq-anr, nawr yawmuiq-aer jeqhmq taq-awq.

¹⁵ Nawr siqnya-eu lof-aer Aqsir mircoer-anr jawr-eu tsawrhaq yawqghaq navluf ngaq-anr byaerdzae naeqlaf-euq mae. Tsawrhaq khoerdeuq-euq lafkhoer, Piqgeqlur hawr-eu Heqlarmorjeq khawf keuq-eu mae.

¹⁶ Sanqpaq Yeqsur, Awqneqsiqpawq-euq nymrjir-anr ghawqshaq gaqnaeq luf-ur. Aqjeq mirnae aernar-aq, aqyawf, ngaq-anr ghawqmya pov nuima sarlarni janrnaeq laf-euq mae. Ngaq-anr shmrcav paftaq-euq gar aqyawf maq shafdawr-a.

¹⁷ Aqyawf, Lormav meuq-anr larkeuv-euq naeq-aer ngaq-anr maq povmawr-euq khoerkeuvni sharpov duidui-euq mae.

¹⁸ Arnan khoernan keuvle ngae, aqyawf, Sanqpaq Yeqsur-euq ghawqshaq gaq-eu jeq za’ni, Sanqpaq Yeqsur, aqyawf-anr ghawqshaq gaqnaeq luf-ur. Ngar, Erpersu-anr jawr ngae, aqyawf, ngaq-euq gharduq kuirlaf zaqkhav arnavni geufnaeq-euq gar nawr yawmuiq-aer siqnya-eu mae.