2 Teˇsaˬloˇni 3 - Yawshawr Yaerbof Dawqma Sarjax Yawshuif Jaceuq-eu Hawr-eu Dawqdaq

Guiqlanq Sharcaw-awq

¹ Aqyuif aqnyir deuq-or! Arsaq saq-eu dawq-aq heulof-aer ma. Sanqpaq Miqyaer-euq dawq, nawmaf-euq ghanrcae yawkawr-aer gaqdoe le-awr, nawmaf ciqpoeq-eu lof-aer, yawqgar navluf khoerlof-aer pyeuflarni, nga’maf-euq gharduq guiqlanq sharcaw naeqlaf-awq.

² Tsawrhaq dawqtawvluf jan-eu maqngeur-eu mirnae, caepyawq shar-eu tsawrhaq hawr-eu tsawrcawv deuq-euq aqlaf-anr nae nga’maf yabuq-ir ni khawf guiqlanq sharcaw naeqlaf-awq.

³ Aerkhawf, Sanqpaq Miqyaer-aq, sarjax zif-eu mae. Aqyawf, nawmaf-anr bi ziflar-awr, yawdoer ghaq-anr nae yabuq-ir ni, aqyawf, nawmaf-anr hawpir naeqlaf taef-a.

⁴ Nga’maf nae dawq bif-euq lof-aer nawmaf mrluf sharluf-eu uqtaf, maeqhu paw khawf mrdav shardavlef taef-a laer, Sanqpaq Miqyaer-euq baqda’nae nga’maf, nawmaf-anr yawduqbaw ma.

⁵ Sanqpaq Miqyaer, nawmaf-euq nuima-anr Miqyaer-euq gaq-eu jeq hawr-eu Kali-euq daqcoer orcoer-eu jeq-anr bi ghovshawnya dzaeqlar luf-ur.

Yawdoer Tsawrhaq-anr Maeqnaeq-eu

⁶ Aqyuif aqnyir deuq-or! Aqdui-euq Sanqpaq Yeqsur Kali-euq tsawrmyanr-euq uqmov nga’maf, nawmaf-anr dawq heulof-aer bif-eu ma. Nga’maf nae nawmaf-anr maeqnaeq-euq maeqnan maq cantae-eu aqyuif aqnyir yawdoer yawqghaq navluf-anr ghawqtsaev tsaev-awq.

⁷ Nawmaf, nga’maf-anr hawgeuf dzawgeuf-eu tsaq mae laer, nawmaf siqnya-eu mae. Aqjeq mirnae aernar-aq, nga’maf, nawmaf naeq-aer jawr ngae, yawdoer maqdoer-aq.

⁸ Nga’maf arpoeq maqbif-aer nawmaf-euq tiqjeq-iq maqdzaq-aq. Nawmaf tiqghaq-anr-iq khavbaev maqya pyeufni, nga’maf uqcif nan’ghanr maqaer, gar mr duidui-euq ma.

⁹ Nga’maf aryaq maqjav-eu mirnae maqdzaq-euq maqngeur. Nawmaf, nga’maf-anr hawgeuf-awr dzawgeuf nya’ni khoerlof-aer janr-euq ma.

¹⁰ Nga’maf, nawmaf naeq-aer jawr ngae, “Gar maq mrnanr-eu tsawrhaq-anr tiqjeq-iq taqbi dzaq” laer nawmaf-anr dawq bif-euq ma.

¹¹ Aqjeq mirnae aernar-aq, nawmaf-euq lafkhoer, tsawrhaq tiqpavnav deuq-aq yawdoer doer-awr, tiqjeq-iq maqmr-aer, aqcawq kharngeur-eu jeq mr-eu gar lavbanq luf-eu mae jer laer, nga’maf yagaq-euq ma.

¹² Nga’maf, khoerlof-aer ghae-eu tsawrhaq-anr, Ciqcurni ghae-eu lafkhoer, yawqha-euq gar yawqha mr-awr, yawqha mr-euq yawqha dzaq-awq laer Sanqpaq Yeqsur Kali-euq tsawrmyanr-euq uqmov dawq hawr-eu ghaq bif-eu ma.

¹³ Aqyuif aqnyir deuq-or! Nawmaf yawmuiq jeq mr-eu ghaqbyaev taqbyaev.

¹⁴ Tsawrhaq tiqghaqnav, nga’maf nae bofanr lef-euq dawq heudeuq-anr maq narhaqgeuf nar-aq, aqyawf-anr noeqtaq-awq. Aqyawf yawqhar yawqha bi shafdawr-ir paq-aer cawq taq cawqnaeq.

¹⁵ Aerkhawf, aqyawf-anr muir-eu tiq ghaq lof-aer maqsawx-aer, aqyuif aqnyir-anr durni maeqbawq bifnaeq-awq.

Dawq Ngaeqghae Naeq-eu

¹⁶ Nuisar biof-eu Sanqpaq Miqyaer, aqyawfghaq, nawmaf-anr aqmyanluf yawqjeq navluf-euq lafkhoer nuisar biof luf-ur. Sanqpaq Miqyaer, nawmaf yawqghaq navluf naeq-aer jawr luf-ur.

¹⁷ Ngar, Pawrluv, “Nawmaf-anr dawqcawq puq-eu ma” laer ngaq-euq aqlaf nae sanqbof bofanr lef-euq ma. Ngaq nae kharbof-euq sanqbof yawqpur navluf ngaq nae bof-euq nga laer siqlarni heulof-aer saq taq-euq ma.

¹⁸ Aqdui-euq Sanqpaq Yeqsur Kali-euq guiqlanq yawdzanr, nawmaf yawqghaq navluf naeq-aer jav luf-ur. Aqmeq.