2 Gawˇliˬtu 5 - Yawshawr Yaerbof Dawqma Sarjax Yawshuif Jaceuq-eu Hawr-eu Dawqdaq

Jan-eu Lafkhoer Daef-eu

¹ Aqjeq mirnae aernar-aq, aqdui-euq mirtsaq-euq nymr heu-aq, saeqghawv lof-aer dur-eu mae. Saeqghawv heu cawv-ir nar-aq, tsawrhaq-euq aqlaf nae tsov-euq nymr maqngeur-eu, mq-euq khoertav, Miqyaer nae aqdui-euq gharduq tsovtaq-euq, mqmaq maqbyav yarzir zif-eu nymr jav mae laer siqnya ma.

² Maeqtsoeq dmdav-eu lof-aer mq-euq khoertav jav-eu nymr khoer-anr dmdav mawf-eu mirnae, aqdui saeqghawv heu-euq lafkhoer jawrluf ngae manrluf-eu ma.

³ Dmdav nar-aq, aqdui nermyawvni ghae-eu gar aqcawq maq hawmawr-ar.

⁴ Aqdui saeqghawv heu-euq lafkhoer jawrluf ngae, khavbaev yawkan pi-awr manrluf-eu ma. Aerkhawf, maeqtsoeq laevdzae-eu lof-aer laevdzae mawf-eu mirnae maqngeur-eu, daef-eu jeq, shirnya-eu jeq-anr myeufanr-awr, ya dmdavni manrluf-eu ma.

⁵ Khoerlof-aer pyeuflarni laeqhmq naeqlaf-euq ghaq-aq Miqyaer mae. Khoeruqtaf, kamq-eu tiqjeq lof-aer, aqyawf, aqdui-anr muiq-eu Saflar bifnaeq laf-euq mae.

⁶ Khoermirnae, aqdui aqmyanluf yawduq baw-eu ma. Aqdui-euq nymr pyeuf-eu mawrdo heu-euq lafkhoer jawrluf ngae keuvni, Sanqpaq Miqyaer-euq dawqpae jawr-eu maqngeur laer aqdui siqnya ma.

⁷ Aqjeq mirnae aernar-aq, aqdui, myavnuiv-anr mawrlar-eu jeq-anr ghoe-awr daefluf-eu maqngeur, jan-eu lafkhoer daefluf-eu ma.

⁸ Aqdui yawduqbaw ma. Mawrdo heu-anr ghawqmawf-awr, Sanqpaq Miqyaer naeq-aer jawrler mawfdzaeq mir-a.

⁹ Khoermirnae, heu-aq, aqdui-euq arpyar ma. Aqdui, mawrdo heu-euq lafkhoer jawrluf ngae maqaer, maqjawr ngae maqkaq, Sanqpaq Miqyaer nuikhanr shirni daef ma.

¹⁰ Aqjeq mirnae aernar-aq, aqdui yawqghaq navluf yawqha-euq mawrdo-euq lafkhoer daef ngae, khar daefyaf-euq lof-aer, muiq nar-aq muiq-awr, doer nar-aq doer-aer za’ni, Kali-euq yarkhaq dar-eu nuirmanq-euq maeqshi ya yawfler-eu mae.

Miqyaer-anr Tsaqler Dzoerlerni Mr-awq

¹¹ Nga’maf, Sanqpaq Miqyaer-anr guv paq-aer ghae-eu nga laer siqnya-eu mirnae, tsawrhaqzaq-anr gheupyawr duidui luf-eu ma. Khoeruqtaf, nga’maf aqjox-aer ghae-eu tsawrhaq la laer, Miqyaer yawmuiq-aer siqnya luf-eu mae. Nawmaf-euq zaqsiq nuisiq khawf, nga’maf-anr khoerlof-aer siqnya taef-a laer ngar noeqtmq ma.

¹² Aqjeq mirnae aernar-aq, nawmaf-euq maeqshi nga’maf yawqhar yawqha ciqpoeq-eu maqngeur. Aerkhawf, nuima-euq lafkhoer aqjox-aer pyeufluf-eu gar maq sharnoeq-aer, lafnyir paw taf-eu jeq-anr taef-aer khanqsaer jaev-eu tsawrhaq-anr ngaeqkhof nya’ni, nga’maf-euq baqda’nae nawmaf khanqsaer bijaev-eu gharduq bofanr lef-euq ma.

¹³ Nga’maf tsawruq uq-ir-euq nar-aq, Miqyaer-euq gharduq uq-ir-euq ma. Nga’maf-euq nuima ganrluf-eu ngeur nar-aq, nawmaf-euq gharduq ma.

¹⁴ Kali-euq gaq-eu jeq nga’maf-anr katir luf-eu mae. Tsawrhaq tiq ghaq, tsawrhaq dawqtawv luf-euq gharduq shirdan-euq mirnae, tsawrhaq dawqtawvluf shir-euq mae laer nga’maf noeqduq taq-euq ma.

¹⁵ Daefluf-eu tsawrhaq deuq yawqha-euq gharduq maqpar daef-aer, aqyawf maf-euq gharduq shirdan-awr ghofdaef lar-euq ghaq-euq gharduq daefni, tsawrhaq dawqtawv luf-euq gharduq aqyawf shirdan-euq mae.

¹⁶ Khoermirnae, iqnan taf nar-aq, nga’maf, aqcawq-anr shiqshaq-euq myavnuiv nae maqpar haw ma. Dzeurlaf ngae, shiqshaq-euq myavnuiv nae Kali-anr haw-euq khawf, aqkar nar-aq, khoerlof-aer maqpar haw ma.

¹⁷ Tsawrhaq tiq ghaq, Kali-euq lafkhoer jawr nar-aq, aqyawf, tsawrhaq yawshuif pyeuflar-euq mae. Yawoer dawqtawvluf byovjir-awr, dawqtawvluf yawshuif pyeuflar-euq mae.

¹⁸ Khoerdeuq dawqtawvluf Miqyaer-anr nae pyeufdov le-euq mae. Miqyaer, Kali-anr ghoe-awr aqdui, aqyawf-anr tsaqler dzoerlerni janrnaeq laf-euq mae. Khoeruqtaf, tsaqler dzoerlerni guiqlanq-euq gar heu aqdui-anr bifnaeq laf-euq mae.

¹⁹ Khoer-aq, Miqyaer, Kali-anr ghoe-awr mirtsaqzaq, aqyawf-anr tsaqlar dzoerlarni mr-eu jeq pyeuf-eu mae. Miqyaer, aqyawfmaf nae mrbanq lavbanq-euq jeq-anr maq sawxtaq-aer, tsawrhaqzaq, Miqyaer-anr tsaqler dzoerler-eu gar taf-eu dawq, nga’maf-anr a’naeq laf-euq mae.

²⁰ Khoermirnae, nga’maf-aq, Kali-euq danzar geufluf-eu ma. Miqyaer, nga’maf-anr ghoe-awr nawmaf-anr sharluf-eu gar dur-eu mae. Miqyaer-anr tsaqler dzoerler-awq laer nga’maf, Kali-euq danzar geuf-awr, nawmaf-anr tanqshar-eu ma.

²¹ Kali-aq, iqbax tiqpawf-iq maqanr-eu khawf, aqdui-euq gharduq Miqyaer, aqyawf-anr iqbax bipyeuf-ir-euq mae. Khoermirnae, Kali-euq lafkhoer aqdui, Miqyaer-euq tsaq-awr dawr-eu tsawrhaq pyeuflar-euq ma.