2 Gawˇliˬtu 12 - Yawshawr Yaerbof Dawqma Sarjax Yawshuif Jaceuq-eu Hawr-eu Dawqdaq

Baqlaqdirsuv Mawrle-euq

¹ Ngar khanqsaer jaev-eu-aq gardanr maqtsoeq-a. Aerkhawf, Sanqpaq Miqyaer nae panmaeq naeqlaf-euq deuq hawr-eu mawrle-euq deuq-euq garkawv ngar ja’naeq ma de-eq.

² Dzeurlaf-euq 14 khof-anr, mq-euq khoertav smq tiv tiqtiv-anr bi ciqdav lef-euq Kali-euq lafkhoer jawr-eu tiq ghaq-anr ngar siqnya ma. Mawrdo davler-euq maqsiq, saflar taef-aer davler-euq maqsiq, Miqyaer taef-aer siqnya-eu mae.

³ Ngar, tsawrhaq khoerghaq-anr siqnya ma. Mawrdo davler-euq maqsiq, saflar taef-aer davler-euq maqsiq, Miqyaer taef-aer siqnya mae.

⁴ Aqyawf, Baqlaqdirsuv laer kur-eu jawrduq-anr bi ciqdav lef-awr, tsawrhaq tiqghaq-iq maqngaeq maq tmrnya-eu uqtaf, maq ngaeqkhmq-eu dawq yagaq-euq mae.

⁵ Ngar, tsawrhaq khoerghaq-euq garkawv khanqsaer jaev ma. Aerkhawf, ngaq-euq garkawv-aq, ghaq baq-eu garkawv maqngeur nar-aq, khanqsaer maqjaev.

⁶ Ngar khanqsaer jaevmawf-eu law-awr khawf, ngar, aqdzawq argan maqgeuf. Aqjeq mirnae aernar-aq, ngar yawtsaq yawdawr taef-aer ngaeq-eu ma. Aerkhawf, ngaq nae mr-euq jeq-anr ya’mawr-awr, ngaq nae ngaeq-euq dawq-anr yagaq-euq taf-aer, tsawrhaq tiqghaq-iq ngaq-anr ardzaeq-aer maqbi noeqhuiqdzeur mawf-eu mirnae, ngar tiqjeq-iq maqpar ngaeq ma.

Pawrluv-anr Tsawvluf-eu Aqgan

⁷ Ngar panmaeq-eu jeq ghawqmya jeq-anr ya’mawr-eu mirnae, ngar nuima ardzaeq-aer maqbi huiqni, ngaq-euq shiqshaq mawrdo-anr aqgan tiqgan tsawvluf-eu mae. Aqgan khoer-aq, naef Saqdaq-euq ghaqkhaer pyeuf-awr, ngar nuima ardzaeq-aer maqbi huiqni ngaq-anr khaeqluf-eu mae.

⁸ Ngar, Sanqpaq Miqyaer-anr aqgan heu gheudovdzae naeqlaf laer, smq pov keuvni shar-euq ma.

⁹ Aerkhawf, aqyawf, ngaq-anr aernaeq laf-eu, “Ngaq-euq guiqlanq yawdzanr, nawq-euq gharduq lof mae. Aqjeq mirnae aernar-aq, tsawrhaq ghaq baq-eu tsanr-anr ngaq-euq ghaq byanlar taef-a.” Khoermirnae, Kali-euq baoq ngaq-anr joeshmr-awr javnya’ni, ngar, ngaq-euq ghaq baq-eu garkawv, laqkhaq caertavni khanqsaer jaevmawf mir-a.

¹⁰ Khoermirnae, ngar, Kali-euq gharduq laqkhaq caertavni, ghaq baq-eu, yaeqbawq-aer aerlar-eu, nym-awr ju-eu, khaeq-awr khav-eu, nuima shaqzanq mr-eu, heudeuq-anr daq-eu ma. Aqjeq mirnae aernar-aq, ngar ghaqbaqbaq ngae, ngar ghaq khav-eu ma.

Ghaqkhaer Ngar-a Laer Siqlar-eu Jeq

¹¹ Nawmaf, ngaq-anr katir-eu mirnae, ngar khanqsaer jaev-eu lafkhoer aqdzawq argan pyeuf-ir-euq mir-a. Aqdir aernar-aq, nawmaf, ngaq-anr ciqpoeq paq-aer ghae-eu mae. Aqjeq mirnae aernar-aq, ngar tiqjeq-iq bym-awr nya-eu tsawrhaq maqngeur-eu khawf, huiq-awr manr-eu ghaqkhaer khoerdeuq taf-aer teqdzaeq-eu maqngeur.

¹² Ngar ghaqkhaer ngar-a laer aqdir bisiq bimawr-eu jeq-aq, nawmaf naeq-aer jawr ngae, yawqjeq navluf daq-awr or-eu, bisiq bimawr-eu jeq, zanqler paq-aer ghae-eu jeq hawr-eu, baoq huiq-eu deuq mr-euq ma.

¹³ Ngar, nawmaf-euq gharduq khavbaev maqpyeuf-euq khoer maqngeur nar-aq, Kalizaq armur nuideuq taf-aer taqteq-euq aqgeu jeq jav-eu la? Ngaq-euq yawlaeq heu-anr nawmaf iqbax pyaeqnaeq laf-awq!

Pawrluv, Kalizaq Armur-anr Gaq-eu

¹⁴ Nymq-mr ngar smq pov tiqpov, nawmaf jawr-eu gar oe ma laer laeqhmq taq-euq ma. Heupov khawf, nawmaf-anr khavbaev maqbi dar. Aqjeq mirnae aernar-aq, ngar, nawmaf-euq pyurshuir myawqganq-anr geufmawf-eu maqngeur, ngar-aq, nawmaf-anr taef-aer geufmawf mir-a. Zaqdeuq-aq, aqma aqda-euq gharduq pyurshuir ya povuiq taq-eu maqngeur-a. Aerkhawf, aqma aqda deuq, zaqdeuq-euq gharduq pyurshuir ya povuiq taq-eu mae.

¹⁵ Ngar, nawmaf-anr gaq-eu myaqlarluf ngae, nawmaf, ngaq-anr gaq-eu cuiv-ir luf-eu khawf, nawmaf-euq nuima saflar gharduq, laqkhaq caertavni ngar jav-eu jeq zmq-awr, ngaq-euq mawrdo-anr khawf bizmq ma.

¹⁶ Dzeurlaf ngae, ngar, nawmaf-euq gharduq khavbaev maqpyeuf-aq. Aerkhawf, ngar tsawrganr zmq-awr, nawmaf-anr cawqtawv-awr cawqza-euq ma!

¹⁷ Ngar, nawmaf jawr-eu gar khaerghae lef-euq tsawrhaq khoerdeuq-anr ghoe-awr, nawmaf-euq pyurshuir myawqganq-anr shuirdzaq-euq jav-a lor?

¹⁸ Ngar, Tirtuv-anr shar-awr aqdui-euq maernmr tiq ghaq khawf, aqyawf naeq-aer bi’oe-euq ma. Tirtuv, nawmaf-euq pyurshuir myawqganq shuirdzaq-aq laq? Nga’nyaf nuima tiqgar tsaq-awr, kuirciq gmluf-eu maqngeur-a lor?

¹⁹ Nawmaf nymq-mr keuvni, nga’maf, yawqha-euq garkawv jashaw-eu laer ja-eu nga laer taef-aer noeq-eu le siq laq? Nga’maf-aq, Miqyaer-euq maeqshi Kali-euq lafkhoer ngaeqluf-eu ma. Ngar zawr gaq-eu cawqdeuq-or! Heudeuq dawqtawvluf nawmaf bihuiq bi manrlar-eu laer mrluf-eu ma.

²⁰ Ngar, nawmaf jawr-eu gar oekeuv ngae, ngar noeqtmq-eu lof-aer nawmaf maqpyeuf-aer, nawmaf noeqtmq-eu lof-aer ngar khawf maqpyeuf-eu law maqsiq laer guv mir-a. Iqdaeq iqcae dov-eu, myavnav nav-eu, nuima ardzaeq-aer paer-eu, yawqha-euq gharduq taef-aer tov-eu, jabu jadoer-eu, dawqdoer khoeqsav-eu, nuima huiq-eu hawr-eu suqsaq larni janr-eu, heudeuq jav-eu paq laer ngar khanqlanr mir-a.

²¹ Ngar paroe ngae, ngaq-euq Miqyaer, nawmaf-euq maeqshi ngaq-anr daqga paq-aer janrnaeq laf-eu gar guv mir-a. Dzeurlaf ngae, maqshawr-eu jeq mr-euq, banq-awr muv-euq, jawflafni daef-euq, khoerlof-aer mr-euq tsawrhaq ghawqmya ghaq nymq-mr keuvni maq noeqpov-eu mirnae, ngar tsawrngoer ya’ngoer-eu paq laer guv mir-a.