2 Gawˇliˬtu 1 - Yawshawr Yaerbof Dawqma Sarjax Yawshuif Jaceuq-eu Hawr-eu Dawqdaq

Dawqcawq Puq-eu Dawq

¹ Ngar-aq, Miqyaer nuima tsaq-eu mirnae, Yeqsur Kali-euq ghaqkhaer geufluf-eu Pawrluv ma. Gawrliqtu-anr jawr-eu Miqyaer-euq Kalizaq armur hawr-eu, Aqgaqyar mirkhanq doeni jawr-eu tsawrshawr dawqtawv luf-anr, aqdui-euq maernmr Tivmorseq, nga’nyaf sanqbof bofanr lef-eu ma.

² Aqdui-euq Aqda Miqyaer hawr-eu Sanqpaq Yeqsur Kali-euq guiqlanq yawdzanr hawr-eu, nuisar of-eu jeq nawmaf-euq khoertav jav luf-ur.

Pawrluv Shaqzanq Yadaq-euq

³ Aqdui-euq Sanqpaq Yeqsur Kali-euq Aqda Miqyaer-anr jaceuq kar-eur. Aqyawf-aq, ghawqshaq gaqnya-eu Aqda pyeuf-awr, yawqjeq navluf-euq lafkhoer nuima bi sarlar-eu Miqyaer mae.

⁴ Miqyaer, aqdui-anr nuima bi sarlar-euq lof-aer, khaeq-awr khav-eu kharngeur-eu jeq-anr yadaq-eu tsawrhaq-anr nuima bi sarlar nya’ni, aqdui nae yadaq-euq khaeq-awr khav-eu yawqjeq navluf-euq lafkhoer, aqyawf, aqdui-anr nuima bi sarlar naeqlaf-euq mae.

⁵ Kali yadaq-euq shaqzanq deuq aqdui-euq lafkhoer ghawqmya’ni jav-eu lof-aer, Kali-euq baqda’nae nuima sarlar-eu jeq khawf ghawqmya’ni jav-eu mae.

⁶ Nga’maf shaqzanq-anr ya daqluf-eu ngeur nar-aq, nawmaf kakhof-eu jeq biza-awr, nuima bi sarlar-eu gharduq ma. Nga’maf nuima sar nar-aq, nawmaf kakhof-eu jeq biza-awr, nuima bisar-eu gharduq ma. Nga’maf yadaq-euq shaqzanq-anr nawmaf yadaq ngae, nawmaf khawf daqcoer taef-a.

⁷ Nga’maf, nawmaf-anr noeqtmq taq-euq jeq-aq, zifdanni javluf-eu ma. Aqjeq mirnae aernar-aq, nga’maf ya daqluf-eu shaqzanq-anr nawmaf khawf daq-euq lof-aer, nga’maf nae za-euq nuima sarlar-eu jeq, nawmaf khawf za taef-a laer siqnya ma.

⁸ Aqyuif aqnyir deuq-or! Arhu nga’maf, Aqsir mircoer-anr jawr ngae yadaq-euq shaqzanq deuq, nawmaf-anr bi siqmawf mir-a. Nga’maf-euq khoertav keuvle-euq khavbaev ardzaeq kandzeur-eu mirnae, nga’maf maqpar yadaef-eu jeq mir-a laer noeq-euq ma.

⁹ Yashir mae laer nga’maf-euq khoertav dartsaev taq-euq jeq jav-eu khoer-aq, nga’maf yawqhar yawqha maqghoe-aer, shir-euq gar nae bi ghofdaef lar-eu Miqyaer-anr taef-aer bighoe-eu gharduq mae.

¹⁰ Aqyawf-aq, khoernavni khav-eu shir-eu jeq-euq lafkhoer nga’maf-anr bibuq-ir naeqlaf-awr, nymq-mr khawf bibuq-ir naeqlaf luf-eu uqtaf, aqkar khawf parbi buq-ir naeqlaf taef-a laer nga’maf, aqyawf-anr noeqtmq luf-eu ma.

¹¹ Nawmaf khawf, nga’maf-anr guiqlanq sharcaw naeqlaf-awq. Tsawrhaq ghawqmya’ni guiqlanq sharluf-eu mirnae, nga’maf nae za-euq lafsawq-euq gharduq, tsawrhaq ghawqmya’ni Miqyaer-anr jaceuq taef-a.

Pawrluv Nae Maeq-euq Garkawv

¹² Nga’maf heulof-aer khanqsaer jaev-eu ma. Nga’maf, mirtsaqzaq-euq maeqshi khawf, khoernav maqtser nawmaf-euq maeqshi khawf, Miqyaer-anr yawzeu baw-awr nuima shawrjaevni taq-awr, Miqyaer-euq lafkhoer dawrcoeni daef-euq ma laer, nga’maf-euq zaqsiq nuisiq sarkir kamqluf-eu mae. Nga’maf shiqshaq-euq zaqsiq tsawrganr-anr ghoe-awr nae maqngeur-eu, Miqyaer-euq guiqlanq yawdzanr-anr ghoe-awr khoerlof-aer mr-euq ma.

¹³ Nymq-mr nga’maf, nawmaf guinya-awr ghovshaw nya-eu jeq taef-aer nawmaf-anr bofanr lef-euq ma. Nawmaf arsaqsaq gar keuvni ghovshawnya taef-a laer ngar noeqtmq luf-eu ma.

¹⁴ Nawmaf, nga’maf-anr uicuiv siqnya-eu mae. Khoermirnae, aqdui-euq Sanqpaq Yeqsur-euq arnan ngae nan, nawmaf-euq baqda’nae nga’maf khanqsaer jaevnya-eu lof-aer, nawmaf khawf nga’maf-euq baqda’nae khanqsaer jaevnya taef-a.

¹⁵ Ngar heulof-aer janzif luf-eu mirnae, nawmaf guiqlanq nyiq jeq tiqjeq khawf bi za’ni, ngar, nawmaf jawr-eu gar lar ma laer yawbae ngae nae noeqtaq-euq ma.

¹⁶ Maqgeqdawrniv mirkhanq-anr le-eu paw jaw-aer nawmaf jawr-eu gar urlar-awr, Maqgeqdawrniv mirkhanq-anr nae ghofle ngae khawf, nawmaf jawr-eu gar ghofurle ma laer noeqtaq-euq ma. Khoernar-aq, nawmaf nae ngaq-anr Yurdav mirkhanq-anr bi sheuqha-ir ma laer khawf noeq-euq ma.

¹⁷ Ngar khoerlof-aer noeq-eu-aq, nuima povpov lavlav-aer ghae-euq nga lor? Maqngeur nar-aq, ngar noeq-eu jeq, tsawrhaqzaq-euq nuinoeq pi-awr, ngeur-eu jeq khawf, maqngeur-eu jeq khawf, keuqkeuq soso-aer aer-euq nga laq?

¹⁸ Miqyaer sarjax zif-eu lof-aer, ngaq nae nawmaf-anr aernaeq-euq dawqdeuq-aq, ngeur-eu jeq khawf maqngeur-eu jeq khawf, keuqkeuq soso-aer aer-eu maqngeur.

¹⁹ Aqjeq mirnae aernar-aq, ngar, Siqlav hawr-eu Tivmorseq, nga’maf nae nawmaf-anr dawqmaeq maeqnaeq-euq, Miqyaer-euq Zaqyo Yeqsur Kali-euq garkawv-aq, ngeur-eu jeq khawf, maqngeur-eu jeq khawf, keuqkeuq soso-aer ghae-eu maqngeur-aer, aqyawf-euq lafkhoer-aq ngeur-eu jeq taef mae.

²⁰ Miqyaer nae sarjax dzaqtaq-euq dawqtawvluf Kali-euq lafkhoer ngeur-eu jeq taef mae. Khoermirnae, aqdui, Miqyaer-anr ciqhuiq ciqmanr ngae, Kali-euq lafkhoer Aqmeq laer aer-eu ma.

²¹ Kali-euq lafkhoer nga’maf hawr-eu nawmaf-anr bizif naeqlaf-awr, tsaqtsov naeqlaf-euq ghaq-aq Miqyaer mae.

²² Aqdui-aq, aqyawf-euq tsawrhaq ma laer kamq-eu gharduq, aqyawf, aqdui-euq nuima-euq lafkhoer muiq-eu Saflar bi jawrle-awr, aqdui-euq mawrdo-anr jmq diqtaq-euq mae.

²³ Ngar, Miqyaer-anr kur-awr, ngaq-euq nuima-euq gharduq sarkir bikamq ma. Ngar, Gawrliqtu-anr maqoe-euq khoer-aq, nawmaf-anr maqbi deuqlarni taqnaeq mawf-eu mirnae ma.

²⁴ Nga’maf, nawmaf jan-eu jeq-anr dzoeq-eu laer maqngeur. Nawmaf jan-eu lafkhoer yawfluf-eu mae. Nga’maf-aq, nawmaf laqkhaq caerni nawmaf-euq gar mrcawq pyeuf-eu ma.