1 Yoˇhaˬ 5 - Yawshawr Yaerbof Dawqma Sarjax Yawshuif Jaceuq-eu Hawr-eu Dawqdaq

Mirtsaq-anr Ghaqler-eu

¹ Yeqsur-aq, Kali mae laer kharjan-eu tsawrhaq, Miqyaer-anr nae daefle-euq mae. Miqyaer-anr khargaq-eu tsawrhaq-aq, Aqda Miqyaer-anr nae daefle-euq ghaq-anr khawf gaq taef-a.

² Aqdui, Miqyaer-anr gaq-awr, aqyawf nae biftaq-euq dawq-anr narhaq geuf-eu khoer-aq, aqdui, Miqyaer-euq zaq-anr gaq-eu jeq pyeuf-eu mae laer siqnya-eu ma.

³ Miqyaer-anr gaq-eu laer aer-eu-aq, aqdui, Miqyaer nae biftaq-euq dawq-anr narhaq geuf-eu gar aer-eu mae. Aqyawf nae biftaq-euq dawq-aq, aqdui-euq gharduq kan-eu khavbaev maqngeur-a.

⁴ Aqjeq mirnae aernar-aq, Miqyaer-anr nae daefle-euq yawqghaq navluf, mirtsaq-anr ghaqler-eu mae. Aqdui-euq jan-eu jeq-euq baqda’nae mirtsaq-anr ghaqler-eu ma.

⁵ Mirtsaq-anr ghaqler-eu aqsur ghaq la? Yeqsur-aq, Miqyaer-euq Zaqyo mae laer jan-eu tsawrhaq taef-aer ghaqler-eu mae.

Kali-anr Taf-eu Sarkir

⁶ Heughaq-aq, ircuf hawr-eu shiq-anr nae oe-euq Yeqsur Kali mae. Ircuf-anr nae oe-euq taef maqngeur-a. Ircuf hawr-eu shiq-anr nae oe-euq mae. Muiq-eu Saflar-aq, yawtsaq yawdawr mirnae, Muiq-eu Saflar sarkir kamq-eu mae.

⁷ Mq-euq khoertav sarkir kamq-eu smr ghaq jawr-eu mae: Aqda Miqyaer, Dawq hawr-eu Yawshawr Saflar, heu smr ghaq-aq tiq ghaq taef mae.

⁸ Mirtsaq-euq khoertav sarkir kamq-eu smr jeq jav-eu mae. Khoer-aq, Muiq-eu Saflar, ircuf hawr-eu shiq mae. Heu smr jeq sarkir kamq-eu-aq, tiqgar tsaq-eu mae.

⁹ Tsawrhaq sarkir kamq-eu gar aqdui narhaq-eu ngeur nar-aq, Miqyaer sarkir kamq-eu gar ngeurdzaeq narhaq paq-aer ghae-eu mae. Aqjeq mirnae aernar-aq, Miqyaer sarkir kamq-eu-aq, aqyawf-euq Zaqyo-euq garkawv kamq-eu mae.

¹⁰ Miqyaer-euq Zaqyo-anr kharjan-eu tsawrhaq-aq, yawqha-euq lafkhoer sarkir heu anr-eu mae. Miqyaer-anr maqjan-eu tsawrhaq-aq, Miqyaer-anr jaqmyawf myawf-eu ghaq bipyeuf-ir-euq mae. Aqjeq mirnae aernar-aq, Miqyaer, aqyawf-euq Zaqyo-euq garkawv sarkirkamq gar maqjan-a.

¹¹ Sarkir kamq-eu khoer-aq heulof-aer mae: Miqyaer, aqdui-anr mqmaq maqbyav yarzir daef-eu jeq bif-euq mae. Daef-eu jeq khoer-aq, aqyawf-euq Zaqyo-euq lafkhoer anr-eu mae.

¹² Zaqyo-anr za-euq tsawrhaq-aq, daef-eu jeq za-euq mae. Miqyaer-euq Zaqyo-anr maqza-euq tsawrhaq-aq, daef-eu jeq maqza-a.

Arsaq Saq-eu Dawq

¹³ Ngar garkawv heudeuq, Miqyaer-euq Zaqyo tsawrmyanr-anr jan-eu nawmaf-anr sanqbof bofanr lef-eu-aq, nawmaf mqmaq maqbyav yarzir daef-eu jeq za-euq mae laer yasiq-awr, Miqyaer-euq Zaqyo-euq tsawrmyanr-anr bi jantsaf lef-eu gharduq ma.

¹⁴ Miqyaer-euq maeqshi urler ngae, aqdui heulof-aer yawduq baw-eu ma: aqdui, aqyawf nuima tsaq-eu lof-aer shar nar-aq, aqyawf, aqdui-euq shardawq-anr narhaq naeqlaf-eu mae.

¹⁵ Aqdui kharshar-eu yawqjeq navluf-anr aqyawf narhaq mae laer aqdui siqnya nar-aq, aqdui nae aqyawf-anr kharshar-euq jeq za mae laer aqdui siqnya ma.

¹⁶ Nawmaf tiqghaqnav, yawqha-euq maernmr shir-eu gar maqkeuv-eu iqbax mrluf-eu gar ya’mawr nar-aq, khoerghaq-euq gharduq guiqlanq shar-eu tsaq mae. Miqyaer, khoerghaq-euq saflar-anr bi daeflar taef-a. Shir-eu gar maqkeuv-eu iqbax mr-euq deuq-anr ngar aer-eu taef ma. Shir-eu gar keuv-eu iqbax khawf jav-eu mae, khoerdeuq-euq gharduq yashar-a laer ngar aer-eu maqngeur.

¹⁷ Maqtsaq maqdawr-eu jeq dawqtawvluf iqbax mae. Aerkhawf, shir-eu gar maqkeuv-eu iqbax khawf jav-eu mae.

¹⁸ Miqyaer-euq zaq tiqghaq-iq iqbax mrmr-aer maqdaef-a laer aqdui siqnya ma. Miqyaer-anr nae daefle-euq tsawrhaq-aq, yawqhar yawqha yawmuiq-aer bosav-eu mirnae, yawcawv ghaq, aqyawf-anr maq toeqciv nya-a.

¹⁹ Aqdui-aq, Miqyaer-euq zaqdeuq pyeuf-awr, mirtsaqzaq dawqtawvluf yawcawv khoerghaq uvlanr-eu uqmov jawrluf-eu mae laer siqnya ma.

²⁰ Khoeruqtaf, aqdui, tsaq-awr dawr-eu ghaq-anr siqnya larni, Miqyaer-euq Zaqyo oe-awr, ghovsiq ghovshaw nya-eu jeq bifnaeq laf-euq mae laer siqnya ma. Aqdui, aqyawf-euq Zaqyo, Yeqsur Kali-euq lafkhoer jawrluf-eu mirnae, aqdui, tsaq-awr dawr-eu ghaq-euq lafkhoer jawrluf-awr, aqyawf-aq, aqdir Miqyaer hawr-eu mqmaq maqbyav yarzir daef-eu jeq khawf pyeuf-eu mae laer khawf siqnya-eu ma.

²¹ Ngar gaq-eu zaqdeuq-or! Nawmaf tanqpanq aqma mawrkawr-anr garjaw jaw-awq. Aqmeq.