1 Yoˇhaˬ 4 - Yawshawr Yaerbof Dawqma Sarjax Yawshuif Jaceuq-eu Hawr-eu Dawqdaq

Saflar-anr Tsermr-eu

¹ Ngar zawr gaq-eu cawqdeuq-or! Kharngeur-eu saflar-anr taqjan. Saflar khoer Miqyaer-anr nae oe-euq saflar nga laq laer yawmuiq-aer tsermr haw-awq. Aqjeq mirnae aernar-aq, Miqyaer gharduq ngaeqdan-eu jaqmyawf deuq ghawqmya ghaq mirtsaq doeni dov-ir taq-euq mae.

² Miqyaer-euq Saflar ngeur nar-aq, nawmaf-anr heulof-aer siqlar taef-a: Yeqsur Kali-aq, shiqshaq pi-awr zafka le-euq mae laer kharaer-eu saflar-aq, Miqyaer-anr taf-eu mae.

³ Aerkhawf, Yeqsur Kali-aq, shiqshaq pi-awr zafka le-euq maqngeur-a laer kharaer-eu saflar-aq, Miqyaer-anr maqtaf-a. Heulof-aer ghae-eu saflar-aq, Kali-anr muir-eu ghaq-anr taf-eu mae. Oe taef-a laer nawmaf yagaq-euq khoer, nymq-mr aqyawf, mirtsaq-euq khoertav jawrluf-eu mae.

⁴ Ngar gaq-eu zaqdeuq-or! Nawmaf, Miqyaer-anr taf-eu tsawrhaq pyeuf-awr, nawmaf, aqyawf maf-anr ghaqler-euq mae. Aqjeq mirnae aernar-aq, nawmaf-euq lafkhoer jawr-eu ghaq-aq, mirtsaq-euq khoertav jawr-eu ghaq navmaqtser huiqdzaeq-eu mae.

⁵ Aqyawfmaf mirtsaq-anr taf-eu mirnae, mirtsaq-anr taf-eu garkawv ngaeq-eu mae. Mirtsaqzaq khawf aqyawf maf-euq dawq narhaq-eu mae.

⁶ Aqdui-aq, Miqyaer-anr taf-eu tsawrhaq ma. Miqyaer-anr siqnya-eu tsawrhaq-aq, nga’maf-euq dawq narhaq-eu mae. Miqyaer-anr maqtaf-eu tsawrhaq-aq, nga’maf-euq dawq maq narhaq-a. Khoermirnae, yawtsaq yawdawr jeq-anr taf-eu Muiq-eu Saflar hawr-eu yawbanq yawlaeq jeq-anr taf-eu saflar-anr aqdui siqnya-eu ma.

Miqyaer Gaq-eu Jeq Pyeuf-eu

⁷ Ngar zawr gaq-eu cawqdeuq-or! Aqdui tiqghaq tirghaq gaq kar-eur. Aqjeq mirnae aernar-aq, gaq-eu jeq-aq, Miqyaer-anr nae dovle-euq mae. Gaqnya-eu yawqghaq navluf, Miqyaer-anr nae daefle-awr, Miqyaer-anr siqnya-eu mae.

⁸ Maq gaqnya-eu tsawrhaq-aq, Miqyaer-anr maq siqnya-a. Aqjeq mirnae aernar-aq, Miqyaer-aq, gaq-eu jeq pyeuf-eu mae.

⁹ Zaqyo-euq baqda’nae aqdui daefnya’ni, Miqyaer, aqyawf-euq Zaqyo tiq ghaq taef khawf mirtsaq-euq khoertav bi’oe-euq mae. Miqyaer, aqdui-anr gaq nga laer khoergar nae siqlar-eu mae.

¹⁰ Gaq-eu jeq-aq heulof-aer mae: aqdui, Miqyaer-anr gaq-euq maqngeur-eu, Miqyaer, aqdui-anr gaq-awr, aqdui-euq iqbax tsiqshawr-eu gharduq bi lawrbyan-eu laer aqyawf-euq Zaqyo bi’oe-euq mae.

¹¹ Ngar zawr gaq-eu cawqdeuq-or! Miqyaer, aqdui-anr heunav nav-aer gaq-euq mirnae, aqdui khawf tiqghaq tirghaq gaq-eu tsaq mae.

¹² Tsawrhaq tiqghaq-iq Miqyaer-anr maq mawrhaw-aq. Aqdui tiqghaq tirghaq gaq nar-aq, Miqyaer, aqdui-euq lafkhoer jawr-awr, aqyawf-euq gaq-eu jeq aqdui-euq lafkhoer byanlar taef-a.

¹³ Miqyaer, aqdui-anr aqyawf-euq Saflar-anr taf-eu jeq bifnaeq laf-euq mirnae, aqdui, Miqyaer-euq lafkhoer jawr-awr, Miqyaer khawf aqdui-euq lafkhoer jawr mae laer aqdui siqnya-eu ma.

¹⁴ Mirtsaqzaq-anr Kakhof-eu ghaq bigeuf-eu laer Aqda Miqyaer, aqyawf-euq Zaqyo-anr bi’oe-euq gar aqdui ya’mawr-awr sarkir kamq-eu ma.

¹⁵ Yeqsur-aq, Miqyaer-euq Zaqyo mae laer khar aerdov-eu tsawrhaq-aq, Miqyaer, aqyawf-euq lafkhoer jawr-awr, aqyawf khawf Miqyaer-euq lafkhoer jawrluf-eu mae.

¹⁶ Miqyaer, aqdui-anr gaq mae laer aqdui siqnya-awr jan-eu ma. Miqyaer-aq, gaq-eu jeq pyeuf-eu mae. Gaq-eu lafkhoer jawr-eu tsawrhaq-aq, Miqyaer-euq lafkhoer jawr-awr, Miqyaer khawf aqyawf-euq lafkhoer jawrluf-eu mae.

¹⁷ Yarkhaqdar ngae nan, aqdui nuima zifdanni ghaenya’ni, aqdui-euq lafkhoer gaq-eu jeq byanlar-euq mae. Aqjeq mirnae aernar-aq, mirtsaq-euq khoertav, aqdui khawf, Yeqsur lof-aer pyeufluf-eu ma.

¹⁸ Gaq-eu lafkhoer, guv-eu jeq maqanr-a. Byan-eu gaq-eu jeq-aq, guv-eu jeq-anr taedov-eu mae. Aqjeq mirnae aernar-aq, guv-eu jeq-aq, khaeq-awr khav-eu jeq-anr taf-awr, guvnya-eu tsawrhaq-euq lafkhoer gaq-eu jeq maqbyan-a siq.

¹⁹ Miqyaer, aqdui-anr jeqhu gaq-euq mirnae, aqdui, aqyawf-anr gaq-eu ma.

²⁰ Aqsur ghaq maqkaq, “Ngar, Miqyaer-anr gaq ma” laer aer-eu khawf, yawqha-euq maernmr hawr-eu dmrma-anr byae nar-aq, aqyawf-aq, jaqmyawf myawf-eu tsawrhaq mae. Aqjeq mirnae aernar-aq, aqsur ghaq maqkaq mawrlar-eu maernmr-anr maqgaq nar-aq, maq mawrlar-eu Miqyaer-anr aqjox-aer gaqnya-eu?

²¹ Miqyaer-anr gaq-eu tsawrhaq-aq, yawqha-euq maernmr-anr khawf yagaq-eu mae laer aer-eu dawq khoerdawq-aq, Miqyaer nae aqdui-anr biftaq-euq dawq mae.