1 Yoˇhaˬ 3 - Yawshawr Yaerbof Dawqma Sarjax Yawshuif Jaceuq-eu Hawr-eu Dawqdaq

Miqyaer-euq Zaqdeuq

¹ Aqda Miqyaer, aqdui-anr arnavni gaq-eu nga laer sharnoeqhaw sher-eq. Aqdui-anr Miqyaer-euq zaq laer kurnaeq laf-euq mae. Mirtsaqzaq, aqyawf-anr maq siqnya-eu mirnae, aqdui-anr khawf maq siqnya-a.

² Ngar zawr gaq-eu cawqdeuq-or! Nymq-mr aqdui-aq, Miqyaer-euq zaq ma. Aqkar aqdui aqjox-aer pyeuflar-eu gar maq panmaeq laf-aq siq. Aerkhawf, Kali dovle ngae, aqdui, aqyawf lof-aer pyeuflar taef-a laer siqnya ma. Aqjeq mirnae aernar-aq, aqyawf aqjox-aer pyeuf-eu gar aqdui byacaevni ya’mawr taef-a.

³ Yeqsur-anr heulof-aer noeqtmq-eu yawqghaq navluf, Yeqsur shawr-eu lof-aer, yawqhar yawqha lavshawr-eu mae.

⁴ Iqbax-aq, zanrdawq-anr leur-eu jeq pyeuf-awr, iqbax kharmr-eu tsawrhaq-aq, zanrdawq-anr leur-eu tsawrhaq mae.

⁵ Iqbax-anr yurdzae-eu laer Kali oe-awr, aqyawf-euq lafkhoer iqbax maqanr-a laer nawmaf siqnya-eu mae.

⁶ Aqyawf-euq lafkhoer jawr-eu tsawrhaq aqsur ghaq maqkaq, iqbax maqpar mr-a. Iqbax kharmr-eu tsawrhaq aqsur ghaq maqkaq, aqyawf-anr maq mawrhaw-aer maq siqnya-euq tsawrhaq mae.

⁷ Ngar gaq-eu zaqdeuq-or! Tiqghaq nae-iq nawmaf-anr maershuir taqbi shuirtawv. Tsaq-awr dawr-eu jeq mr-eu tsawrhaq-aq, Kali tsaq-awr dawr-eu lof-aer tsaq-awr dawr-eu tsawrhaq mae.

⁸ Iqbax mr-eu tsawrhaq-aq, naef sanqpaq-anr taf-eu tsawrhaq mae. Aqjeq mirnae aernar-aq, naef sanqpaq-aq, yawbae ngae nae iqbax mrluf-eu mae. Khoermirnae, Miqyaer-euq Zaqyo, naef sanqpaq mrluf-eu gardeuq-anr lavcawv-eu laer oe-euq mae.

⁹ Miqyaer-anr nae daefle-euq aqsur ghaq maqkaq, iqbax maqmr-a. Aqjeq mirnae aernar-aq, Miqyaer-euq aryoeq aqyawf-euq lafkhoer anr-eu mae. Aqyawf, Miqyaer-anr nae daefle-euq mirnae, iqbax maqpar mr-ar.

¹⁰ Khoermirnae, Miqyaer-euq zaq hawr-eu naef sanqpaq-euq zaq beugar-eu byacaevni siqlar-eu mae. Tsaq-awr dawr-eu jeq maqmr-eu tsawrhaq hawr-eu yawqha-euq maernmr-anr maqgaq-eu aqsur ghaq maqkaq, Miqyaer-euq zaq maqngeur-a.

Tiqghaq Tirghaq Gaq-awq

¹¹ Aqdui tiqghaq tirghaq yagaq mae laer aertaq-euq dawq khoerdawq-anr, yawbae ngae nae nawmaf yagaq taq-euq mae.

¹² Yawcawv ghaq-anr taf-eu Gaqirnav lof-aer taqghae. Aqyawf-aq, aqyawf-euq aqnyir-anr saef-euq mae. Aqjeq mirnae saef-euq la laer aernar-aq, aqyawf nae mr-euq jeq-aq, yawdoer pyeuf-awr, aqyawf-euq aqnyir nae mr-euq-aq, tsaq-awr dawr-eu mirnae saef-euq mae.

¹³ Ngaq-euq aqyuif aqnyir deuq-or! Mirtsaqzaq, nawmaf-anr byae nar-aq taq zanqler.

¹⁴ Aqdui-aq, aqyuif aqnyir-anr gaq-eu mirnae, shir-eu jeq-anr nae dovlar-awr, daef-eu jeq-euq lafkhoer urler-euq ma laer siqnya ma. Yawqha-euq maernmr-anr maqgaq-eu tsawrhaq-aq, shir-eu jeq-euq lafkhoer jawrluf-a siq.

¹⁵ Yawqha-euq maernmr-anr kharbyae-eu tsawrhaq-aq, tsawrhaq-anr saef-eu tsawrhaq mae. Tsawrhaq-anr kharsaef-eu ghaq-aq, aqyawf-euq lafkhoer mqmaq maqbyav yarzir daef-eu jeq maqanr-a laer nawmaf siqnya mae.

Gaq-awr Mrdov Laf-eu

¹⁶ Kali, aqdui-euq gharduq shirdan-euq mirnae, gaq-eu laer aqjox-aer ghae-eu gar aer-eu la laer aqdui siqnya ma. Aqdui khawf aqyuif aqnyir-euq gharduq shirdan-eu tsaq mae.

¹⁷ Aqsur ghaq maqkaq, mirtsaq-euq myawqganq jav-awr, yawqha-euq maernmr mawf-eu jeq-anr maq hawdov nya-aer, ghawqshaq gaq-eu nuima piqtaeq nar-aq, Miqyaer-euq gaq-eu jeq aqyawf-euq lafkhoer aqjox-aer anrnya nmr-mq?

¹⁸ Ngar gaq-eu zaqdeuq-or! Aqdui tiqghaq tirghaq gaq-eu jeq, dawq hawr-eu maeqlar nae taef-aer taqgaq. Aerkhawf, yawtsaq yawdawr-euq lafkhoer gaq-awr mrdov shardov laf-awq.

¹⁹ Aqdui khoerlof-aer gaq-eu mirnae, aqdui yawtsaq yawdawr jeq-anr taf-eu tsawrhaq ma laer siqnya-awr, Miqyaer-euq maeqshi aqdui-euq nuima zifdanni jav taef-a.

²⁰ Aqdui-euq nuima yawqhar yawqha yarkhaqdar nar-aq, Miqyaer-aq, aqdui-euq nuima navmaqtser huiq-awr, dawqtawv luf-anr siqnya-eu mae.

²¹ Ngar zawr gaq-eu cawqdeuq-or! Aqdui-euq nuima yawqhar yawqha yarkhaq maqdar nar-aq, Miqyaer-euq maeqshi aqdui-euq nuima zifdanni jav-eu ma.

²² Aqdui, aqyawf nae biftaq-euq dawqdeuq-anr narhaq geuf-awr, aqyawf nuima tsaq-eu lof-aer mr nar-aq, aqdui kharshar-eu yawqjeq navluf za-eu mae.

²³ Miqyaer nae biftaq-euq dawq-aq heulof-aer mae. Aqdui, aqyawf-euq Zaqyo, Yeqsur Kali-euq tsawrmyanr-anr yajan-awr, aqyawf nae dawq biftaq yaf-euq lof-aer tiqghaq tirghaq yagaq-eu mae.

²⁴ Miqyaer nae aqdui-anr bif-euq dawq-anr narhaq geuf-eu tsawrhaq-aq, Miqyaer-euq lafkhoer jawr-awr, Miqyaer khawf aqyawf-euq lafkhoer jawr-eu mae. Miqyaer nae biflef-euq Muiq-eu Saflar baqda’nae, Miqyaer, aqdui-euq lafkhoer jawr mae laer aqdui siqnya-eu ma.