1 Yoˇhaˬ 2 - Yawshawr Yaerbof Dawqma Sarjax Yawshuif Jaceuq-eu Hawr-eu Dawqdaq

Yeqsur-anr Siqnya-eu

¹ Ngar gaq-eu zaqdeuq-or! Nawmaf iqbax maqya mrni, garkawv heudeuq ngar, nawmaf-anr bofnaeq-eu ma. Aerkhawf, tiqghaqnav iqbax mr-euq law nar-aq, aqdui-euq danzar tanqshar-eu tsaq-awr dawr-eu tiq ghaq Aqda Miqyaer jawr-eu gar jawrluf-eu ma. Aqyawf-aq, Yeqsur Kali mae.

² Aqyawf-aq, aqdui-euq gharduq lawrbyan-euq ghaq mae. Aqdui-euq gharduq taef-aer maqngeur-eu, mirtsaqzaq dawqtawv luf-euq gharduq khawf lawrbyan-euq mae.

³ Aqdui, Miqyaer nae biftaq-euq dawq-anr narhaqgeuf nar-aq, aqdui, aqyawf-anr siqnya ngar-a laer siqlar-eu mae.

⁴ “Ngar, aqyawf-anr siqnya ma” laer tiqghaqnav aer-eu khawf, aqyawf nae biftaq-euq dawq-anr maq narhaqgeuf nar-aq, aqyawf-aq, jaqmyawf myawf-eu tsawrhaq pyeuf-awr, aqyawf-euq lafkhoer yawtsaq yawdawr jeq maqanr-a.

⁵ Aerkhawf, Sanqpaq Miqyaer-euq dawq khar narhaq geuf-eu tsawrhaq-aq, Miqyaer-anr gaq-eu jeq aqyawf-euq lafkhoer aqdir byanlar-euq mae. Heu-euq baqda’nae, aqdui, aqyawf-euq lafkhoer jawrluf ma laer siqlar-eu ma.

⁶ Ngar, aqyawf-euq lafkhoer jawrluf ma laer kharaer-eu tsawrhaq-aq, Yeqsur nae daef-euq lof-aer daef-eu tsaq mae.

Dawq Yawshuif

⁷ Ngar zawr gaq-eu aqyuif aqnyir deuq-or! Dawq yawshuif tiq dawq ngar, nawmaf-anr bofanr lef-eu maqngeur. Yawbae ngae nae nawmaf-anr biftaq yaf-awr, nawmaf siqluf-eu dawq yawoer khoerdawq bofanr lef-eu ma. Biftaq yaf-euq dawq yawoer khoerdawq-aq, nawmaf gaqhaw-euq dawq khoerdawq mae.

⁸ Aerkhawf, khaerdawq yawshuif laer aernya-eu tiq dawq ngar, nawmaf-anr bofanr lef-eu ma. Dawq khoerdawq tsaq-awr dawr-eu-aq, Kali-euq lafkhoer hawr-eu nawmaf-euq lafkhoer mawrlar-eu mae. Aqjeq mirnae aernar-aq, yawzanr byov-ir luf-awr, nymq-mr marjawvni ghae-eu yawshaef byadovlar luf-eu mae.

⁹ Tsawrhaq tiqghaqnav, ngar yawshaef-euq lafkhoer jawrluf ma laer aer-eu khawf, aqyawf-euq maernmr-anr byae nar-aq, aqyawf-aq, nymq-mr keuvni yawzanr-euq lafkhoer jawrluf-a siq.

¹⁰ Yawqha-euq maernmr-anr gaq-eu tsawrhaq-aq, yawshaef-euq lafkhoer jawrluf-eu mirnae, aqyawf-euq baqda’nae aqcawq sanqtif tifkhar maqza-a.

¹¹ Aerkhawf, yawqha-euq maernmr-anr byae-eu tsawrhaq-aq, yawzanr-euq lafkhoer jawr-awr, yawzanr-euq lafkhoer canluf-eu mae. Yawzanr khoer aqyawf-anr myavbaef bibaef-ir-euq mirnae, aqyawf aqgar irluf-eu le laer maq siqnya-a.

Saflar Paw-euq Ardeuv

¹² Ngar gaq-eu zaqdeuq-or! Kali-euq tsawrmyanr baqda’nae, nawmaf-euq iqbax-anr pyaeqnaeq-euq mirnae, ngar, nawmaf-anr sanqbof bofanr lef-eu ma.

¹³ Aqda deuq-or! Nawmaf ardanqbae ngae nae daefluf-eu ghaq-anr siqnya-euq mirnae, ngar, nawmaf-anr sanqbof bofanr lef-euq ma. Zaqguq deuq-or! Nawmaf, yawcawv ghaq-anr ghaqler-euq mirnae, ngar, nawmaf-anr sanqbof bofanr lef-euq ma. Ngar gaq-eu zaqdeuq-or! Nawmaf, Aqda Miqyaer-anr siqluf-eu mirnae, ngar, nawmaf-anr sanqbof bofanr lef-euq ma.

¹⁴ Aqda deuq-or! Nawmaf ardanqbae ngae nae daefluf-eu ghaq-anr siqnya-euq mirnae, ngar, nawmaf-anr sanqbof bofanr lef-euq ma. Zaqguq deuq-or! Nawmaf ghaq khav-eu mirnae, ngar, nawmaf-anr sanqbof bofanr lef-euq ma. Miqyaer-euq dawq aqmyanluf nawmaf-euq lafkhoer anr-awr, nawmaf yawcawv ghaq-anr ghaqler-euq mae.

Mirtsaq-anr Taqgaq

¹⁵ Mirtsaq-anr hawr-eu mirtsaq-euq khoertav jav-eu jeq-anr taqgaq. Tsawrhaq aqsur ghaq maqkaq mirtsaq-anr gaq nar-aq, aqyawf-euq lafkhoer Aqda Miqyaer-anr gaq-eu jeq maqanr-a.

¹⁶ Aqjeq mirnae aernar-aq, mirtsaq-euq khoertav kharjav-eu yawqjeq navluf—shiqshaq-euq nuikhanr, myavnuiv-euq nuikhanr hawr-eu daefzir-euq lafkhoer nuima huiq-eu heudeuq-aq, Aqda Miqyaer-anr nae dovle-euq maqngeur-a, mirtsaq-anr nae dovlar-euq mae.

¹⁷ Mirtsaq hawr-eu mirtsaq-anr taf-eu nuikhanr deuq byov-ir luf-eu mae. Aerkhawf, Miqyaer nuima tsaqni mr-eu tsawrhaq-aq, mqmaq maqbyav yarzir yadaef taef-a.

Kali-anr Muir-eu Ghaq

¹⁸ Ngar gaq-eu zaqdeuq-or! Nymq-mr-aq, arsaq saq-eu aryamq mae. Kali-anr muir-eu ghaq dovle taef-a laer nawmaf nae yagaq-euq lof-aer, nymq-mr nae Kali-anr muir-eu ghawqmya ghaq dovlar-euq mae. Khoermirnae, nymq-mr-aq, arsaq saq-eu aryamq nga laer aqdui siqnya ma.

¹⁹ Tsawrhaq khoerdeuq aqdui-euq armur-anr nae dov-ir-euq mae. Aqyawfmaf, aqdui-euq armur-euq lafkhoer jawr ngae khawf, aqdui-anr maqtaf-a. Aqyawfmaf, aqdui-anr taf-eu lawnmr-aq, nymq-mr keuvni aqdui naeq-aer jawrluf taef-a. Aqyawfmaf dov-ir-euq khoer-aq, aqyawfmaf yawqghaq navluf, aqdui-anr maqtaf nga laer byacaevni dovlar-euq mae.

²⁰ Yawshawr ghaq, nawmaf-anr tsaqtsov-euq mirnae, nawmaf yawqjeq navluf-anr siqnya mae.

²¹ Nawmaf yawtsaq yawdawr-anr maq siqnya-eu mirnae, ngar, nawmaf-anr sanqbof bofanr lef-euq maqngeur. Aerkhawf, nawmaf yawtsaq yawdawr-anr siqnya-eu uqtaf, jaqmyawf kharmyawf-eu yawqjeq navluf tsaq-awr dawr-eu jeq-anr nae dovle-euq maqngeur-a laer nawmaf siqnya-eu mirnae bofanr lef-euq ma.

²² Jaqmyawf myawf-eu ghaq aqsur ghaq la? Yeqsur-aq, Kali mae laer maq hageuf-eu khoerghaq maqngeur-a lor? Aqda Miqyaer hawr-eu Zaqyo-anr maq hageuf-eu ghaq-aq, Kali-anr muir-eu ghaq mae.

²³ Zaqyo-anr khar byaerdzae-eu ghaq-aq, Aqda Miqyaer-anr maqtaf-a. Ngar, Zaqyo-anr jan ma laer aer-eu ghaq-aq, Aqda Miqyaer-anr khawf taf-eu mae.

²⁴ Yawbae ngae nae, nawmaf yagaq-euq deuq aqmyanluf nawmaf-euq nuima-euq lafkhoer bi’anr-awq. Yawbae ngae nae, nawmaf yagaq-euq deuq nawmaf-euq nuima-euq lafkhoer anr nar-aq, nawmaf, Zaqyo-euq lafkhoer hawr-eu Aqda Miqyaer-euq lafkhoer khawf jawr-eu mae.

²⁵ Heu-aq, mqmaq maqbyav yarzir daef-eu jeq bif ma laer Kali, aqdui-anr sarjax dzaqtaq-euq mae.

²⁶ Nawmaf-anr maershuir shuirtawv-eu laer laejae-eu deuq-anr taf-eu garkawv, ngar, nawmaf-anr sanqbof bofanr lef-euq ma.

²⁷ Nawmaf, Kali nae tsaqtsov-euq jeq za-awr, tsaqtsov-euq jeq khoer aqmyanluf nawmaf-euq lafkhoer javluf-eu mirnae, tsawrhaqzaq tiqghaq-iq nawmaf-anr maeqnaeq tsovnaeq-eu laer maqya ghae-ar. Aqjeq mirnae aernar-aq, tsaqtsov-euq jeq khoer, nawmaf-anr taf-eu yawqjeq navluf maeqnaeq tsovnaeqlaf taef-a. Tsaqtsov-euq jeq khoer-aq, jaqmyawf maqngeur-a, tsaq-awr dawr-eu mae. Khoermirnae, tsaqtsov-euq jeq nawmaf-anr maeqnaeq tsovnaeq laf-eu lof-aer aqyawf-euq lafkhoer jawr-awq.

²⁸ Ngar gaq-eu zaqdeuq-or! Nawmaf, Kali-euq lafkhoer jawr-awq. Aqyawf-euq lafkhoer jawr nar-aq, aqyawf dovle ngae, aqdui nuima zifdanni ghae-awr, aqyawf oe ngae, aqyawf-euq maeqshi maqya shafdawr-ar.

²⁹ Kali-aq, tsaq-awr dawr-eu ghaq mae laer nawmaf siqnya nar-aq, tsaq-awr dawr-eu jeq kharmr-eu tsawrhaq yawqghaq navluf, aqyawf-anr nae daefle-euq mae laer nawmaf yasiq taef-a.