1 Yoˇhaˬ 1 - Yawshawr Yaerbof Dawqma Sarjax Yawshuif Jaceuq-eu Hawr-eu Dawqdaq

Daef-eu Jeq Bif-eu Dawq

¹ Ardanqbae ngae nae jawrluf-eu daef-eu jeq bif-eu dawq-anr nga’maf yagaq-awr, myavnuiv nae ya’mawr-euq uqtaf, ya hawduq-awr, aqlaf nae ya toeqciv-euq ma.

² Daef-eu jeq khoer byacaevni dovlar-euq gar nga’maf ya’mawr-awr sarkir kamq-eu ma. Khoeruqtaf, yawbae, Aqda Miqyaer naeq-aer jawr-euq li-eu maqbawni daef-eu jeq khoer, nga’maf-anr bimawr naeqlaf-euq garkawv khawf, nawmaf-anr dzawrnaeq-eu ma.

³ Nawmaf khawf, nga’maf naeq-aer cawq ya cawqni, nga’maf ya’mawr yagaq-euq deuq nawmaf-anr ja’maeq-eu ma. Aqdui cawq cawqtaf-eu-aq, Aqda Miqyaer hawr-eu aqyawf-euq Zaqyo Yeqsur Kali naeq-aer cawq cawqtaf-eu jeq pyeuf-eu mae.

⁴ Nawmaf laqkhaq caer-eu jeq byanlarni, garkawv heudeuq nga’maf, nawmaf-anr bofanr lef-eu ma.

Miqyaer-aq, Yawshaef Mae

⁵ Miqyaer-aq, yawshaef mae. Aqyawf-euq lafkhoer yawzanr tiqpawf-iq maqanr-a. Heu-aq, nga’maf, Sanqpaq Yeqsur maeq-eu gar yagaq-awr, nawmaf-anr ja’maeq-eu ma.

⁶ Aqdui, Miqyaer naeq-aer cawq cawqluf ma laer aer-eu gar nae, yawzanr-euq lafkhoer daefluf nar-aq, aqdui jaqmyawf myawf-awr, yawtsaq yawdawr-euq lafkhoer daefluf-eu maqngeur-a.

⁷ Miqyaer, yawshaef-euq lafkhoer jawr-eu lof-aer, aqdui khawf yawshaef-euq lafkhoer daef nar-aq, aqdui tiqghaq tirghaq cawq cawqtaf taef-a. Khoeruqtaf, aqyawf-euq Zaqyo, Yeqsur Kali-euq shiq, aqdui-euq iqbax dawqtawv luf-anr tsiqshawr naeqlaf-eu mae.

⁸ Aqdui iqbax maqanr laer aernar-aq, yawqhar yawqha jaqmyawf myawf-awr, yawtsaq yawdawr jeq aqdui-euq lafkhoer maqanr-a.

⁹ Aqdui yawqha-euq iqbax yawqha aerdov nar-aq, Miqyaer-aq, sarjax zif-awr dawr-awr tsaq-eu lafkhoer, aqdui-euq iqbax pyaeqnaeq laf-awr, aqdui-euq maqtsaq maqdawr-eu dawqtawv luf-anr tsiqshawr naeqlaf-eu mae.

¹⁰ Aqdui iqbax maqmr-aq laer aernar-aq, aqdui, Miqyaer-anr jaqmyawf myawf-eu ghaq bipyeuf-ir-euq gar dur-awr, aqyawf-euq dawq aqdui-euq lafkhoer maqanr-a.