1 Tiˆmoˇseˬ 5 - Yawshawr Yaerbof Dawqma Sarjax Yawshuif Jaceuq-eu Hawr-eu Dawqdaq

Kalizaq-euq Mrjeq Sharkawv

¹ Aqbawr tsawrmawq deuq-anr daeqdaeq-aer taqmaeq. Yawqha-euq aqda laer sawx-awr ghaq bif-awr, aqli zaqguq deuq-anr-aq, yawqha-euq maernmr laer sawx-awr ghaq bif-awq.

² Aqpiq tsawrmawq deuq-anr yawqha-euq aqma laer sawx-awr, aqbur zaqguq deuq-anr yawqdzer dzaq-anr navluf nuima shawrjaevni ghae-eu lafkhoer, yawqha-euq dmrma laer sawx-awr ghaq bif-awq.

Miqcoeq Miqma-euq Garkawv

³ Aqdir miqcoeq miqma deuq-anr yawzeu baw-awr hawpir naeq-awq.

⁴ Miqcoeq miqma tiq ghaq, zaq hawr-eu oeqpaq oeqma jawr nar-aq, yawbae jeq-aq, zaq khoerdeuq-anr yawqha-euq nymrkhanq-euq lafkhoer yawzeu baw-eu jeq bi dzawgeuf-awr, aqma aqda, aqpiq aqbawr deuq-anr yawmuiq jeq mrkhof naeq-eu tsaq mae. Aqjeq mirnae aernar-aq, khoerlof-aer mr-eu-aq, Miqyaer nuima tsaq-eu jeq pyeuf-eu mae.

⁵ Aqdir miqcoeq miqma pyeuf-awr, yawqha tiq ghaq taef-aer jawr-eu ngeur nar-aq, Miqyaer-anr noeqtmq-eu lafkhoer, uqcif nan’ghanr guiqlanq shar-awr, maq tsaevlerni tanqshar luf-eu mae.

⁶ Aerkhawf, lurgha caergha-eu gar gaq-eu miqcoeq miqma-aq, daefluf-eu khawf shir-euq gar dur-eu mae.

⁷ Aqcawq, aqyawf maf-anr aerkhar maqza’ni, garkawv heudeuq nawr, aqyawf maf-anr dawq bif-awq.

⁸ Tsawrhaq tiq ghaq, yawqha-euq tsawrhaq-anr ngaeq maqghae-eu uqtaf, yawqha-euq nymrkhanq-euq zaq-anr keuvni ngaeq maqghae nar-aq, jan-eu jeq-anr byaer-awr, Yeqsur-anr maqjan-eu tsawrhaq navmaqtser doer-eu mae.

⁹ Arkhof 60 khof maq khawvlar-euq hawr-eu tiq zanr taf-aer irdzaeq-euq deuq-anr miqcoeq miqma-euq tsawrmyanr-anr taq bofanr.

¹⁰ Khoeruqtaf, yawmuiq jeq mrluf sharluf mae laer tsawrter dov-awr, zaqdeuq-anr cuhuiq-awr, daqyan-anr ha-euq, tsawrshawr deuq-euq aqkuir dzuifnaeq-euq, shaq-awr zanq-eu tsawrhaq deuq-anr cawba naeq-euq hawr-eu yawmuiq yawqjeq navluf-anr laejae laejae-aer mrluf-eu miqcoeq miqma yapyeuf-eu mae.

¹¹ Aerkhawf, miqcoeq miqma zaqguq deuq-euq tsawrmyanr-anr nawr taq bofanr. Aqjeq mirnae aernar-aq, aqyawfmaf shiqshaq-euq nuikhanr anrlar-awr, Kali-anr byaerdzae-awr, danqdzaq-ir mawflar taef-a.

¹² Aqyawfmaf nae yawbae jan-euq jeq-anr byaerdzae-euq mirnae, yarkhaq dar-eu gar yadaq taef-a.

¹³ Khoeruqtaf, aqyawfmaf tiqnymr sair tiqnymr doedoe-aer dawqdae ghadaq taq-awr, yawdoer doerlar-eu mae. Yawdoer doer-eu taef-aer maqngeur-eu, aqcawq-anr jabu jadoer-awr, maq ngaeqpaq-aer ghae-eu dawq ngaeq-eu uqtaf, aqyawf maf-anr maqtaf-eu aqcawq-euq gar-anr banqgha-eu tsawrhaq pyeuflar taef-a.

¹⁴ Khoermirnae, miqcoeq miqma zaqguq deuq-aq, smrmir ir-awr, zaqciq zaqcu mr-eu lafkhoer, nymrdanq yawmuiq-aer danqdzaq-eu gar ngar geufmawf mir-a. Khoerlof-aer janr nar-aq, aqdui-anr muir-eu tsawrhaq, aqdui-anr yaeqbawq saerlu-aer aerlarkhar maqza-ar.

¹⁵ Aqjeq mirnae aernar-aq, miqcoeq miqma tiqpavnav deuq-aq, garbanq banq-ir-awr, naef Saqdaq-euq maeqnan cantae ghae-euq mae.

¹⁶ Yeqsur-anr jan-eu zaqmiq aqbur, zaqyo aqli aqgeu ghaq maqkaq, yawqha-euq nymrkhanq-euq lafkhoer miqcoeq miqma jawr nar-aq, Kalizaq armur-anr maqbi darni, miqcoeq miqma khoerdeuq-anr yawqha cu-eu tsaq mae. Khoerlof-aer cu nar-aq, Kalizaq armur-aq, aqdir miqcoeq miqma deuq-anr cawba nya-eu mae.

Miqyaer-euq Gar Mrzaq

¹⁷ Kalizaq armur-anr yawmuiq-aer uvlanr-eu aqyuif aqtsu deuq-aq, nyiq bymr byanni taqhuiq naeq-eu gar za-eu geux-eu mae. Aqyawf maf-euq lafkhoer, dawqmaeq maeq-eu hawr-eu dawqmaeq dawqtsov tsov-eu gar mr-eu deuq-anr, ngeurdzaeq taqhuiqnaeq paq-aer ghae-eu mae.

¹⁸ Aqjeq mirnae aernar-aq, “Caer nawqluf-eu mawrner-anr maeqtsanq maqya tsanq-a,” (Dm 25:4) laer Yaerbof-euq lafkhoer boftaq-awr, “Gar mr-eu tsawrhaq-aq, ghaqgarpoeq za-eu geux-eu mae” laer khawf boftaq-euq mae.

¹⁹ Siqduq mawrduq-euq tsawrkaq kharteq-eu nyiq ghaq smr ghaq maqjawr nar-aq, aqyuif aqtsu-anr iqbax taq-eu dawq-anr taq hageuf.

²⁰ Iqbax mrluf-eu deuq-anr tsawrhaq dawqtawv luf-euq maeqshi daeqdaeq-aer maeqnaeq-awq. Khoerlof-aer janr nar-aq, nuideuq khawf guv-eu nuima anrlar taef-a.

²¹ Nawr khoerdeuq mr ngae, noeqdoer hawdoer-awr, myavpyawq huiqnyir tser-eu jeq maqanrni yawmuiq-aer mr-awq laer Miqyaer, Yeqsur Kali hawr-eu tserdov taq-euq mqtav ghaqkhaer-euq maeqshi, ngar, nawq-anr dawq bif-eu ma.

²² Gar mrzaq yawshuif-euq khoertav, aqlaf bafdav-eu taqtaeq. Aqcawq iqbax mr-eu gar maq gmlerni shawrjaevni daef-awq.

²³ Nawr tiqkhaeq maqtaqni jawrsar maqdov-aer, bawma nar-eu mirnae, aqkar nar-aq, ircuf taef-aer taqpar dawr, aqgaf dzaruir khawf uicuivnav dawr-awq.

²⁴ Tsawrhaq tiqpavnav deuq-euq iqbax-aq, byacaevni dovlar-awr, yarkhaq dar-eu gar yadaq-eu mae. Aerkhawf, tiqghaq nav-euq iqbax-aq, maeqnan dovlar taef-a.

²⁵ Khoerlof-aer durni, yawmuiq jeq mr-euq deuq khawf byacaevni dovlar taef-a. Nymq-mr byacaevni maq dovlar-eu deuq khawf maq zaftaq nya-ar.