1 Tiˆmoˇseˬ 4 - Yawshawr Yaerbof Dawqma Sarjax Yawshuif Jaceuq-eu Hawr-eu Dawqdaq

Maeqbanq-eu Jeq-anr Taqjan

¹ Muiq-eu Saflar byacaevni heulof-aer aertaq-euq mae. Arsaq saq-eu arnan aryamq-euq lafkhoer, tsawrhaq tiqpavnav deuq jan-eu jeq-anr byaerdzae taef-a. Aqyawf maf-aq, jaqmyawf myawf-eu saflar deuq-euq dawq-anr hawr-eu naef-euq dawqmaeq dawqtsov-anr narhaqgeuf taef-a.

² Yawmuiq janrgeuf-awr jaqmyawf myawf-eu lafkhoer ngaeq-eu mae. Aqyawf maf-euq zaqsiq nuisiq-aq, shmr puivner-awr tsaeq kataq-euq mae.

³ Miqzaq taqsheuq, smrmir taqir laer aqyawfmaf aer-awr, khoerjeq heujeq maq dzaqkhmq-a laer aer-eu mae. Yawtsaq yawdawr-anr jan-awr siqnya-eu tsawrhaq-aq, Miqyaer-anr jaceuq-awr dzaq nar-aq, dzaqdzaq dawrdawr khoerdeuq-aq, Miqyaer nae baetaq-euq mae.

⁴ Miqyaer nae khar baetaq-euq yawqjeq navluf yawmuiq mae. Miqyaer-anr jaceuq-awr dzaq nar-aq, maq dzaqkhmq-eu tiqjeq-iq maqjav-a.

⁵ Aqjeq mirnae aernar-aq, Miqyaer-euq dawq hawr-eu guiqlanq shardawq-euq baqda’nae, dawqtawvluf muiqlar shawrlar-euq mae.

Muiq-eu Kali-euq Kuirlaf Zaqkhav

⁶ Nawr, aqyuif aqnyir deuq-anr garkawv heudeuq maeqnaeq nar-aq, nawr-aq, Yeqsur Kali-euq muiq-eu kuirlaf zaqkhav pyeuf taef-a. Jan-eu jeq-anr taf-eu dawq hawr-eu muiq-eu dawqmaeq dawqtsov-anr yawmuiq-aer cantae-eu lafkhoer huiqlar taef-a.

⁷ Miqyaer-anr yawzeu maqbaw-eu dawqmawq dawqoer deuq-anr taq narhaq. Miqyaer-anr yawzeu baw-eu siqnya larni nawr yawmuiq-aer mrdzaw-awq.

⁸ Aqjeq mirnae aernar-aq, mawrdo paw ghaq anrlarni mrdzaw-eu jeq-aq, gardanr uicuivnav tsoeq-eu mae. Aerkhawf, Miqyaer-anr yawzeu baw-eu jeq-aq, yawqjeq navluf-euq lafkhoer gardanr tsoeq-eu mae. Khoer-aq, heuzir hawr-eu aqkar karzir-euq gharduq sarjax dzaqtaq-euq mae.

⁹ Dawq heudawq-aq, jancoer paq-aer ghae-awr, tiqbyan tiqlof hageufcoer paq-aer ghae-eu mae.

¹⁰ Khoer baqda’nae, arnyaf laejae-eu lafkhoer gar mr-awr dawqdoer daqluf-eu ma. Aqjeq mirnae aernar-aq, aqdui, daefluf-eu Miqyaer-anr noeqtmq luf-eu ma. Aqyawf-aq, tsawrhaq dawqtawv luf-anr Kakhof-eu ghaq pyeuf-awr, aqyawf-anr jan-eu deuq-euq gharduq, ngeurdzaeq Kakhof-eu ghaq pyeuf-eu mae.

¹¹ Garkawv heudeuq, nawr, aqcawq-anr dawq bif-awr maeqnaeq tsovnaeq-awq.

¹² Nawr zaqguq pyeuf-eu mirnae, aqcawq nae yaeqbawq-aer taqbi hawdoer. Ngaeq-awr tmr-eu paw, mr-awr shar-eu paw, gaq-eu paw, saflar paw, jan-eu paw hawr-eu shawrjaevni daef-eu paw, jan-eu tsawrhaq, nawq-anr hawgeuf dzawgeufduq pyeuf paq-aer daef-awq.

¹³ Ngar oekeuv ngae keuvni, Yaerbof guimaeq-eu, ghaq bif-eu hawr-eu dawqmaeq dawqtsov tsov-eu, heudeuq-anr dawqpaeq taq-awr mrmr-aer jawr-awq.

¹⁴ Aqyuif aqtsu deuq, nawq-euq khoertav aqlaf bafdav-awr, nawq-euq garkawv Miqyaer gharduq ngaeqdan ngae, nawr lafsawq za-euq mae. Nawr lafsawq khoer maq byaerdzaeni zmq-awq.

¹⁵ Garkawv heudeuq-anr dzardziv dziv-awr nawq-euq mawrdo dawqtawvluf lawrnaeq-awr nawr huiqlar manrlar-eu gar yawqghaq navluf mawrnya’ni laejae duidui-awq.

¹⁶ Yawqha-euq dawqmaeq dawqtsov-anr yawmuiq-aer yanryanr-aer daef-awr, khoerdeuq-anr mrdavlef ngae, nawq-euq mawrdo hawr-eu nawq-euq dawq yagaq-euq tsawrhaq deuq khawf yabuq-ir taef-a.