1 Tiˆmoˇseˬ 1 - Yawshawr Yaerbof Dawqma Sarjax Yawshuif Jaceuq-eu Hawr-eu Dawqdaq

Dawqcawq Puq-eu Dawq

¹ Ngar-aq, aqdui-anr Kakhof-eu ghaq pyeuf-eu Miqyaer hawr-eu aqdui-euq noeqtmqduq pyeuf-eu Sanqpaq Yeqsur Kali dawq bifnaeq laf-euq lof-aer, Yeqsur Kali-euq ghaqkhaer geufluf-eu Pawrluv ma.

² Jan-eu paw aqdir ngaqli pyeuf-eu Tivmorseq-anr sanqbof bofanr lef-euq ma. Aqdui-euq Aqda Miqyaer hawr-eu aqdui-euq Sanqpaq Yeqsur Kali-anr nae oe-euq guiqlanq yawdzanr, ghawqshaq gaq-eu jeq hawr-eu nuisar of-eu jeq, nawq-euq khoertav jav luf-ur.

Maeqbanq-eu Deuq-anr Yanr-awq

³ Ngar, Maqgeqdawrniv mirkhanq-anr le-eu laer ghae ngae, tsawrhaq tiqpavnav deuq-anr dawq bibif-eu gharduq, nawq-anr heulof-aer tanqshar-euq ma, “Erpersu-anr jawryaf-awr, ‘Dawqmaeq dawqtsov nuijeq taqpar maeq.

⁴ Khoeruqtaf, dawqmawq dawqoer ja-eu hawr-eu arsaq saq-eu maqbaw-eu tsuif gui-eu gar taq narhaq’ laer aqyawf maf-anr dawq bibif-eu laer khawf ngeur ma.” Garkawv khoerdeuq-aq, jan-eu lafkhoer Miqyaer-euq gar mr-eu gar maq cawba-eu uqtaf, tsawrpyaer pyaer-eu jeq taef-aer bi dovlar-eu mae.

⁵ Dawq bif-eu heu-aq, gaq-eu jeq bi dovlar-eu gharduq ma. Gaq-eu jeq heu, shawrjaevni ghae-eu nuima, muiq-eu zaqsiq nuisiq hawr-eu shawrjaevni jan-eu nuima-euq lafkhoer nae ya dovlar-eu mae.

⁶ Tsawrhaq tiqpavnav deuq-aq, heu-anr byaerdzae yaf-awr, garbanq banq-awr, gardanr maqtsoeq-eu garkawv deuq taef-aer jaluf-eu mae.

⁷ Zanrdawq maeq-eu tsawrhaq geufmawf-eu gar nae, yawqha aqjeq aerluf-eu garkawv maq siqnya-aer, yawha maq ghovshaw nya-eu jeq-anr khaqduqni ngaeq-eu mae.

⁸ Zanrdawq-aq, zmqtsaq nar-aq, yawmuiq mae laer aqdui siqnya-eu ma.

⁹ Aqjeq mirnae aernar-aq, zanrdawq-aq, tsaq-awr dawr-eu tsawrhaq-euq gharduq bijav-euq maqngeur-a. Zanrdawq-anr leur-eu deuq, maq narhaq geuf-eu tsawrhaq, Miqyaer-anr yawzeu maqbaw-eu tsawrhaq, iqbaxzaq deuq, maqshawr-eu tsawrhaq, lavjawf-eu tsawrhaq, aqma aqda-anr saef-eu tsawrhaq, aqcawq-anr saef-eu tsawrhaq,

¹⁰ banq-awr joe-eu tsawrhaq, aqli yawkaq aqli yuftaf joetaf-eu tsawrhaq, tsawrhaq khoeqanq-eu tsawrhaq, jaqmyawf myawf-eu tsawrhaq, maqngeur-eu jeq kamq-eu tsawrhaq hawr-eu tsaq-awr tsanr-eu jan-eu jeq-euq dawqmaeq dawqtsov-anr lavtsoeq lar-eu jeq-euq gharduq zanrdawq bijav-euq mae laer aqdui siqnya-eu ma.

¹¹ Tsaq-awr tsanr-eu jan-eu jeq khoer-aq, ngaq-anr a’naeq laf-euq guiqlanq byan-eu Miqyaer-euq yawshaef khanqsaer huiq-eu guiqlanq dawq-anr tsaqler-eu mae.

Ghawqshaq Gaqnya-eu Miqyaer

¹² Ngar, ngaq-anr ghaq bifnaeqlaf luf-eu aqdui-euq Sanqpaq Yeqsur Kali-anr jaceuq ma. Aqjeq mirnae aernar-aq, ngar-aq, sarjax zif-eu nga laer aqyawf sawx-awr, ngaq-anr khaer-awr guiqlanq-euq gar bi mrnaeq laf-euq mae.

¹³ Dzeurlaf ngae, ngar-aq, aqyawf-anr yaeqbawq saerlu-aer aer-awr, khaeqnaeq khavnaeq-euq uqtaf, khar janrnaeq mawf-eu lof-aer janrnaeq-euq tsawrhaq ma. Aerkhawf, ngar maqjan-eu lafkhoer maq siqnya-aer janr-euq mirnae, aqyawf, ngaq-anr ghawqshaq gaqnaeq laf-euq mae.

¹⁴ Aqdui-euq Sanqpaq Miqyaer-euq guiqlanq yawdzanr myaqgar maq aerjircoer nya. Yeqsur Kali-euq lafkhoer anr-eu jan-eu jeq hawr-eu gaq-eu jeq ngaq-anr bifnaeq laf-euq mae.

¹⁵ “Iqbaxzaq-anr kakhof-eu laer Yeqsur Kali mirtsaq-euq khoertav oe-euq mae” laer aertaq-euq dawq heudawq-aq, jancoer paq-aer ghae-awr, tiqbyan tiqlof hageufcoer paq-aer ghae-eu mae. Ngar-aq, iqbaxzaq-euq lafkhoer aqcawq navmaqtser iqbax huiqdzaeq-eu ghaq ma.

¹⁶ Aerkhawf, Yeqsur Kali arnavni orcoer-eu nga laer aqyawf panmaeqnaeq mawf-eu mirnae, ngar, aqcawq navmaqtser iqbax huiq-eu khawf, aqyawf, ngaq-anr ghawqshaq gaqnaeq laf-euq mae. Khoer-aq, arnan, aqyawf-anr jan-eu baqda’nae mqmaq maqbyav yarzir daef-eu jeq za-eu tsawrhaq deuq bi dzawgeuf-eu gharduq pyeuf-eu mae.

¹⁷ Tsawrhaqzaq-anr maq mawrlar-aer, maq shirnya-eu, mqmaq maqbyav yarzir-euq Sanqpaq pyeuf-awr, aqyawf tiq ghaq taef-aer zaqsiq tsawrganr byan-eu Miqyaer-anr, li-eu maqbawni yawzeu baw-awr, aqyawf-euq yawshaef khanqsaer-anr jaceuq kar-eur. Aqmeq.

Jan-eu Guirdeuv Deuv-eu

¹⁸ Ngaqli Tivmorseq-or! Dzeurlaf ngae, Miqyaer gharduq ngaeqdan-eu deuq nae, nawq-euq garkawv aertaq-euq lof-aer, ngar, nawq-anr dawq heulof-aer bif-eu ma. Dawq khoerdeuq-euq baqda’nae, guirdeuv yawmuiq-aer deuv-awq.

¹⁹ Guirdeuvdeuv ngae, jan-eu jeq-anr hawr-eu muiq-eu zaqsiq nuisiq-anr nyaeftaeq taq-awq. Tsawrhaq tiqpavnav deuq-aq, heudeuq byaerdzae yaf-euq mirnae, lawq cawv-ir-euq lof-aer, aqyawf maf-euq jan-eu jeq cawv-ir-euq mae.

²⁰ Tsawrhaq khoerdeuq-euq lafkhoer, Huqmiqnaer hawr-eu Aqleqsaqdur khawf keuq-eu mae. Miqyaer-anr yaeqbawq saerlu-aer maqya aer-a laer aqyawfnyaf dzawgeufni, ngar, aqyawf nyaf-anr naef Saqdaq-euq aqlaf-euq lafkhoer a’naeq-euq ma.