1 Teˇsaˬloˇni 5 - Yawshawr Yaerbof Dawqma Sarjax Yawshuif Jaceuq-eu Hawr-eu Dawqdaq

Sanqpaq Miqyaer-euq Arnan

¹ Aqyuif aqnyir deuq-or! Aryamq arlaw hawr-eu arkhof arla-euq garkawv, nawmaf-anr sanqbof bofanr lef-eu laer maqya ghae-ar.

² Aqjeq mirnae aernar-aq, uqcif paw smrkhoeq khoeqlar-eu lof-aer, Sanqpaq Miqyaer-euq arnan keuvle taef-a laer nawmaf yawmuiq-aer siqnya-eu mae.

³ “Kharngeur-eu jeq sarlar-awr, tiqjeq-anr-iq guvkhar maqpar za-ar” laer aqcawq jaluf ngae, zaq ciq-eu aqma tiq ghaq nar duidui-eu gar yadaq-eu lof-aer, cawv-ir-eu jeq aqyawf maf-euq khoertav japyuqni keuvle teurle taef-a. Aqyawfmaf maq caevdzeur nya-ar.

⁴ Aqyuif aqnyir deuq-or! Nawmaf yawzanr-euq lafkhoer jawr-eu maqngeur-eu mirnae, arnan khoernan smrkhoeq tanrjoe lof-aer oe ngae, nawmaf zanqlerduq maqjav-a.

⁵ Nawmaf yawqghaq navluf yawshaef-euq zaq hawr-eu nan’ghanr-euq zaq mae. Aqdui-aq, uqcif-anr taf-eu tsawrhaq maqngeur, yawzanr-euq lafkhoer jawr-eu tsawrhaq khawf maqngeur.

⁶ Khoermirnae, aqdui, aqcawq lof-aer maq yufkhavni yawqha-euq nuima-anr ghaqler-awr, yawbeur beur-aer jawr kar-eur.

⁷ Aqjeq mirnae aernar-aq, yufkhav-eu tsawrhaq-aq, uqcif paw yufkhav-awr, jirbaq dawryaef-eu tsawrhaq khawf uqcif paw dawryaef-eu mae.

⁸ Aerkhawf, aqdui-aq, nan’ghanr-anr taf-eu tsawrhaq mirnae, yawha-euq nuima-anr ghaqler-eu tsaq mae. Jan-eu jeq hawr-eu gaq-eu jeq khanq-anr daeqdaq-eu jeq lof-aer dm-awr, kakhof-eu jeq za mae laer noeqtmq-eu jeq, shmr uqkhov lof-aer khov kar-eur.

⁹ Aqjeq mirnae aernar-aq, Miqyaer, aqdui-anr aqyawf-euq nuima paer-eu jeq-anr bidaq-eu gharduq maqngeur-eu, aqdui, Sanqpaq Yeqsur Kali-anr ghoe-awr nae kakhof-eu jeq biza-eu gharduq tserdov taq-euq mae.

¹⁰ Aqyawf, aqdui-euq gharduq shirdan-euq mirnae, aqdui yawnoeq khawf, yufkhav-euq khawf, aqyawf naeq-aer tiqkawv lof-aer yadaef-eu mae.

¹¹ Khoermirnae, nymq-mr nawmaf tiqghaq tirghaq nuima sarlarni mr-awr, huiqlar manrlarni cawba luf-eu lof-aer, maeqhu paw khawf mrghae-awq.

Pawrluv, Aqyawf Maf-anr Ghaq Bif-eu

¹² Aqyuif aqnyir deuq-or! Nga’maf, nawmaf-anr heulof-aer shar-eu ma. Nawmaf-euq ghanrcae laejae-awr mr-eu tsawrhaq-anr yawzeu baw-awq. Aqyawf maf-aq, Sanqpaq Yeqsur-euq lafkhoer nawmaf-anr uvlanr-awr maeqbawq bif-eu mae.

¹³ Aqyawfmaf khoerlof-aer mr-eu mirnae, gaq-eu lafkhoer, aqyawf maf-anr taqhuiq taqmanr naeq-awq. Nawmaf-euq yawkaq khawf tsaqler dzoerler-awq.

¹⁴ Aqyuif aqnyir deuq-or! Nga’maf, nawmaf-anr ghaq heulof-aer parbif-eu ma. Yawdoer tsawrhaq-anr maeqbawq bif-awq. Nuima ghaq baq-eu tsawrhaq-anr ghaq bif-awq. Ghaqbyaev byaev-eu tsawrhaq-anr cawba-awq. Tsawrhaq dawqtawv luf-euq khoertav nuima ghawqmanrni taq-awq.

¹⁵ Nawmaf, aqgeu ghaq maqkaq, aqcawq yawdoer jeq janrlar khawf, yawdoer jeq taq janrkhofnaeq. Nawmaf aqmyanluf laejae-awr tiqghaq tirghaq hawr-eu yawqghaq navluf-anr yawmuiq jeq taef-aer janrnaeq-awq.

¹⁶ Aqmyanluf laqkhaq caer-awq.

¹⁷ Yawqjawr navluf guiqlanq shar-awq.

¹⁸ Yawqjeq navluf-euq lafkhoer Miqyaer-euq guiqlanq-anr jaceuq-awq. Aqjeq mirnae aernar-aq, nawmaf heulof-aer janr-eu-aq, Yeqsur Kali-euq lafkhoer Miqyaer nuima tsaq-eu mae.

¹⁹ Muiq-eu Saflar-anr taq lavmiv.

²⁰ Miqyaer gharduq ngaeqdan-eu tsawrhaq-euq dawq-anr yaeqbawq saerlu-aer taqghae.

²¹ Aerkhawf, yawqjeq navluf-anr pyaevtser haw-awq. Yawmuiq jeq-anr nyaeftaeq taq-awr,

²² yawqdoer yawqjeq navluf-anr garjaw jaw-awq.

²³ Nuisar bif-eu Miqyaer aqyawfghaq, yawqjeq navluf-euq lafkhoer, nawmaf-anr lavshawr-awr, aqdui-euq Sanqpaq Yeqsur Kali zafkale ngae, nawmaf-euq saflar, nuima hawr-eu mawrdo dawqtawvluf aerkhar maqza’ni bosavnaeq luf-ur.

²⁴ Nawmaf-anr kur-euq ghaq sarjax zif-eu mae. Aqyawf khoerlof-aer mr taef-a.

Arsaq Saq-eu Dawq

²⁵ Aqyuif aqnyir deuq-or! Nga’maf-euq gharduq guiqlanq sharcaw naeqlaf-awq.

²⁶ Aqyuif aqnyir yawqghaq navluf-anr shawr-eu maeqsaw nae dawqcawq puq-awq.

²⁷ Sanqbof heu shawr-eu aqyuif aqnyir yawqghaq navluf-anr guinaeq-awq laer ngar, Sanqpaq Yeqsur-euq tsawrmyanr-anr ghoe-awr nawmaf-anr dawq bif-eu ma.

²⁸ Aqdui-euq Sanqpaq Yeqsur Kali-euq guiqlanq yawdzanr nawmaf-euq khoertav jav luf-ur. Aqmeq.