1 Teˇsaˬloˇni 4 - Yawshawr Yaerbof Dawqma Sarjax Yawshuif Jaceuq-eu Hawr-eu Dawqdaq

Miqyaer Nuikhanr Shirni Daef-eu

¹ Aqyuif aqnyir deuq-or! Ngar heulof-aer arsaq saqmawf mir-a. Nga’maf, Sanqpaq Yeqsur-anr ghoeghoe-aer, nawmaf-anr heulof-aer sharshar-aer ghaq bifmawf nya siq. Nawmaf, Miqyaer nuikhanr shirni yawdaef aqjox-aer yadaef-eu garkawv, nga’maf, nawmaf-anr maeqnaeq-euq ma. Nawmaf khoer-euq maeqnan cantae luf-eu lof-aer, maeqhu paw khawf khoernav maqtser laejae laejae-aer cantae ghae-awq.

² Nga’maf nae, nawmaf-anr Sanqpaq Yeqsur-euq tsawrmyanr-euq uqmov dawq bif-euq deuq, nawmaf siqnya mae.

³ Nawmaf yawshawr shawr-aer daefni Miqyaer nuima tsaq-eu mae. Banq-awr khaqmiq sheu-eu jeq taqbi jav.

⁴ Nawmaf yawqghaq navluf yawmuiq yawshawr hawr-eu yawzeu baw-eu lafkhoer, yawqha-euq mawrdo-anr nyaeftaeq-eu siqnya-awq.

⁵ Miqyaer-anr maq siqnya-eu aqcawq tsawrjeuq tsawrca deuq lof-aer, yawqha-euq nuikhanr lavshir-eu laer khar daefmawf-eu lof-aer taqdaef.

⁶ Garkawv heu-anr tafler-awr nae tsawrhaq tiqghaq-iq yawqha-euq aqyuif aqnyir-anr coeqler civlerni, myawf-awr shuir-eu jeq taqmr. Nawmaf yanr de-eq laer dzeurlaf ngae ngar, nawmaf-anr yawkhav khav-aer maeqnaeq-euq lof-aer, Sanqpaq Miqyaer khoerlof-aer janr-euq tsawrhaq-anr yarkhaq darnaeq taef-a.

⁷ Miqyaer, aqdui-anr kur-euq-aq, jawflafni bidaef-eu laer maqngeur-a, yawshawr shawr-aer bidaef-eu laer kur-euq mae.

⁸ Khoermirnae, dawq khoerdawq-anr maq hageuf-eu tsawrhaq-aq, tsawrhaq-euq dawq-anr maq hageuf-eu maqngeur-aer, nawmaf-euq lafkhoer Yawshawr Saflar bi jawrle-euq Miqyaer khoerghaq-euq dawq-anr maq hageuf-eu jeq pyeuf-eu mae.

⁹ Aqyuif aqnyir yawkaq gaq-eu garkawv, nga’maf, nawmaf-anr sanqbof bofanr lef-eu laer maqya ghae-ar. Aqjeq mirnae aernar-aq, tiqghaq tirghaq gaq-awq laer Miqyaer, nawmaf-anr maeqnaeq tsovnaeq-euq mae.

¹⁰ Aqdir aernar-aq, nawmaf, Maqgeqdawrniv mirkhanq doeni jawr-eu aqyuif aqnyir yawqghaq navluf-anr gaqluf-eu mae. Aerkhawf, aqyuif aqnyir deuq-or! Khoernav maqtser gaqdzaeq lar-awq laer nga’maf, nawmaf-anr shar-eu ma.

¹¹ Nga’maf nae nawmaf-anr maeqnaeq-euq lof-aer arpyar daq-awr, ciqcurni daef-eu lafkhoer yawqha-euq gar yawqha mrluiv-eu uqtaf, lafmyawq lafmuv deuq khawf mr-awq.

¹² Khoerlof-aer daef nar-aq, Kalizaq armur-euq lafnyir paw jawr-eu tsawrhaq deuq, nawmaf-anr yawzeu baw-awr, yawqha khawf tiqjeq-iq maqnymni daefnya taef-a.

Sanqpaq Yeqsur Zafka Le-eu Garkawv

¹³ Aqyuif aqnyir deuq-or! Tiqjeq-iq noeqtmq khar maqza-eu tsawrhaq deuq noeqshaq-eu lof-aer nawmaf maqya noeqshaqni, yufkhav dzeur-euq tsawrhaq deuq-euq garkawv, nga’maf, nawmaf-anr maq siqnya-aer maqbi ghaemawf nya.

¹⁴ Yeqsur shir-awr ghofdaef lar-euq mae laer aqdui jan-eu ma. Khoermirnae, Yeqsur-euq lafkhoer yufkhav dzeur-euq tsawrhaq deuq-anr Yeqsur naeq-aer tiqkawv lof-aer Miqyaer sheuqlef taef-a.

¹⁵ Nga’maf, Sanqpaq Yeqsur-euq dawq-anr ghoeghoe-aer nawmaf-anr garkawv tiq kawv aernaeq nyar. Sanqpaq Yeqsur zafkale ngae keuvni yawdaef daefluf-eu aqdui maf-aq, yufkhav dzeur-euq tsawrhaq deuq-euq maeqhu nae ya lekeuv-eu maqngeur-a.

¹⁶ Aqjeq mirnae aernar-aq, Sanqpaq Yeqsur, mq-euq khoertav nae zafkale ngae, dawq bif-eu tersar gurdov lef-awr, mqtav ghaqkhaer yawhuiq ghaq-euq tersar hawr-eu Miqyaer-euq darhae tersar manrdovlef taef-a. Khoerngae, Kali-euq lafkhoer shir-euq deuq jeqhu ghofdaeflar taef-a.

¹⁷ Khoernar-aq, yawdaef daefluf-eu aqdui maf-aq, aqyawfmaf naeq-aer tiqkawv lof-aer Sanqpaq Yeqsur-anr tanqpuq ler-eu laer, mqmir yawkaq-anr mqdmr-euq lafkhoer tiqpov taef-aer bi sheuqdavlef taef-a. Khoernar-aq, aqduimaf, Sanqpaq Yeqsur naeq-aer aqmyanluf yajawr taef-a.

¹⁸ Khoermirnae, nuima sarlarni tiqghaq tirghaq dawq heudeuq jasawx-awq.