1 Teˇsaˬloˇni 3 - Yawshawr Yaerbof Dawqma Sarjax Yawshuif Jaceuq-eu Hawr-eu Dawqdaq

Jan-eu Garkawv Khanqlanr-eu

¹ Nga’maf maq jawrtaeq coerni ghaelar-awr, nga’nyaf taef-aer khawf Aqteq-anr jawryaf ma laer noeqtsaev-euq ma.

² Nawmaf jan-eu jeq zifdanni ghaelarni, ghaq bibif-eu gharduq, nga’maf nae nawmaf jawr-eu gar aqdui-euq maernmr Tivmorseq bilar-euq ma. Aqyawf-aq, Miqyaer-euq kuirlaf zaqkhav pyeuf-awr, Kali-euq guiqlanqdawq maeq-eu, nga’maf-euq gar mrcawq pyeuf-eu mae.

³ Nawmaf khaeq-awr khav-eu ghawqmya jeq yadaq khawf zifnya’ni, nga’maf, aqyawf-anr bilar-euq ma. Aqdui khaeq-awr khav-eu jeq-anr yadaq mae laer nawmaf siqluf mae.

⁴ Aqjeq mirnae aernar-aq, aqdui khaeq-awr khav-eu jeq-anr yadaq taef-a laer nga’maf, nawmaf naeq-aer jawrluf ngae nae aertaq-euq ma. Aertaq-euq lof-aer byanlar luf-eu nga laer nawmaf siqnya-eu mae.

⁵ Khoer baqda’nae, ngar maq jawrtaeqcoer lar-aer, nawmaf jan-eu jeq aqjox-aer pyeufluf-eu nga laer yasiqni, Tivmorseq-anr bilar-euq ma. Murjur jur-eu khoerghaq, nawmaf-anr murza-awr, nga’maf nae laejae-awr mryaf-euq jeq yawqngaef pyeuf-ir-euq baw-mr laer khanqlanr mir-a.

⁶ Aerkhawf, nymq-mr Tivmorseq, nawmaf jawr-eu gar nae ghofkeuv le-awr, nawmaf janluf-eu garkawv hawr-eu gaqluf-eu garkawv, laqkhaq caerlar paq-aer nga’maf-anr dzawrnaeq laf-euq mae. Nawmaf, aqmyanluf nga’maf-anr noeqkeuv luf-awr, nga’maf, nawmaf-anr mawrmawf-eu lof-aer, nawmaf khawf, nga’maf-anr mawrmawf duidui-eu garkawv khawf dzawrnaeq laf-euq mae.

⁷ Khoermirnae, aqyuif aqnyir deuq-or! Nga’maf shaq-awr zanq-eu, khaeq-awr khav-eu yawqjeq navluf-anr yadaq khawf, nawmaf jan-eu garkawv yagaq-awr nga’maf-euq nuima sarlar-euq mir-a.

⁸ Nawmaf, Sanqpaq Yeqsur-euq lafkhoer jawrzifluf nar-aq, nga’maf yawdaef daefluf ma.

⁹ Nawmaf-euq baqda’nae nga’maf, aqdui-euq Miqyaer-euq maeqshi laqkhaqcaer duidui mir-a. Laqkhaq caer-eu heudeuq dawqtawv luf-euq lafkhoer nawmaf-euq gharduq, nga’maf, Miqyaer-anr aqjox-aer jaceuq jircoer nmr-mq!

¹⁰ Nga’maf, nawmaf-anr parya mawr-awr, nawmaf jan-eu maqbyan-eu deuq byanlarni, uqcif nan’ghanr maqaer guiqlanqshar duidui luf-eu ma.

¹¹ Aqdui-euq Aqda Miqyaer hawr-eu aqdui-euq Sanqpaq Yeqsur, nga’maf-anr nawmaf jawr-eu gar sheuqkeuv naeqlaf luf-ur.

¹² Nga’maf, nawmaf-anr gaq-eu lof-aer, nawmaf tiqghaq tirghaq gaq-awr, tsawrhaq dawqtawv luf-anr khawf gaqnya larni, Sanqpaq Yeqsur, nawmaf-euq lafkhoer gaq-eu jeq bi myaqlar bi byanlar luf-ur.

¹³ Khoernar-aq, aqdui-euq Sanqpaq Yeqsur Kali, aqyawf-euq tsawrshawr dawqtawvluf naeq-aer zafkale ngae, aqdui-euq Aqda Miqyaer-euq maeqshi nuima shawrjaevni, aerkhar maqza-aer, aqyawf, nawmaf-euq nuima-anr bi ziflaf taef-a.