1 Teˇsaˬloˇni 2 - Yawshawr Yaerbof Dawqma Sarjax Yawshuif Jaceuq-eu Hawr-eu Dawqdaq

Pawrluv Nae Tersaqlorni-anr Mr-euq Deuq

¹ Aqyuif aqnyir deuq-or! Nga’maf, nawmaf jawr-eu gar lar-euq-aq, yawqngaef maqngeur nga laer nawmaf siqnya mae.

² Nawmaf siqluf-eu lof-aer, dzeurlaf ngae, nga’maf, Pirlirpiv-anr jawr ngae, aqcawq khaeqnaeq khavnaeq laf-awr, yaeqbawq saerlu-aer janrnaeq laf-eu gar yadaq-euq ma. Nawmaf-anr Miqyaer-euq guiqlanqdawq maeqlar ngae, lavtsoeq-eu jeq ghawqmya’ni jav-eu khawf, nga’maf, aqdui-euq Miqyaer-anr ghoeghoe-aer nuima khaqduqni maeq-euq ma.

³ Nga’maf, nawmaf-anr ghaq bif-euq khoer-aq, maqtsaq-eu jeq hawr-eu maqshawr-eu lafkhoer mr-euq maqngeur. Maershuir shuir-eu laer mr-euq khawf maqngeur.

⁴ Aerkhawf, guiqlanqdawq maeqni Miqyaer, nga’maf-anr tsermr ghaq-awr, nga’maf-anr ghoe-awr bimaeq naeqlaf-euq mae. Nga’maf, tsawrhaq nuikhanr shirni maeq-eu maqngeur, aqdui-euq nuima-anr tsermr-eu Miqyaer nuikhanr shirni maeq-eu ma.

⁵ Aqjeq mirnae aernar-aq, nawmaf siqnya-eu lof-aer, maqngeur-eu gar keuvni ciqpoeq ciqpoeq-aer nga’maf maq maeqhaw-aq. Aqcawq-euq myawq-anr maerjuir juir-eu lafkhoer maeq-euq maqngeur-a laer khawf Miqyaer siqnya mae.

⁶ Nga’maf, Kali-euq ghaqkhaer pyeuf-eu mirnae, nawmaf-anr khaernya-eu khawf maqkhaer-aq. Nga’maf, tsawrhaq bifnaeq laf-eu khanqsaer-anr maqpov-aq. Nawmaf bifnaeq laf-eu gar maqaer, aqcawq bifnaeq laf-eu gar maqaer maqpov-aq.

⁷ Aerkhawf, aqcoer dawrzaq-euq aqma yawqha-euq zaq-anr bosav-eu lof-aer, nga’maf, nawmaf naeq-aer jawr ngae, nanqyuni ngaeqghae naeq-euq ma.

⁸ Nga’maf, nawmaf-anr gaqsaef-eu mirnae, nawmaf-anr Miqyaer-euq guiqlanqdawq taef-aer maqngeur-eu, nga’maf-euq daefzir khawf bifpeuq-eu ma. Aqjeq mirnae aernar-aq, nawmaf-aq, nga’maf gaq duidui-eu tsawrhaq ma.

⁹ Aqyuif aqnyir deuq-or! Nga’maf, nawmaf naeq-aer jawr ngae, mrdui shar duidui-awr, laejae duidui-euq gar nawmaf noeqdovlar taef-a. Nawmaf-anr Miqyaer-euq guiqlanqdawq maeqnaeqluf ngae, nawmaf tiqghaq-anr-iq khavbaev maqya pyeufni, nga’maf uqcif nan’ghanr maqaer gar mr-euq ma.

¹⁰ Nga’maf, nawmaf naeq-aer jawr ngae, kharmr kharshaq-euq jeq-aq, yawmuiq yawshawr, tsaq-awr dawr-eu hawr-eu iqbax taqkhar maqza-a laer Kali-anr jan-eu nawmaf hawr-eu Miqyaer khawf sarkir pyeuf-eu mae.

¹¹ Aqda tiq ghaq, yawqha-euq zaq-anr janrnaeq-eu lof-aer, nga’maf khawf nawmaf yawqghaq navluf-anr ghaq bif-awr, nuima bi sarlar-euq gar nawmaf siqnya mae.

¹² Miqyaer uvlanr-eu lafkhoer hawr-eu aqyawf-euq yawshaef khanqsaer-euq lafkhoer urlarni, nawmaf-anr kur-euq Miqyaer-anr geuxni yawdaef daef-awq laer nga’maf, nawmaf-anr dawq bif-euq ma.

¹³ Nawmaf, nga’maf nae maeq-euq Miqyaer-euq dawq yagaq ngae janlar-awr, nawmaf, dawq khoer-anr tsawrhaq-euq dawq laer maqsawx-aer, aqdir aqmar Miqyaer-euq dawq ngar-a laer hageuf-euq mae. Khoeruqtaf, dawq khoer-aq, Sanqpaq Yeqsur-anr jan-eu nawmaf-euq lafkhoer gar mrluf-eu mirnae, nga’maf aqmyanluf Miqyaer-anr jaceuq ma.

¹⁴ Aqyuif aqnyir deuq-or! Yurdav mirkhanq-anr Yeqsur Kali-euq lafkhoer jawr-eu Miqyaer-euq Kalizaq armur deuq-aq, nawmaf-anr hawgeuf dzawgeuf-euq mae. Aqyawfmaf, Yurdav tsawrhaq khaeq-awr khav-eu gar yadaq-euq lof-aer, nawmaf khawf nawmaf-euq tsawrhaq nae khaeq-awr khav-euq gar yadaq-euq mae.

¹⁵ Yurdav tsawrhaq khoerdeuq, Sanqpaq Yeqsur hawr-eu aqyawf maf-euq Miqyaer gharduq ngaeqdan-eu deuq-anr saef-awr, nga’maf-anr khawf taedzae naeqlaf-euq mae. Aqyawf maf-aq, Miqyaer nuima tsaqni maqmr-eu uqtaf, tsawrhaq yawqghaq navluf-anr muir-eu mae.

¹⁶ Nga’maf, aqcawq tsawrjeuq tsawrca kakhof-eu jeq za’ni, dawqmaeq maeq-eu gar lavtsoeq-eu mae. Aqyawfmaf khoerlof-aer janr-eu-aq, aqyawf maf-euq iqbax byanlarni janr-eu mae. Khoermirnae, Miqyaer nuima paer-eu jeq aqyawf maf-euq khoertav tiqbyanni keuvle teurle-euq mae.

Pawrluv, Aqyawfmaf Jawr-eu Gar Lemawf-eu

¹⁷ Aqyuif aqnyir deuq-or! Nga’maf, nawmaf-anr nae tiqkhaeq yaghawq-ir-euq khawf, nawmaf-anr mawrmawf duidui lar-awr, nawmaf-anr ya’mawrni laejae luf-eu ma. Nga’maf-euq mawrdo nawmaf-anr yaghawq-ir-euq khawf, nuima-aq, nawmaf naeq-aer javluf-eu ma.

¹⁸ Khoermirnae, nga’maf, nawmaf jawr-eu gar larmawf-awr, ngar Pawrluv, nawmaf jawr-eu gar larmawf-eu ghawqmya pov keuvlar-euq ma. Aerkhawf, naef Saqdaq, nga’maf-anr lavtsoeq-eu mae.

¹⁹ Aqdui-euq Sanqpaq Yeqsur zafkale ngae, aqdui, aqyawf-euq maeqshi yawfler ngae, nga’maf-euq noeqtmqduq, laqkhaq caerduq hawr-eu nga’maf nuima huiqduq pyeuf-eu shuir uqkhov aqgeu jeq la? Yawqjeqyawq maqngeur-a, nawmaf mae.

²⁰ Aqjeq mirnae aernar-aq, nawmaf-aq, nga’maf-euq khanqsaer hawr-eu laqkhaq caerduq ma.