1 Gawˇliˬtu 6 - Yawshawr Yaerbof Dawqma Sarjax Yawshuif Jaceuq-eu Hawr-eu Dawqdaq

Yarkhaq Taqja

¹ Nawmaf-euq yawkaq tiqghaq tirghaq jadzaq-eu jeq dovlar ngae, tsawrshawr deuq jawr-eu gar maqir-aer, maqtsaq maqdawr-eu tsawrhaq jawr-eu gar aqjox-aer yarkhaq ja-ir peuq-eu nya?

² Tsawrshawr deuq mirtsaq heu-anr yarkhaq yadar mae laer nawmaf maq siqnya-eu le laq? Nawmaf, mirtsaq heu-anr yarkhaq yadar-eu ngeur nar-aq, nyir duidui-eu garkawv heu-anr nawmaf yarkhaq darnaeq-eu maqgeux-a lor?

³ Aqdui, mqtav ghaqkhaer-anr yarkhaq yadar mae laer nawmaf maq siqnya-eu le laq? Mirtsaq-euq khoertav daefluf ngae, yapuq ya’mawr-eu heudeuq-anr ngeurdzaeq aqjeq aernyaf nyeuv-eu?

⁴ Daefzir-euq lafkhoer garkawv heulof-aer ghae-eu deuq dovlar ngae, Kalizaq armur maq taqhuiq-eu tsawrhaq-anr, yarkhaq dar-eu ghaq bigeuf-awr bidar-eu laer ghae-eu le lor?

⁵ Ngar, nawmaf bi shafdawr-eu laer heulof-aer aer-eu ma. Aqyuif aqnyir yawkaq jadzaq-eu jeq dovlar ngae, nawmaf-euq lafkhoer dartsaev nya-eu tsawrganr anr-eu tsawrhaq tiq ghaq taef-aer khawf maqjawr-a laq?

⁶ Nawmaf-aq, maernmr yawkaq yarkhaq ja-eu uqtaf, maqjan-eu tsawrhaq-euq maeqshi yarkhaq ja-ir-eu nga siq!

⁷ Nawmaf tiqghaq tirghaq yarkhaq ja-eu teu-aq laeq duidui-eu mae. Aqjeq mirnae aqcawq, nawmaf-anr mrbanq naeqlaf-eu gar maqor-eu le? Aqjeq mirnae aqcawq nae nawmaf-anr maqbi shuirgeuf-eu le?

⁸ Nawmaf-aq, yawbanq mr-awr aqcawq-anr shuirdzaq luf-eu mae. Nawmaf, yawqha-euq aqyuif aqnyir-anr khawf, yawdoer heudeuq janrnaeq luf-eu mae.

⁹ Nawmaf, maqtsaq maqdawr-eu tsawrhaq, Miqyaer uvlanr-eu jeq maqza nya-a laer maq siqnya-eu le lor? Taq noeqlaeq de-eq. Maqtsaq-eu lafkhoer banq-awr joe-eu, tanqpanq aqma mawrkawr-anr uqduq tanq-eu, banq-awr joe-eu, aqli yawkaq aqli maqngeur nar-aq, aqbur yawkaq aqbur banq-awr joe-eu, aqli yawkaq aqli mawrdo anq-eu tsawrhaq deuq,

¹⁰ smrkhoeq khoeq-eu, aqcawq-euq myawq-anr maerjuir juir-eu, jirbaq dawryaef-eu, jabu jadoer-eu hawr-eu, aqcawq-euq myawq-anr khaeqgeuf khavgeuf-eu, heulof-aer ghae-eu tsawrhaq-aq, Miqyaer uvlanr-eu jeq maqza nya-a.

¹¹ Dzeurlaf ngae, nawmaf tiqpavnav deuq khawf khoerlof-aer mr-euq mae. Aerkhawf, nymq-mr Sanqpaq Yeqsur-euq tsawrmyanr-euq uqmov hawr-eu, aqdui-euq Miqyaer-euq Saflar-anr ghoe-awr, nawmaf-anr mrshawr-awr lavshawr-euq uqtaf, tsiqshawr ghaq-euq mae.

Mawrdo-aq, Kali-euq Arsaer Mae

¹² Ngar yawqjeq navluf mrkhmq ma. Aerkhawf, yawqjeq navluf-aer gardanr tsoeq-eu maqngeur-a. Ngar yawqjeq navluf mrkhmq ma. Aerkhawf, ngar, aqgeu jeq-euq baoq-euq uqmov maqkaq maqjawr.

¹³ Dzaqdzaq dawrdawr-aq, uqmav-euq gharduq pyeuf-awr, uqmav-aq, dzaqdzaq dawrdawr-euq gharduq mae. Aerkhawf, Miqyaer heu nyiq jeq luf-anr lavcawv taef-a. Mawrdo-aq, banq-awr khaqmiq sheu-eu gharduq maqngeur-a, Sanqpaq Yeqsur-euq gharduq mae. Sanqpaq Yeqsur khawf mawrdo-euq gharduq mae.

¹⁴ Miqyaer nae Sanqpaq Yeqsur-anr bi ghofdaef lar-euq mae. Aqyawf-euq baoq nae aqdui-anr khawf bi ghofdaeflar taef-a.

¹⁵ Nawmaf-euq mawrdo-aq, Kali-euq arsaer deuq mae laer nawmaf maq siqnya-eu le lor? Ngar, Kali-euq arsaer yur-awr, mawrdo anq-eu tsawrhaq-euq arsaer bipyeuf-ir-eu tsaq taef-a laq? Tiqpawf-iq maqtsaq-ar!

¹⁶ Nawmaf, mawrdo anq-eu tsawrhaq naeq-aer joe-euq tsawrhaq-aq, aqyawf naeq-aer tiqshiq tiqshaq taef-aer pyeuflar-eu mae laer maq siqnya-eu le lor? Aqjeq mirnae aernar-aq, Miqyaer aer-eu, “Aqyawfnyaf tiqshiq tiqshaq taef-aer pyeuflar-euq mae.” (Adb 2:24)

¹⁷ Aerkhawf, Sanqpaq Miqyaer-anr gawf-eu tsawrhaq-aq, aqyawf naeq-aer saflar tiqgar taf-eu mae.

¹⁸ Banq-awr khaqmiq sheu-eu jeq-anr caevdzeur-awq. Tsawrhaqzaq nae kharmr-euq iqbax-aq, mawrdo-euq lafnyir paw mr-eu mae. Aerkhawf, maqtsaq-eu lafkhoer banq-awr joe-eu-aq, yawqha-euq mawrdo-anr mrbanq-eu mae.

¹⁹ Nawmaf-euq mawrdo-aq, Yawshawr Saflar-euq uqduq tanqnymr nymrma mae laer maq siqnya-eu le lor? Yawshawr Saflar-aq, Miqyaer-anr nae oe-awr, nawmaf-euq lafkhoer jawrluf-eu mae. Khoeruqtaf, nawmaf-euq mawrdo-aq, nawmaf-euq maqngeur-a.

²⁰ Aqjeq mirnae aernar-aq, arpoeq bif-awr nawmaf-anr zeurtsaev taq-euq mae. Khoermirnae, Miqyaer-euq pyeuf-eu nawmaf-euq mawrdo hawr-eu saflar-anr nae, Miqyaer-euq yawshaef khanqsaer bi dovlar-awq.