1 Gawˇliˬtu 3 - Yawshawr Yaerbof Dawqma Sarjax Yawshuif Jaceuq-eu Hawr-eu Dawqdaq

Miqyaer-euq Gar Mrcawq

¹ Aqyuif aqnyir deuq-or! Ngar, nawmaf-anr saflar paw-euq tsawrhaq-anr ngaeqcawq-eu lof-aer maq ngaeqcawq nya-eu mirnae, shiqshaq paw-euq tsawrhaq hawr-eu Kali-euq lafkhoer arner zaqnanq-anr ngaeqcawq-eu lof-aer taef-aer ya ngaeqcawq-eu mir-a.

² Ngar, nawmaf-anr dzar yawzae maqbi dzaqni, aqcoer taef-aer bidawr-euq ma. Aqjeq mirnae aernar-aq, dzeurlaf ngae nawmaf dzar yawzae maq dzaqnya-a, nymq-mr keuvni khawf maq dzaqnya lar-euq nga siq.

³ Nawmaf-aq, shiqshaq paw-euq tsawrhaq lof-aer daefluf nga siq. Nawmaf tiqghaq tirghaq myavnav nav-awr, iqdaeq iqcae dovluf-eu uqtaf, nawmaf-euq yawkaq armaf birpav luf-eu nga. Khoerlof-aer janr-eu-aq, nawmaf, shiqshaq paw-euq tsawrhaq lof-aer pyeuf-awr, tsawrhaqzaq lof-aer taef-aer daefluf-eu maqngeur le laq?

⁴ Nawmaf, tiqghaq tirghaq aer-eu, “Ngar-aq, Pawrluv-euq tsawrhaq ma.” “Ngar-aq, Aqpawrluv-euq tsawrhaq ma.” Nawmaf khoerlof-aer aer-eu, shiqshaq paw-euq tsawrhaq lof-aer dur-eu maqngeur-a lor?

⁵ Pawrluv aqsur ghaq la? Aqpawrluv khawf aqsur ghaq la? Nga’nyaf-aq, nawmaf janlarni guiqlanq-euq gar mrzaq taef ma. Sanqpaq Miqyaer nae kharbi mrlaf-euq lof-aer yawqha-euq gar yawqha mrluf-eu ma.

⁶ Ngar-aq, ka-eu ghaq pyeuf-awr, Aqpawrluv-aq, ircuf shaeq-eu ghaq pyeuf-eu mae. Aerkhawf, bihuiq bi maerlar-eu ghaq-aq Miqyaer mae.

⁷ Khoermirnae, ka-eu ghaq hawr-eu ircuf shaeq-eu ghaq huiq-eu maqngeur-a. Huiq-eu ghaq-aq, bihuiq bi maerlar-euq Miqyaer mae.

⁸ Ka-eu ghaq hawr-eu ircuf shaeq-eu ghaq-aq tiqkawv mae. Yawqghaq navluf yawqha nae mrtaq-euq lof-aer yawqha-euq mrpoeq lafsawq za taef-a.

⁹ Nga’nyaf-aq, Miqyaer-euq gar mrcawq ma. Nawmaf-aq, Miqyaer-euq daeyar mae. Nawmaf-aq, Miqyaer tsovluf-eu nymr mae.

¹⁰ Ngar, Miqyaer nae ngaq-anr bifnaeq laf-euq guiqlanq yawdzanr-anr ghoe-awr, tsawrganr anr-eu nymr tsov-eu yawsanr lof-aer gawrdanq baetaq-euq ma. Heunar-aq, yawqghaqyawq khoergar nae ya tsovdavlef taef-a. Aerkhawf, yawqghaq navluf aqjox-aer tsovdav lef-eu le laer yawmuiq-aer sharnoeq-awr tsovdav lef-eu tsaq taef-a.

¹¹ Aqjeq mirnae aernar-aq, Yeqsur Kali-aq, gawrdanq baetaq-euq dawqpaeq pyeuf-eu mae. Tiqghaq-iq nuijeq nae dawqpaeq maq gawqpar nya-a.

¹² Tsawrhaq tiqghaqnav dawqpaeq khoer-anr pyur, shuir, khaqlo saer, darkawq, uqjir, ghovyoeq yur-awr tsovdavlef nar-aq,

¹³ yawqghaq navluf, yawqha nae mrtaq-euq lof-aer dovlar taef-a. Aqjeq mirnae aernar-aq, khoerngae nan aqgeu ghaq aqjeq zmq-awr tsov-euq nga laer byacaevni dovlar taef-a. Tsawrhaq yawqghaq navluf nae mr-awr shar-euq jeq-anr miqdzaq nae panmaeq naeqlaf taef-a.

¹⁴ Tsawrhaq tiqghaqnav gawrdanq baetaq-euq khoer-anr nae tsovdav lef-euq khoer zif nar-aq, aqyawf-euq mrpoeq lafsawq za taef-a.

¹⁵ Tsawrhaq tiqghaqnav nae mr-awr shar-euq deuq-anr miqdzaq nae puivdzae nar-aq, aqyawf smq-ir gar yadaq taef-a. Aerkhawf, aqyawf-aq, miqdzaq-anr nae dzeur-ir-euq lof-aer yabuq-ir taef-a.

¹⁶ Nawmaf-aq, Miqyaer-euq uqduq tanqnymr nymrma pyeuf-awr, Miqyaer-euq Saflar, nawmaf-euq lafkhoer jawrluf-eu mae laer maq siqnya-eu le lor?

¹⁷ Tsawrhaq tiqghaqnav Miqyaer-euq uqduq tanqnymr nymrma-anr lavcawv nar-aq, Miqyaer, aqyawf-anr lavcawv taef-a. Aqjeq mirnae aernar-aq, Miqyaer-euq uqduq tanqnymr nymrma-aq yawshawr mae. Nawmaf-aq, uqduq tanqnymr nymrma mae.

¹⁸ Tsawrhaq tiqghaq-iq, yawqhar yawqha jaqmyawf taqmyawf. Nawmaf-euq lafkhoer tiqghaqnav mirtsaq-euq tsawrganr anr-eu ma laer noeq nar-aq, tsawrganr anrlarni aqdzawq argan geuf-awq.

¹⁹ Aqjeq mirnae aernar-aq, mirtsaq-euq zaqsiq tsawrganr-aq, Miqyaer-euq maeqshi yawdzawq yawgan mae. Yaerbof aer-eu, “Miqyaer, tsawrganr anr-eu tsawrhaq-anr yawqha-euq tsawrganr lanrju-anr yawqha bi pafler-eu mae.” (Yb 5:13)

²⁰ Khoeruqtaf paraer-eu, “Tsawrganr anr-eu tsawrhaq-euq nuinoeq nuidur-aq, yawqngaef mae laer Sanqpaq Miqyaer siqnya-eu mae.” (Jc 94:11)

²¹ Khoermirnae, aqgeu ghaq maqkaq, tsawrhaq-anr nuima taqhuiq. Aqjeq mirnae aernar-aq, yawqjeq navluf nawmaf-euq mae.

²² Pawrluv khawf, Aqpawrluv khawf, Geqpar khawf, mirtsaq khawf, yawdaef jeq khawf, yawshir jeq khawf, nymq-mr pyeufluf-eu deuq khawf, aqkar pyeuflar-eu deuq khawf, dawqtawvluf nawmaf-euq mae.

²³ Nawmaf-aq, Kali-euq mae. Kali-aq, Miqyaer-euq mae.