1 Gawˇliˬtu 15 - Yawshawr Yaerbof Dawqma Sarjax Yawshuif Jaceuq-eu Hawr-eu Dawqdaq

Kali Ghofdaef Lar-euq Garkawv

¹ Khoernav maqtser, aqyuif aqnyir deuq-or! Ngar, nawmaf-anr maeqnaeq-euq guiqlanqdawq heu, nawmaf-anr par dzawrnaeq-eu ma. Nawmaf guiqlanqdawq heu-anr hageuf ghaq-awr, heu-euq lafkhoer yawfluf-eu mae.

² Ngaq nae nawmaf-anr maeqnaeq-euq guiqlanq dawq-anr yawqngaef-aer jan-eu maqngeur-aer, yawmuiq-aer nyaeftaeqtaq nar-aq, guiqlanqdawq heu-euq baqda’nae nawmaf yabuq-ir taef-a.

³ Ngaq nae za-awr nawmaf-anr maeqnaeq-euq yawbae jeq-aq, Yaerbof-euq lafkhoer aertaq-euq lof-aer, Kali, aqdui-euq iqbax-euq gharduq shirdan-awr,

⁴ aqyawf-euq mawrdo bi bafpanq-euq mae. Khoernar-aq, Yaerbof-euq lafkhoer aertaq-euq lof-aer, smq nan keuvlar nar-aq ghofdaef lar-euq mae.

⁵ Khoernar-aq, aqyawf-euq mawrdo Geqpar-anr bimawr-awr, ghaqkhaer 12 ghaq-anr khawf bimawr-euq mae.

⁶ Khoernar-aq, tiqpov-euq lafkhoer taef-aer aqyuif aqnyir 500 ghaq dzaeqni-anr bimawr-euq mae. Tsawrhaq khoerdeuq myaqni tiqpav, iqnan keuvni daefluf-a siq. Aerkhawf, tiqpavnav deuq-aq shir-euq mae.

⁷ Khoernar-aq, Yaqkov-anr bimawr ghaq-awr nae, ghaqkhaer dawqtawv luf-anr khawf bimawr-euq mae.

⁸ Ngar-aq, aryamq tsaq ngae daefle-euq maqngeur-eu khawf, ngaq-anr bi mawrsaqsaq naeqlaf-euq mae.

⁹ Ngar-aq, ghaqkhaer deuq-anr nae aqcawq taf-aer teqdzaeq-eu ghaq ma. Arhu, Miqyaer-euq Kalizaq armur-anr khaeqnaeq khavnaeq haw-euq mirnae, ngaq-anr ghaqkhaer laer bikur-eu maqgeux nya.

¹⁰ Aerkhawf, Miqyaer-euq guiqlanq yawdzanr baqda’nae ngar heulof-aer pyeufluf-eu ma. Aqyawf nae ngaq-anr bifnaeq laf-euq guiqlanq yawdzanr-aq yawqngaef maqngeur-a. Ngar, ghaqkhaer nuideuq dawqtawv luf-euq navmaqtser gar mr-euq ma. Aqdir aernar-aq, ngaq nae mr-euq maqngeur, ngaq-euq lafkhoer anr-eu Miqyaer-euq guiqlanq yawdzanr nae mr-euq mae.

¹¹ Khoermirnae, ngar khawf, aqyawfmaf khawf dawqmaeq maeq-eu baqda’nae nawmaf janlar-euq mae.

Kali Ghofdaef Lar-eu Garkawv

¹² Kali shir-euq gar nae ghofdaef lar-euq mae laer nymq-mr dawqmaeq maeqnaeq luf-eu khawf, aqjeq mirnae nawmaf-euq lafkhoer tiqpavnav deuq shir-euq tsawrhaq ghofdaef lar-eu maqbaw-a laer aerluf-eu la?

¹³ Shir-euq tsawrhaq ghofdaef lar-eu maqbaw nar-aq, Kali khawf maq ghofdaef lar-ar.

¹⁴ Kali maq ghofdaef lar-euq lawnmr-aq, nga’maf dawqmaeq maeq-eu heu yawqngaef mae. Nawmaf jan-eu khawf yawqngaef mae.

¹⁵ Khoeruqtaf, nga’maf-aq, Miqyaer-euq tsawrkaq jaqmyawf pyeuf-ir taef-a. Aqjeq mirnae aernar-aq, Miqyaer, Kali-anr bi ghofdaef lar-euq mae laer nga’maf sarkir kamqluf-eu ma. Aqdir shir-euq tsawrhaq ghofdaef lar-eu maqbaw nar-aq, Miqyaer khawf Kali-anr maqbi ghofdaef lar-ar.

¹⁶ Aqjeq mirnae aernar-aq, shir-euq tsawrhaq ghofdaef lar-eu maqbaw law nar-aq, Kali khawf maq ghofdaef lar-ar.

¹⁷ Kali maq ghofdaef lar-euq law nar-aq, nawmaf jan-eu jeq yawqngaef pyeuf-awr, nawmaf iqbax-euq lafkhoer jawrluf-a siq!

¹⁸ Khoeruqtaf, Kali-euq lafkhoer yufkhav dzeur-euq tsawrhaq deuq khawf cawv-ir jirdzeur-euq taef-a.

¹⁹ Aqdui, Kali-euq lafkhoer noeqtmq-eu heu, heuzir yawdaefdaef ngae-euq gharduq taef nar-aq, aqdui-aq, tsawrhaq dawqtawvluf navmaqtser ur gawrlar paq-aer ghae-eu tsawrhaq mae.

Yabi Lavcawv Saqsaq-eu Muir-eu Jeq

²⁰ Aerkhawf, Kali-aq, shir-euq gar nae ghofdaef lar-awr, yufkhav dzeur-euq tsawrhaq-euq lafkhoer nae siqbae baele-euq arsiq pyeuf-eu mae.

²¹ Tsawrhaq tiq ghaq-euq baqda’nae shir-eu jeq keuvle-euq lof-aer, tsawrhaq tiq ghaq-euq baqda’nae shir-euq gar nae ghofdaef lar-eu jeq javlar-euq mae.

²² Aqdaq-euq lafkhoer tsawrhaq dawqtawvluf shir-euq lof-aer, Kali-euq lafkhoer tsawrhaq dawqtawvluf ya ghofdaeflar taef-a.

²³ Aerkhawf, tsawrhaq yawqghaq navluf yawqha-euq aryamq tsaq ngae ghofdaeflar taef-a. Siqbae baele-euq arsiq-aq Kali mae. Aqkar aqyawf zafkale ngae, aqyawf-euq tsawrhaq deuq ghofdaeflar taef-a.

²⁴ Khoernar-aq, arsaq saq-eu aryamq keuvle taef-a. Khoerngae, dzoeqluf-eu deuq dawqtawvluf, aryaq hawr-eu baoq dawqtawv luf-anr Kali lavcawv-awr, uvlanr-eu jeq Aqda Miqyaer-anr a’naeq taef-a.

²⁵ Miqyaer, muir-eu deuq dawqtawv luf-anr Kali-euq aqkuir-euq uqmov bi jawrlar ngae keuvni, Kali ya uvlanr taef-a.

²⁶ Maeqnan nansaq yabi lavcawv-eu muir-eu jeq-aq, shir-eu jeq mae.

²⁷ Aqjeq mirnae aernar-aq, “Miqyaer yawqjeq navluf, Kali-euq aqkuir-euq uqmov bijawr bijav-euq mae.” Aerkhawf, aqyawf, “Yawqjeq navluf, Kali-euq uqmov bijawr bijav-euq mae,” (Jc 8:5) laer aer ngae, yawqjeq navluf-anr Kali-euq uqmov bijawr bijav-euq ghaq maqkeuq-a laer byacaevni dovlar-eu mae.

²⁸ Yawqjeq navluf Kali-euq uqmov bijawr bijav-euq nar-aq, yawqjeq navluf Kali-euq uqmov bijawr bijav-euq ghaq-euq uqmov, Zaqyo khawf jawr taef-a. Khoerngae, Miqyaer, dawqtawv luf-euq lafkhoer yawqjeq navluf pyeuf taef-a.

²⁹ Shir-euq tsawrhaq ghofdaef lar-eu maqbaw nar-aq, shir-euq tsawrhaq-euq baqda’nae bartirsaq hageuf-euq khoerdeuq-euq garkawv aqjox-aer aer nmr-mq? Shir-euq tsawrhaq maq ghofdaef lar nar-aq, aqjeq mirnae aqyawfmaf, shir-euq tsawrhaq-euq baqda’nae bartirsaq hageuf-eu la?

³⁰ Aqjeq mirnae nga’maf naqliq yawqlaf navluf yanrkhaeq khav-eu jeq-euq lafkhoer ya yawfluf-eu la?

³¹ Aqdui-euq Sanqpaq Yeqsur Kali-euq lafkhoer nawmaf-euq baqda’nae, ngar khanqsaer jaev-awr, nan-anr nae shirluf-eu ma laer ngar aertsaev peuq-eu ma.

³² Tsawrhaqzaq lof-aer ngar, Erpersu-anr jeqzaq yawghae naeq-aer dawfcae cae-euq ngeur nar-aq, ngaq-euq gharduq aqjeq gardanr tsoeq-eu la? Shir-euq tsawrhaq ghofdaef lar-eu maqbaw nar-aq, “Nishawq yashir-eu mirnae, aqdui tiqdaev dzaq-awr dawr kar-eur.” (Isy 22:13)

³³ Maershuir-anr taq tawvler de-eq. “Cawq yawdoer-aq, shaevdzeuf yawmuiq-anr lavcawv-eu mae.”

³⁴ Nawmaf, tsaq-awr dawr-eu paw uqnoeq beurlar-awr, iqbax taqmr. Aqjeq mirnae aernar-aq, tsawrhaq tiqpavnav deuq Miqyaer-anr siqnya-eu tsawrganr maqanr nga. Ngar, nawmaf bi shafdawr-eu laer heulof-aer aer-eu ma.

Ghofdaef Lar-eu Mawrdo

³⁵ Aerkhawf, tiqghaqnav heulof-aer narhaq mawf-eu paq, “Shir-euq tsawrhaq aqjox-aer ghofdaef lar-eu la? Ghofdaef lar-euq mawrdo khoer aqjox-aer ghae-eu la?”

³⁶ Aqdzawq argan-or! Nawq nae ka-euq siqyoeq maqshir-euq nar-aq maq daeflar nya-a.

³⁷ Khoeruqtaf, nawr ka ngae aqkar daeflar-eu arbawq ka-eu maqngeur-aer, siqyoeq ka-eu taef mae. Caer siqyoeq maqngeur nar-aq, nuijeq-euq siqyoeq ka-eu taef mae.

³⁸ Aerkhawf, Miqyaer, aqyawf nuima tsaq-eu lof-aer siqyoeq-anr arbawq bi bawqlar-eu mae. Siqyoeq, aqyawf jeq-anr aqyawf tsaqni arbawq bi bawqlar-eu mae.

³⁹ Khardaef kharjawr-eu yawqjeq navluf-euq shiqshaq, aqyawf tiqjeq taef maqngeur-a. Aerkhawf, tsawrhaq-euq shiqshaq tiqjeq, jeqzaq-euq shiqshaq tiqjeq, arjir tiqjeq hawr-eu ngaqshaq tiqjeq laer baw-eu mae.

⁴⁰ Mq-anr taf-eu mawrdo jav-awr, mirtsaq-anr taf-eu mawrdo khawf jav-eu mae. Mq-anr taf-eu mawrdo-euq khanqsaer-aq tiqjeq pyeuf-awr, mirtsaq-anr taf-eu mawrdo-euq khanqsaer-aq yawqjeqyawq pyeuf-eu mae.

⁴¹ Nanrma-aq, nanrma-euq yawshaef baw-awr, bala khawf bala-euq yawshaef baw-eu uqtaf, aqguir khawf aqguir-euq yawshaef baw-eu mae. Aqjeq mirnae aernar-aq, aqguir tiqsiq tirsiq-euq yawshaef bya-eu beugar-eu mae.

⁴² Shir-euq tsawrhaq ghofdaef lar-eu khawf khoerlof-aer dur-eu mae. Duqpanq-euq mawrdo-aq buf-ir shov-ir taef-a. Ghofdaef lar-eu mawrdo-aq maqbuf maqshov-ir nya-a.

⁴³ Duqpanq-eu mawrdo-aq, khanqsaer maqjav-a. Ghofdaef lar-eu mawrdo-aq, khanqsaer jav-eu mae. Duqpanq-eu mawrdo-aq, ghaq byaev-awr, ghofdaef lar-eu mawrdo-aq, baoq anr-eu mae.

⁴⁴ Duqpanq-eu mawrdo-aq, shiqshaq-euq mawrdo mae. Ghofdaef lar-eu mawrdo-aq, saflar-euq mawrdo mae. Shiqshaq-euq mawrdo baw-eu lof-aer, saflar-euq mawrdo khawf baw-eu mae.

⁴⁵ Khoerlof-aer durni, Yaerbof-euq lafkhoer boftaq-euq, “Tsawrhaq yawbae ghaq pyeuf-eu Aqdaq-aq, daef-eu tsawrhaq pyeuflar-euq mae.” (Adb 2:7) Arsaq saq-eu Aqdaq ghaq-aq, daef-eu jeq bif-eu saflar pyeuflar-euq mae.

⁴⁶ Aerkhawf, saflar-euq mawrdo jeqhu keuvle-euq maqngeur-a, shiqshaq-euq mawrdo jeqhu keuvle-awr nae, saflar-euq mawrdo keuvle-euq mae.

⁴⁷ Yawbae ghaq-aq, mirtsaq shaqjaev-anr nae pyeufdov lar-awr mirtsaq-anr taf-eu mae. Nyiq ghaq tiqghaq-aq, mq-anr nae oe-euq mae.

⁴⁸ Mirtsaq-anr taf-eu tsawrhaq-aq, mirtsaq-euq shaqjaev-anr nae pyeufdov lar-euq ghaq-anr dur-eu mae. Mq-anr taf-eu tsawrhaq-aq, mq-anr nae oe-euq ghaq-anr dur-eu mae.

⁴⁹ Aqdui, mirtsaq nae taevtaq-euq ghaq-euq shaevdzeuf piluf-eu lof-aer, aqkar, mq-anr nae oe-eu ghaq-euq shaevdzeuf khawf yapi taef-a.

⁵⁰ Aqyuif aqnyir deuq-or! Ngar, nawmaf-anr aernaeq nyar. Shiq hawr-eu shaqjir-aq, Miqyaer uvlanr-eu jeq-anr maqza nya-a. Buf-ir shov-ir nya-eu jeq khawf, maqbuf maqshov-ir nya-eu jeq maqza nya-a.

⁵¹ Haeqsher-eq, ngar, nawmaf-anr zaftaq-euq tiq jeq aernaeq nyar. Aqdui dawqtawvluf yashir-eu maqngeur-a. Aerkhawf, aqdui dawqtawv luf-anr lavpar naeqlaf taef-a.

⁵² Arsaq saq-eu darhae tersar bawdovlef ngae, tiqkhaeq larkhaeq, myavtaev tiq taev-euq lafkhoer taef-aer aqdui parlarjir taef-a. Darhae tersar bawdovlef ngae, shir-euq tsawrhaq ghofdaef lar-awr, maqpar bufshov-ir-ar, aqdui khawf parlar taef-a.

⁵³ Buf-ir shov-ir nya-eu heu-anr, maqbuf maqshov-ir nya-eu jeq yadmdav-awr, shirnya-eu heu-anr, maq shirnya-eu jeq yadmdav taef-a.

⁵⁴ Buf-ir shov-ir nya-eu heu-anr, maqbuf maqshov-ir nya-eu jeq dmdav-awr, shirnya-eu heu-anr, maq shirnya-eu jeq nae dmdav ghaq ngae, Yaerbof-euq lafkhoer boftaq-euq dawq heudawq byanlar taef-a. “Ghaqler-eu jeq nae shir-eu jeq-anr myeufanr-euq mae.” (Isy 25:8)

⁵⁵ “Shir-eu jeq-or! Nawq-euq byaqiq aqlaeq? Shir-eu mirkhanq -or! Nawq-euq ghaqler-euq jeq aqlaeq?” (Hs 13:14)

⁵⁶ Shir-eu jeq-euq byaqiq-aq, iqbax mae. Iqbax-euq baoq-aq, zanrdawq mae.

⁵⁷ Aerkhawf, aqdui-euq Sanqpaq Yeqsur Kali-anr ghoe-awr, aqdui-anr bi ghaqler naeqlaf-euq Miqyaer-anr jaceuq kar-eur.

⁵⁸ Khoermirnae, ngar zawr gaq-eu aqyuif aqnyir deuq-or! Nuima zifdanni ghae-awr maqpov maq parlarni, aqmyanluf Sanqpaq Miqyaer-euq gar laejae-awr mr-eu tsawrhaq pyeuf-awq. Aqjeq mirnae aernar-aq, nawmaf nae Sanqpaq Miqyaer-euq gharduq mr-awr shar-eu jeq-aq, yawqngaef maqngeur-a laer siqnya-awq.