1 Gawˇliˬtu 11 - Yawshawr Yaerbof Dawqma Sarjax Yawshuif Jaceuq-eu Hawr-eu Dawqdaq

¹ Ngar, Kali-anr mrcaw-eu lof-aer, nawmaf khawf ngaq-anr mrcaw-awq.

Uqboeq Boeq-eu Garkawv

² Yawqjeq navluf-euq lafkhoer, nawmaf, ngaq-anr noeqkeuv-awr, ngaq nae nawmaf-anr bifyaf-euq lof-aer, zanroer khoerdeuq-anr cantae luf-eu mirnae, ngar, nawmaf-anr jaceuq ma.

³ Aerkhawf, ngar, nawmaf-anr heulof-aer bi siqnya’mawf mir-a. Zaqyo aqli yawqghaq navluf-euq uqduq-aq Kali mae. Zaqmiq aqbur-euq uqduq-aq zaqyo aqli mae. Kali-euq uqduq-aq Miqyaer mae.

⁴ Zaqyo aqli aqgeu ghaq maqkaq, guiqlanqshar ngae hawr-eu Miqyaer gharduq ngaeqdan ngae, uqboeq boeq-eu-aq, yawqha-euq uqduq-anr yaeqbawq-aer janr-eu jeq pyeuf-eu mae.

⁵ Aerkhawf, zaqmiq aqbur aqgeu ghaq maqkaq, guiqlanqshar ngae hawr-eu Miqyaer gharduq ngaeqdan ngae, uqboeq maqboeq-eu ghaq-aq, yawqha-euq uqduq-anr yaeqbawq-aer janr-eu jeq pyeuf-eu mae. Aqjeq mirnae aernar-aq, aqyawf uqboeq maqboeq nar-aq, aqyawf-euq uqduq jaevdzae-euq lof-aer dur-eu mae.

⁶ Zaqmiq aqbur uqboeq maq boeqmawf nar-aq, tsaerkanr taeq-eu tsaq mae. Aerkhawf, tsaerkanr taeq-eu hawr-eu uqjaev jaev-eu, zaqmiq aqbur-euq gharduq-aq, shafdawr-eu jeq pyeuf nar-aq, uqboeq boeq-eu tsaq mae.

⁷ Zaqyo aqli-aq, Miqyaer-euq shaevdzeuf hawr-eu Miqyaer-euq yawshaef khanqsaer pyeuf-eu mirnae, uqboeq boeq-eu maqtsaq-a. Aerkhawf, zaqmiq aqbur-aq, zaqyo aqli-euq yawshaef khanqsaer mae.

⁸ Aqjeq mirnae aernar-aq, zaqyo aqli-aq, zaqmiq aqbur-anr nae bae-euq maqngeur-a. Zaqmiq aqbur-aq, zaqyo aqli-anr nae bae-euq mae.

⁹ Khoeruqtaf, zaqmiq aqbur-euq gharduq, zaqyo aqli-anr bae-euq maqngeur-a. Zaqyo aqli-euq gharduq, zaqmiq aqbur-anr bae-euq mae.

¹⁰ Khoermirnae, mqtav ghaqkhaer-euq gharduq, zaqmiq aqbur deuq aryaq-euq uqmov jawrluf-eu nga laer siqlarni uqboeq boeq-eu tsaq taef-a.

¹¹ Aerkhawf, Sanqpaq Miqyaer-euq lafkhoer, zaqmiq aqbur-aq, zaqyo aqli-anr yaghoe-awr, zaqyo aqli khawf zaqmiq aqbur-anr yaghoe-eu mae.

¹² Aqjeq mirnae aernar-aq, zaqmiq aqbur-aq, zaqyo aqli-anr nae bae-awr, zaqyo aqli-aq, zaqmiq aqbur-anr nae daefle-euq mae. Aerkhawf, dawqtawvluf Miqyaer-anr nae dovle-euq mae.

¹³ Miqyaer-anr guiqlanqshar ngae, zaqmiq aqbur uqboeq maqboeqni shar-eu tsaq-eu nga laq, maqtsaq-eu nga laq laer, nawmaf-euq yawkaq dartsaev-awq.

¹⁴ Zaqyo aqli tsaerkanr ghawqmanrni taq nar-aq, aqyawf-euq gharduq shafdawr-eu jeq pyeuf-eu mae laer baetaq-euq jeq khawf, nawmaf-anr maeqnaeqlaf luf-eu maqngeur-a lor?

¹⁵ Aerkhawf, zaqmiq aqbur tsaerkanr ghawqmanrni taq nar-aq, aqyawf-euq khanqsaer pyeuf-eu mae. Aqjeq mirnae aernar-aq, aqyawf-euq tsaerkanr-aq, aqyawf-anr bi daeqkaq-eu laer bitsof-euq mae.

¹⁶ Tsawrhaq tiqghaqnav heu-euq garkawv tsawrpyaer pyaermawf nar-aq, nga’maf khawf, Miqyaer-euq Kalizaq armur deuq khawf, heu-anr nae beugar-eu zanrsanrkhof yawqjeqyawq maqjav laer siqnya-awq.

Yeqsur-anr Noeqkeuv-awr Dzaq Ngae, Yanr Paq-aer Ghae-eu Jeq

¹⁷ Nawmaf uiqler ngae, bi muiqlar-eu laer maqngeur-eu, bicawv-ir-eu laer uiqler-eu mirnae, nymq-mr ngar, nawmaf-anr maq jaceuq naeqni maeq-eu ma.

¹⁸ Yawbae jeq-aq, Kalizaq armur uiqler ngae, armaf birpav luf-eu mae laer ngar yagaq-euq ma. Ngaq nae yagaq-euq lof-aer tiqpav tsaq-eu dur laer ngar jan ma.

¹⁹ Nawmaf-euq lafkhoer geufnya-eu tsawrhaq aqsur ghaq nga laer siqduq mawrduq larni, maqtsaq maq dzoerler-eu jeq yajav lar-eu mae.

²⁰ Khoermirnae, nawmaf tiqgar uiqler ngae, Sanqpaq Yeqsur-anr noeqkeuv-awr dzaq-eu maqngeur nga.

²¹ Aqjeq mirnae aernar-aq, nawmaf dzaq ngae, aqgeu ghaq maqkaq yawqha nae yurlaf-euq dzaq-eu jeq yawqha jeqhu dzaq-awr, tiqghaq nav-aq, hawq maef-eu uqtaf, tiqghaq nav-aq, jirbaq dawryaef-eu mae.

²² Nawmaf dzaq-awr dawr-eu gharduq, nymr maqjav-eu le lor? Maqngeur nar-aq, Miqyaer-euq Kalizaq armur-anr yaeqbawq-aer janr-awr, dzaqdzaq dawrdawr maqjav-eu deuq bi shafdawr-ir-eu laer janr-eu le laq? Ngar, nawmaf-anr aqjox-aer aernaeq-eu tsaq-eu la? Nawmaf khoerlof-aer janr-eu khawf, ngar, nawmaf-anr ya jaceuq taef-a lor? Ngar, nawmaf-anr maq jaceuq.

Yeqsur-anr Noeqkeuv-awr Dzaq-eu

²³ Ngar, Sanqpaq Yeqsur-anr nae za-euq jeq, ngar, nawmaf-anr bifnaeq-eu ma. Sanqpaq Yeqsur-aq, aqcawq, aqyawf-anr anqdzaq ngae mir, kaqmur yur-awr,

²⁴ Miqyaer-euq guiqlanq-anr jaceuq-euq mae. Khoernar-aq, kaqmur ngawqpyaeq-awr aer-eu, “Yur-awr dzaq-awq. Heu-aq, nawmaf-euq gharduq yapyaeq-ir-euq ngaq-euq mawrdo ma. Nawmaf, ngaq-anr noeqkeuv-eu gharduq heulof-aer janr-awq.”

²⁵ Khoerlof-aer durni, cifhawq dzaqghaq ngae, aqyawf, khmqmaq ciq-awr aer-eu, “Khmqmaq heu-aq, ngaq-euq shiq-anr ghoe-awr nae bif-eu dawqma sarjax yawshuif ma. Nawmaf khardawr ngae, ngaq-anr noeqkeuv-eu gharduq heulof-aer janr-awq.”

²⁶ Aqmyan maqkaq, nawmaf kaqmur heu dzaq-awr khmqmaq heu ciqdawr ngae, nawmaf, Sanqpaq Yeqsur shir-euq garkawv, aqyawf zafkale ngae keuvni, dawqdzawr mr-eu jeq pyeuf-eu mae.

Yawqhar Yawqha Jeqhu Tsermr-awq

²⁷ Khoermirnae, aqgeu ghaq maqkaq, yawzeu maqbawni Sanqpaq Yeqsur-euq kaqmur dzaq-awr, khmqmaq ciqdawr nar-aq, Sanqpaq Yeqsur-euq mawrdo hawr-eu shiq-anr mrbanq-euq mae.

²⁸ Khoermirnae, tsawrhaq yawqghaq navluf yawqhar yawqha jeqhu tsermr-awr nae taef-aer, kaqmur dzaq-awr khmqmaq ciqdawr-eu tsaq mae.

²⁹ Aqjeq mirnae aernar-aq, aqgeu ghaq maqkaq, Yeqsur-euq mawrdo-anr maq noeqsiq maq noeqmawr-aer dzaq-awr dawr nar-aq, yawqhar yawqha yarkhaq dar-eu jeq bi keuvleni dzaq-awr dawr-eu mae.

³⁰ Khoermirnae, nawmaf-euq lafkhoer ghawqmya ghaq, ghaq maqanr-aer narluf-eu uqtaf, heumyav ghaq shir-euq mae.

³¹ Aqdui, yawqhar yawqha jeqhu tsermr nar-aq, yarkhaq dar-eu gar maqya daq-ar.

³² Aqdui, mirtsaqzaq naeq-aer tiqkawv lof-aer yarkhaq dar-eu gar maqya daqni, Sanqpaq Miqyaer, aqdui-anr yarkhaq dar-eu-aq, aqdui-anr diqdiq-aer maeq-eu jeq pyeuf-eu mae.

³³ Khoermirnae, ngaq-euq aqyuif aqnyir deuq-or! Nawmaf dzaq-awr dawr-eu laer uiqler ngae, tiqghaq tirghaq dawq-awq.

³⁴ Nawmaf uiqler ngae, yawqha-euq khoertav yarkhaq dar-eu jeq maqya keuvleni, tsawrhaq tiqghaqnav hawq maef nar-aq, irkanr dzaq-eu tsaq mae. Garkawv nuideuq-aq, ngar, nawmaf jawr-eu gar lar ngae ja’maeqnaeq ma.