1 Gawˇliˬtu 10 - Yawshawr Yaerbof Dawqma Sarjax Yawshuif Jaceuq-eu Hawr-eu Dawqdaq

Dzeurlaf-euq Jeq-anr Hawgeuf-awq

¹ Aqyuif aqnyir deuq-or! Aqdui-euq aqpoeq dawqtawvluf mqdmr-euq uqmov jawr-awr iqmalavshav-anr tsaev-euq mae laer, ngar, nawmaf heu-anr maq siqnya-aer maqbi ghaemawf nya.

² Aqyawfmaf dawqtawvluf mqdmr hawr-eu iqmalavshav-euq lafkhoer bartirsaq hageuf-awr, Morseq-anr gawfler-euq mae.

³ Aqyawfmaf dawqtawvluf saflar-euq dzar aqyawf tiqjeq taef-aer dzaq-awr,

⁴ dawqtawvluf saflar-euq ircuf aqyawf tiqjeq taef-aer dawr-euq mae. Aqyawfmaf nae dawr-euq ircuf-aq, aqyawf maf-euq maeqnan cantae luf-eu saflar-euq logur-anr nae yoerdov lef-euq ircuf mae. Logur khoer-aq, Kali mae.

⁵ Aerkhawf, Miqyaer, aqyawfmaf myaqni tiqpav-anr nuikhanr maqshir-eu mirnae, aqyawf maf-euq mawrdo bawrtsanq bawrdanr-anr doeni bi gayaf-euq mae.

⁶ Aqyawfmaf yawdoer jeq-anr maerjuir juir-euq lof-aer, aqdui khawf maqya juirni, garkawv heudeuq-aq, aqdui hawgeufduq pyeuf-eu mae.

⁷ Aqyawfmaf tiqpavnav deuq tanqpanq aqma mawrkawr-anr uqduq tanq-euq lof-aer nawmaf taqtanq. Yaerbof-euq lafkhoer boftaq-euq lof-aer, “Tsawrhaq khoerdeuq nuir-awr dzaqghaq dawrghaq-euq nar-aq, tur-awr lurgha caergha-euq mae.” (Di 32:6)

⁸ Aqyawfmaf tiqpavnav deuq banq-awr khaqmiq sheu-euq lof-aer, aqdui maqya mr-a. Aqyawfmaf khoerlof-aer mr-euq mirnae, tiq nan-euq lafkhoer taef-aer 23,000 ghaq yashir-euq mae.

⁹ Aqyawfmaf tiqpavnav deuq tsermr haw-euq lof-aer, aqdui, Kali-anr maqya tsermr haw-a. Aqyawfmaf khoerlof-aer janr-euq mirnae, arlawr nae bi tovsaef-euq mae.

¹⁰ Aqyawfmaf tiqpavnav deuq dawqghof dov-euq lof-aer nawmaf dawqghof taqdov. Aqyawfmaf dawqghof dov-euq mirnae, lavcawv-eu ghaq nae bi lavcawv-euq mae.

¹¹ Aqyawf maf-anr pyeuflar-euq garkawv heudeuq dawqtawvluf hawgeufduq pyeufni, arsaq saq-eu arnan aryamq-euq lafkhoer jawr-eu aqdui yanrnya larni boftaq-euq mae.

¹² Khoermirnae, tsawrhaq tiqghaqnav, ngar zifdanni yawfluf-eu ma laer noeq nar-aq, aqyawf maqya coq-ir ni yanr-eu tsaq taef-a.

¹³ Nawmaf-anr keuvle teurle-awr yadaq-eu murjur jur-eu jeq-aq, tsawrhaqzaq maq daqhaw-euq murjur jur-eu jeq maqngeur-a. Miqyaer sarjax zif-eu mirnae, nawmaf maq daqcoer-eu murjur jur-eu jeq nawmaf-anr maqbi keuvle-a. Murjur jur-eu jeq keuvle ngae, nawmaf daqcoerni buq-ir nya-eu garma shardanr taq-euq mae.

Tanqpanq Aqma Mawrkawr-anr Nae Caevdzeur-awq

¹⁴ Khoermirnae, ngar zawr gaq-eu aqyuif aqnyir deuq-or! Tanqpanq aqma mawrkawr-anr uqduq tanq-eu gar nae caevdzeur-awq.

¹⁵ Ngar, nawmaf-anr tsawrganr anr-eu tsawrhaq mae laer sawx-awr heulof-aer aer-eu ma. Ngar aer-eu tsaq-eu nga laq, maqtsaq-eu nga laq laer, nawmaf yawqha yawqha dartsaev-awq.

¹⁶ Aqdui, Miqyaer-anr jaceuq-eu guiqlanq-euq khmqmaq heu-aq, aqdui, Kali-euq shiq-anr tafluf-eu ma laer aermawf-eu maqngeur-a lor? Aqdui ngawqpyaeq-eu kaqmur-aq, aqdui, Kali-euq mawrdo-anr gawfluf-eu ma laer aermawf-eu maqngeur-a laq?

¹⁷ Aqdui, tsawrhaq ghawqmya ghaq pyeuf-eu khawf, kaqmur tiq siq hawr-eu mawrdo tiq do taef-aer pyeuf-eu ma. Aqjeq mirnae aernar-aq, aqdui yawqghaq navluf kaqmur tiq siq-anr taef-aer taf-eu ma.

¹⁸ Shiqshaq paw-euq Irsaqleqlav tsawrhaq-euq garkawv-anr sharnoeqhaw sher-eq. Lawrnaeq-euq jeq dzaq-eu tsawrhaq-aq, lawrduq-anr taf-eu tsawrhaq maqngeur-a lor?

¹⁹ Tox-aer mar-iq, ngar aqjeq aermawf-eu nga? Tanqpanq aqma mawrkawr hawr-eu tanqpanq aqma mawrkawr-anr lawrnaeq-euq jeq, tiqjeq-iq gardanq maqtsoeq-a laer aermawf-eu maqngeur-a lor?

²⁰ Ngar aermawf-eu-aq, aqcawq tsawrjeuq tsawrca deuq lawrnaeq-euq khoer-aq, Miqyaer-anr lawrnaeq-euq maqngeur-a, naef-anr lawrnaeq-euq mae. Ngar, nawmaf-anr naef naeq-aer cawq maqbi cawqtafmawf nya.

²¹ Nawmaf, Sanqpaq Miqyaer-euq khmqmaq-anr nae dawr-euq nar-aq, naef-euq khmqmaq-anr nae maq dawrnya-a. Nawmaf, Sanqpaq Miqyaer-euq hawqje-anr jawq-euq nar-aq, naef-euq hawqje-anr maqjawq nya-a.

²² Aqdui, Sanqpaq Miqyaer myavnav navni mrnmr lor? Aqdui, aqyawf-euq navmaqtser ghaq khavdzaeq-eu le laq?

Miqyaer-euq Khanqsaer Bi Dovlar-awq

²³ Ngar yawqjeq navluf mrkhmq ma. Aerkhawf, yawqjeq navluf-aer gardanr tsoeq-eu maqngeur-a. Ngar yawqjeq navluf mrkhmq ma. Aerkhawf, yawqjeq navluf-aer bihuiq bi manrlar-eu maqngeur-a.

²⁴ Aqsur ghaq maqkaq tiqghaq-iq, yawqha-euq gharduq muiqni taef-aer taqpov, aqcawq-euq gharduq muiqni pov-awq.

²⁵ Zaqsiq nuisiq-euq gharduq maq narhaq tserni, shaqjir daqanq-eu laev-anr khardaq-eu jeq dzaq-awq.

²⁶ Aqjeq mirnae aernar-aq, “Mirtsaq hawr-eu mirtsaq-euq khoertav kharjawr kharjav-eu yawqjeq navluf, Sanqpaq Miqyaer-euq mae.” (Jc 24:1)

²⁷ Maqjan-eu tsawrhaq tiqghaqnav, nawmaf-anr hawq kurdzaq-awr, nawmaf khawf irmawf nar-aq, zaqsiq nuisiq-euq gharduq maq narhaq tserni, hawqje-anr khar ciqdav taq-euq jeq dzaq-awq.

²⁸ Aerkhawf, tiqghaqnav, nawmaf-anr, “Heu-aq, tanqpanq aqma mawrkawr-anr lawrnaeq-euq mae” laer aernaeqlaf nar-aq, nawmaf-anr aernaeq laf-euq khoerghaq-euq baqda’nae hawr-eu zaqsiq nuisiq-euq baqda’nae taqdzaq. Aqjeq mirnae aernar-aq, “Mirtsaq hawr-euq mirtsaq-euq khoertav kharjawr kharjav-eu yawqjeq navluf Sanqpaq Miqyaer-euq mae.”

²⁹ Ngar, zaqsiq nuisiq laer aer-eu heu-aq, nawq-euq zaqsiq nuisiq-anr aer-eu maqngeur, aqcawq-euq zaqsiq nuisiq-anr aermawf-eu ma. Ngar aqjeq mrnya, maq mrnya-eu heu, aqjeq mirnae aqcawq-euq zaqsiq nuisiq nae yabi dar-eu la?

³⁰ Ngar, Miqyaer-euq guiqlanq-anr jaceuq-awr dzaq nar-aq, ngar, Miqyaer-euq guiqlanq-anr jaceuq-awr dzaq-eu khawf, aqjeq mirnae aqcawq, ngaq-anr dawqdoer ngaeq-eu nga?

³¹ Khoermirnae, nawmaf dzaq-awr dawr-eu maqaer, aqjeq mr-eu maqkaq, yawqjeq navluf-euq lafkhoer Miqyaer-euq yawshaef khanqsaer dovlarni mr-awq.

³² Nawmaf, Yurdav tsawrhaq hawr-eu Heqlaqsar tsawrhaq-anr maqaer, Miqyaer-euq Kalizaq armur-anr maqaer, coeqler deuqler paq-aer taqmr.

³³ Ngar kharmr-eu yawqjeq navluf-euq lafkhoer, tsawrhaq dawqtawvluf nuikhanr shirni mr-eu lof-aer, aqyawfmaf kakhof-eu jeq za’ni, ngar, yawqha-anr muiqlar-eu jeq maqpov-aer, tsawrhaq ghawqmya ni-anr muiqni povluf-eu ma.