1 Gawˇliˬtu 1 - Yawshawr Yaerbof Dawqma Sarjax Yawshuif Jaceuq-eu Hawr-eu Dawqdaq

Dawqcawq Puq-eu Dawq

¹ Miqyaer nuima tsaq-awr, Yeqsur Kali-euq ghaqkhaer bigeuf-eu laer kurtaq-euq, Pawrluv hawr-eu maernmr Surdeq nga’nyaf,

² Gawrliqtu-anr jawr-eu Miqyaer-euq Kalizaq armur-anr sanqbof bofanr lef-eu ma. Yeqsur Kali-euq lafkhoer bi lavshawr-awr, tsawrshawr bigeuf-eu laer kurdov taq-euq aqdui-euq Sanqpaq, Yeqsur Kali-euq tsawrmyanr-anr kharkur-eu aqgeugar jawr-eu tsawrhaq-anr maqkaq, sanqbof heu bofnaeq-eu ma. Kali-aq, aqdui-euq Sanqpaq pyeuf-awr, aqyawf maf-euq Sanqpaq khawf ngeur-eu mae.

³ Aqdui-euq Aqda Miqyaer hawr-eu Sanqpaq Yeqsur Kali-euq guiqlanq yawdzanr hawr-eu, nuisar of-eu jeq nawmaf-euq khoertav jav luf-ur.

Guiqlanq Za-euq Mirnae Miqyaer-anr Jaceuq-awq

⁴ Ngar, nawmaf-euq baqda’nae aqmyanluf ngaq-euq Miqyaer-anr jaceuq luf-eu ma. Aqjeq mirnae aernar-aq, Yeqsur Kali-euq baqda’nae nawmaf, Miqyaer-euq guiqlanq yawdzanr za-euq mae.

⁵ Nawmaf, aqyawf-euq lafkhoer yawqjeq navluf javlar-awr sanrlar-euq mae. Dawq kharngaeq-eu bymlar-awr, siqnya-eu tsawrganr yawqjeq navluf khawf sanrlar-euq mae.

⁶ Kali-euq garkawv sarkir kamq-eu lof-aer tsaq ngar-a laer, nawmaf-euq lafkhoer byanlar luf-eu gar aqcawq ya’mawr-euq mae.

⁷ Khoermirnae, aqdui-euq Sanqpaq Yeqsur Kali ghofle-eu gar nuima keuv-awr dawqluf ngae, nawmaf-euq lafkhoer lafsawq tiqjeq-iq maqteq-a.

⁸ Aqdui-euq Sanqpaq Yeqsur Kali-euq arnan ngae nan, nawmaf-anr aerkhar maqbi za’ni, arsaqsaq ngae keuvni aqyawf, nawmaf-anr bizif naeqlaf taef-a.

⁹ Miqyaer-aq, sarjax zif-eu mae. Aqyawf-euq Zaqyo pyeuf-eu aqdui-euq Sanqpaq Yeqsur Kali naeq-aer, cawq bicawq-eu laer aqyawf, nawmaf-anr kur-euq mae.

Kalizaq Armur Birpav-eu-aq, Iqbax Mae

¹⁰ Aqyuif aqnyir deuq-or! Ngar, aqdui-euq Sanqpaq Yeqsur Kali-euq tsawrmyanr-euq uqmov nawmaf-anr heulof-aer shar-eu ma. Nawmaf dawqtawvluf tsaqler dzoerler-eu dawq ngaeq-awr, nawmaf-euq yawkaq armaf taq birpav. Nawmaf yawmuiq-aer gawfler gmler nya’ni, nuima tiqsiq taef-aer taq-awr nuinoeq tiqgar taef-aer tsaq-awq.

¹¹ Ngaq-euq aqyuif aqnyir deuq-or! Nawmaf iqdaeq iqcae dovluf-eu mae laer Kaqlawriv nymrkhanq-euq lafkhoer jawr-eu tsawrhaq, ngaq-anr dzawrnaeq laf-euq mae.

¹² Ngar aermawf-eu-aq, nawmaf-euq yawkaq heulof-aer aerluf-eu mae, “Ngar-aq, Pawrluv-euq tsawrhaq ma.” “Ngar-aq, Aqpawrluv-euq tsawrhaq ma.” “Ngar-aq, Geqpar-euq tsawrhaq ma.” “Ngar-aq, Kali-euq tsawrhaq ma.”

¹³ Kali-anr birpav nya-eu la laq? Pawrluv, nawmaf-euq gharduq lafyaq-anr bi taftaeq-euq la lor? Maqngeur nar-aq, nawmaf, Pawrluv-euq tsawrmyanr-euq uqmov bartirsaq hageuf-euq le laq?

¹⁴ Ngar, Gaqlirpuv hawr-eu Gaqyur-anr maqngeur nar-aq, nawmaf-euq lafkhoer tiqghaq-anr-iq bartirsaq maq mrnaeq-euq mirnae, Miqyaer-euq guiqlanq-anr jaceuq ma.

¹⁵ Khoermirnae, nawmaf, ngaq-euq tsawrmyanr-euq uqmov bartirsaq hageuf-euq ma laer tiqghaq-iq maqaer nya-a.

¹⁶ Ngar, Saqteqpaq paeqzaq-anr khawf bartirsaq mrnaeq-euq ma. Khoerdeuq-anr maqngeur nar-aq, nuideuq-anr bartirsaq mrnaeq-euq laer ngar maq noeqnya.

¹⁷ Kali, ngaq-anr Bartirsaq mrnaeq-ir laer khaer-euq maqngeur-a. Guiqlanqdawq maeq-ir laer khaernaeq laf-euq mae. Ngar guiqlanqdawq maeq ngae, Kali lafyaq-anr shirdan-euq khoer yawqngaef maqya pyeuf-ir ni, ngar, mirtsaq-anr taf-eu zaqsiq tsawrganr deuq-anr maqghoeni maeq-eu ma.

Kali-aq, Miqyaer-euq Baoq Hawr-eu Zaqsiq Tsawrganr Mae

¹⁸ Aqjeq mirnae aernar-aq, lafyaq-euq garkawv-aq, cawv-ir luf-eu tsawrhaq-euq gharduq-aq, zaqsiq tsawrganr maqanr-eu dawq pyeuf-eu mae. Aerkhawf, kakhof-eu jeq zaluf-eu aqdui-euq gharduq-aq, Miqyaer-euq baoq pyeuf-eu mae.

¹⁹ Aqjeq mirnae aernar-aq, Yaerbof heulof-aer boftaq-euq mae, “Ngar, tsawrganr anr-eu deuq-euq zaqsiq tsawrganr-anr lavcawv-awr, Siqzaq-euq ghovshaw nya-eu jeq-anr yawqngaef-aer bipyeuf-ir ma.” (Isy 29:14)

²⁰ Tsawrganr anr-eu tsawrhaq aqgeugar jawr-eu la? Zanr maeq-eu tsawrhaq aqgeugar jawr-eu la? Heuzir-euq lafkhoer ghawqmya jeq siqnya-awr pyaermawf-eu tsawrhaq aqgeugar jawr-eu la? Miqyaer, mirtsaq-euq zaqsiq tsawrganr-anr, gardanr maqtsoeq-eu jeq bipyeuf-ir-euq maqngeur-a lor?

²¹ Miqyaer, aqyawf-euq zaqsiq tsawrganr-euq lafkhoer noeqtsaev taq-euq lof-aer nar-aq, mirtsaqzaq, yawqha-euq zaqsiq tsawrganr-anr ghoe-awr nae Miqyaer-anr siqnya larni maqngeur-a. Zaqsiq tsawrganq maqanr-eu gar dur-eu, guiqlanqdawq maeq-eu gar jan-eu tsawrhaq deuq-anr kakhof-eu Miqyaer nuikhanr shir-eu mae.

²² Aqjeq mirnae aernar-aq, Yurdav tsawrhaq-aq, bisiq bimawr-eu jeq mawrmawf-awr, Heqlaqsar tsawrhaq-aq, zaqsiq tsawrganr-anr sharpov-eu mae.

²³ Aerkhawf, aqdui, Kali lafyaq-anr bi tafsaef-euq garkawv dawqmaeq maeq-eu ma. Garkawv heu-aq, Yurdav tsawrhaq-euq gharduq sanqtif tif-eu jeq pyeuf-awr, Heqlaqsar tsawrhaq-euq gharduq zaqsiq tsawrganr maqanr-eu jeq pyeuf-eu mae.

²⁴ Aerkhawf, Miqyaer nae kharkur taq-euq tsawrhaq-euq gharduq-aq, Yurdav tsawrhaq hawr-eu Heqlaqsar tsawrhaq-euq gharduq khawf, Kali-aq, Miqyaer-euq baoq hawr-eu Miqyaer-euq zaqsiq tsawrganr pyeuf-eu mae.

²⁵ Aqjeq mirnae aernar-aq, Miqyaer-euq zaqsiq tsawrganr yaw’aw-aq, tsawrhaqzaq-euq zaqsiq tsawrganr navmaqtser gordzaeq-awr, Miqyaer-euq ghaq baq-eu jeq-aq, tsawrhaqzaq-euq ghaq khav-eu navmaqtser khavdzaeq-eu mae.

²⁶ Aqyuif aqnyir deuq-or! Miqyaer, nawmaf-anr kur-euq gar sharnoeqhaw sher-eq. Shiqshaq paw sharsawx nar-aq, nawmaf-euq lafkhoer zaqsiq tsawrganr anr-eu tsawrhaq maqmyaq-a, ghaq khav-eu tsawrhaq maqmyaq-a, tsawrhuiq tsawrma khawf maqmyaq-a.

²⁷ Aerkhawf, Miqyaer, zaqsiq tsawrganr anr-eu deuq bi shafdawr-ir-eu laer, mirtsaqzaq nae zaqsiq tsawrganr maqanr-a laer sawxtaq-euq deuq-anr tserdov-euq mae. Miqyaer, ghaq khav-eu deuq bi shafdawr-ir-eu laer ghaq baq-eu tsawrhaq mae laer mirtsaqzaq nae sawxtaq-euq deuq-anr tserdov-euq mae.

²⁸ Miqyaer jav-eu deuq-anr lavbyov-eu laer, mirtsaqzaq nae taqteq-awr nodzae taq-euq deuq, tiqjeq-iq maqjav-a laer sawxtaq-euq deuq-anr tserdov-euq mae.

²⁹ Khoermirnae, Miqyaer-euq maeqshi tsawrhaq tiqghaq-iq khanqsaer jaevkhar maqza-a.

³⁰ Aerkhawf, Miqyaer-euq baqda’nae nawmaf, Yeqsur Kali-euq lafkhoer ya jawrlar-euq mae. Kali-aq, aqdui-euq gharduq Miqyaer-euq zaqsiq tsawrganr, tsaq-awr dawr-eu jeq, lavshawr-eu jeq hawr-eu kakhof-eu jeq pyeuflar-euq mae.

³¹ Yaerbof-euq lafkhoer heulof-aer boftaq-euq mae, “Khanqsaer jaevmawf-eu tsawrhaq-aq, Sanqpaq Miqyaer-euq lafkhoer khanqsaer jaev-awq.” (Ylm 9:24)