Yoannes 3 - Ashiri Aeuitaknup Iyohaichish Yona 1897

3 Ik.

¹ Nikodemos ani aye Parisee un guru an, Yudea un utara esapane guru ne ruwe ne:

² shinuma anchikara ta Yesu orota ek wa ene itak-hi :— Rabbi, Kamui orowa no ek epakashnu guru E ne ruwe ne sekoro chi eraman: inambe gusu ne yakun, Kamui ainu tura no an shomoki chiki, E ki tan okai shirosh kara eaikap ruwe ne gusu ne na.

³ Orota Yesu ese wa ene itak-hi :— Son no, son no e otta Ku ye, ainu anak ne ashin no hekatu shomoki chiki Kamui moshiri nukara eaikap ruwe ne, ari itak.

⁴ Nikodemos Shinuma orota ene itak-hi :— Ainu onne ko nekon a iki wa hekatu eashkai ya? Tu shui koro habo honihi oshike un ahun wa hekatu eashkai ya? sekoro itak.

⁵ Yesu ene ese-hi :— Son no, son no e otta Ku ye, Ainu anak ne wakka newa Ramat ani hekatu shomoki chiki Kamui moshiri orun ahun eaikap ruwe ne.

⁶ Kam gusu hekatup anak ne kam ne, Ramat gusu hekatup anak ne ramat ne ruwe ne.

⁷ Echi ashin no hekatu kusu ne ap e otta Ku ye gusu iteki enushkari.

⁸ Rera anak ne rengaine rui wa nei hum e nu, koroka, nei wa ek a, ine un oman a eani erampeutek: nen ne yakka Ramat gusu hekatu gurʼanak ne nei no korachi an ruwe ne, sekoro itak.

⁹ Orota Nikodemos ese wa ene itak-hi :— Tapne ambe nekon a hetukup eashkaibe ne ya? sekoro itak.

¹⁰ Orota Yesu ese wa ene itak-hi :— Aokai Israeru utara koro nei epakashnu guru e ne wa tapne ambe e erampeutek a?

¹¹ Son no, son no e otta Ku ye, chi utara anak ne aeramu ambe ye, orowa, yaikota nukarape gusu paweteshu ki ruwe ne, yakka, chi ye paweteshu-i echi nu shomoki ruwe ne.

¹² Kuani tam moshiri gusu an orushpe echi nure ash wa echi eishokoro shomoki yak anak ne, Kamui moshiri gusu an orushpe echi nure ash chiki nekon a echi ki wa nei ambe eishokoro ya?

¹³ Kando orowa no ran wa kando otta an Ainu Poho moshima, kando orun rikin guru isam.

¹⁴ Orowa, Mose anak ne nup otta okokko ashi korachi, tap korachi Ainu Poho ne yakka aashi kusu ne;

¹⁵ nen ne yakka Shinuma eishokoro gurʼanak ne ramma okere shomoki ishu ramat koro kuni gusu ne na.

¹⁶ Inambe gusu ne yakun, Kamui anak ne koro Shinen ne Poho koropare pakno moshiri omap ruwe ne, nen ne yakka nei Poho eishokoro guru obitta aisamka shomoki no nei pakno ne yakka ishu ramat koro kuni ne kore nisa ruwe ne.

¹⁷ Moshiri koipishi gusu Kamui anak ne koro Poho moshirʼotta omande shomoki, koroka, Shinuma orowa no moshiri kashi-a-obiuki kuni ne aomande nisa ruwe ne gusu ne na.

¹⁸ Shinuma eishokoro guru anak ne shomo akoipishi ruwe ne, shomo Shinuma eishokoro guru anak akoipishi okere nisa ruwe ne, Kamui shinen ne Poho reihei eishokoro shomoki nisa ruwe ne gusu ne na.

¹⁹ Ipishi aesanniyo-i anak ne tapne an ruwe ne; pekere moshirʼotta ek, orowa, utara ki ikip anak ne wen wa gusu pekere kasu no kunne-i omap nisa ruwe ne gusu ne na.

²⁰ Inambe gusu ne yakun, nen ne yakka wenbe iki guru anak ne pekere etunne ruwe ne, orowa, iteki koro ki ikip aekopao kuni ne pekere otta ek shomoki ruwe ne.

²¹ Koroka, sonep ki guru anak ne koro ki ikip anukara kuni ne pekere otta ek, nei ambe anak ne Kamui otta aki nisa ruwe ne gusu ne na.

²² Tap orowa no Yesu koro koikara utara tura Yudea moshirʼotta ek wa, shinuma utara tura no okai, orowa, baptisma kore nisa ruwe ne.

²³ Orowa, Enon kotan samaketa an Sarim kotan ta wakka poron no an gusu, Yoannes ne yakka nei kotan ta baptisma kore korʼan ruwe ne: awa, utara araki wa baptisma akore nisa ruwe ne.

²⁴ Inambe gusu ne yakun, Yoannes naa shomo upakashnu chisei ta aahunge ruwe ne,

²⁵ Orowa, Yoannes koikara utara anak ne ashkannere buri gusu shine Yudea un guru tura upahunara ruwe ne.

²⁶ Aige, nei utara Yoannes orota araki wa ene itak-hi :— Rabbi, gusu aokai paweteshu Yorodan pet kushta an guru anak ne baptisma kore korʼan wa utara obitta Shinuma otta paye ruwe ne, ari itak.

²⁷ Yoannes ese wa ene itak-hi :— Kando orowa no akore shomoki chiki, ainu nep ne yakka koro eaikap ruwe ne.

²⁸ Kuani anak ne Kiristo shomo ne wa Shinuma ratchaot aomande guru ku ne ruwe ne ani an itak ani ku ye ambe aokai yaikota paweteshu ki ruwe ne.

²⁹ Tane machi ne kusu ne shiwentep koro ainu auak mat-ahupkara guru ne; koroka mat-ahupkara guru koro ikatairotke utara okai wa nei mat-ahupkara guru hawe nu gusu shi no yaikopuntek ruwe ne: tambe gusu, ku yaikopuntek ambe anak ne auweomare no an ruwe ne.

³⁰ Shinuma anak ne aeporore kusu ne, kuani anak aeponde kusu ne ruwe ne.

³¹ Rik orowa no ran guru anak ne utara obitta enkashiketa an: toi orowa no ek gurʼanak ne toi orowa no an gunʼne, orowa toi orushpe ye ruwe ne: kando orowa no ek guru anak ne utara obitta enkashiketa an ruwe ne.

³² Shinuma anak ne nu ambe gusu, nukarape gusu paweteshu ki; orowa, nen ne yakka nei ki paweteshu ambe nu shomoki ruwe ne.

³³ Nei paweteshu ambe nu guru anak ne Kamui anak sonep ne ani an ambe otta koro han omare nisa ruwe ne.

³⁴ Inambe gusu ne yakun, Kamui orowa no aomande gurʼanak ne Kamui itak ye: Shinuma anak pakari wa Ramat kore shomoki ruwe ne gusu ne na.

³⁵ Michi anak ne Poho omap wa nep ne yakka obitta koro teke orota omare nisa ruwe ne.

³⁶ Poho eishokoro gurʼanak ne ramma okere shomoki inotu kon ruwe ne; koroka, Poho eishokoro shomoki gurʼanak ne inotu nukara shomoki, Kamui kinrakarape shinuma kashiketa an wa an ruwe ne na.