Yakob 3 - Ashiri Aeuitaknup Iyohaichish Yona 1897

3 Ik.

¹ Ku iriwak utara, chi utara anak ne naa yupke no aesanniyo wa akoipishi kusu ne sekorʼambe eraman wa inne no echi utara anak ne iteki epakashnu utara ne yan.

² Inambe gusu ne yakun, inne no okaibe gusu chi utara obitta ureepetchiu ruwe ne gusu ne na. Itak gusu ureepetchiu shomoki guru an chiki, shinuma anak aeramushinne ainu ne, kon netobake ne yakka ebitta shikkashima eashkaibe ne.

³ Shui, chikon rusuibe akire kuni ne, umma paroho otta kuchiwa omare yakun, koro tumama ne yakka ebitta henoyere ruwe ne.

⁴ Chip ne yakka ingara yan, nei ambe anak ne ene poro shiriki, aine, yupke rera ani apashte yakka, kanchi koro guru rengaine nei shiri pon kanchi gusu henoyere eashkai ruwe ne.

⁵ Tap korachi parumbe anak ne ponbe ne a koroka porobe gusu yaiomonnure shiriki. Ingara gusu, nep poro nitai pon abe anak uhuye ruwe!

⁶ Orowa, parumbe anak ne abe ne: netobake ebitta turusakte chikoro tumam awehe tumta an oupeka sak moshiri ne, Gehenna gusu aare wa moshirʼebitta uhuyeka ruwe ne.

⁷ Inambe gusu ne yakun, nep chikoikip hene, chikap hene, reye ambe hene, rep un okaibe hene, aratchitara shiomaparare an, Ainu orowa no aratchitara shiomaparare nisa ruwe ne:

⁸ koroka, parumbe ratchitara shiomaparare guru isam; nei ambe anak ne shinire hokamba wenbe ne, rai oma surugu ne ruwe ne na.

⁹ Nei ambe ani chi utara anak ne Utarapa newa Michi ne Kamui ramye ruwe ne; shui, nei ambe ani Kamui katuhu nepkoro korachi akara ainu iyoitakushi ki ruwe ne;

¹⁰ shine paro wano ramye ambe newa iyoitakushi ambe san ruwe ne. Ku iriwak utara tap ambe anak ene okaibe an kunip shomo ne ruwe tapan na.

¹¹ Shine pui orowa no pituru wakka newa shiunin wakka tup ne kane asangere eashkaibe ne ruwe he an?

¹² Ku iriwak utara, ichijiku chikuni anak ne kanran nikaop hetukure eashkai ya? Shui, hat pungara anak ne ichijiku nikaop hetukure eashkai ya? tap korachi, runnu wakka anak ne pituru wakka sangere eaikap ruwe ne na.

¹³ Echi tumta wayashnu wa eramush guru nen ne ruwe? Nei guru ishu wa pirika buri koro hine ramurotcha an wayashnu ikip nukare yan.

¹⁴ Koroka, keutum ta ikoitupa shiuninbe newa sakayo kane echi koro chiki, iteki yaiomonnure, iteki sonep gusu shunge ki yan.

¹⁵ Tapne an wayashnu-i anak ne rik orowa no ran ap shomo ne, koroka, moshiri umbe ne, rengaine an keutum umbe ne, nitne kamui umbe ne ruwe ne.

¹⁶ Inambe gusu ne yakun, ikoitupa ambe newa sakayo an ita anak ne, nei ushiketa eramu-hokasusu ambe

¹⁷ newa obitta no okai wen-buri an gusu ne na. Koroka, rik orowa no an wayashnu-i anak ne hoshiki no turusakbe ne, orowa, itomo irenga korobe ne, rotcha ne, yairotchare kasush ne ambe ne, rampoken newa pirika ikip ani aeshik, utomotne shomoki, kankapkapeka shomoki ruwe ne.

¹⁸ Orowa, oupeka gusu an ibehe anak ne itomo an no itomo irenga sange utara ani aetoita ruwe ne na.