Yakob 1 - Ashiri Aeuitaknup Iyohaichish Yona 1897

1 Ik.

¹ Kamui newa Utarapa ne Yesu Kiristo koro usshiune guru Yakob ku ne anak ne chiusachari wa okai tu ikashima wan ainu sanikiri un uirup otta irangarap ku ki na.

² Ku iriwak utara, echi koro eishokor-i auwande ambe anak yaiyupupu ambe hetukure ruwe ne sekoro eraman wa,

³ chi utara usa okai akoramnukar-i koekari chiki aenupetne gusu an ambe ne sekoro esanniyo yan.

⁴ Orowa, echi utara aeramushinne newa ranme no okai wa nep ne yakka otta shomo eikohaye kuni gusu yaiyupupu ambe ara monraigere yan.

⁵ Koroka, echi utara tumugeta wayashnu-i gusu eikohaye guru an chiki, nuye an no obitta no okai utara otta koropare hine kosakayokara shomoki Kamui otta koramkoro yan; yakun akoropare kusu ne na.

⁶ Koroka, eishokor-i wa utumashi shomoki no koramkoro yan; inambe gusu ne yakun, yaiutumashire guru anak ne rera ani apata wa akaikaire an atui riri korachi ne ruwe ne.

⁷ Nei no an guru anak ne Utarapa orowa no nep ka akore kusu ne na sekoro iteki yainu yan;

⁸ tu keutum o guru ne, nep ne yakka gusu maunmaun ruwe ne gusu ne na.

⁹ Koroka, eraratki an iriwak anak ne arikande gusu nupetne yan;

¹⁰ orowa no, oteknu guru aeraratki gusu nupetne yan; mun epuige korachi isam kusu ne gusu ne na.

¹¹ Shirishumpa rera utura chup hetuku chiki, nei mun shumumgere ruwe ne; orowa, epuige rapapse hine nei hetuku aekiroro an-i aisamka ruwe ne: tap korachi ka ikoro koro guru anak ne koro apkash ru otta isam kusu ne na.

¹² Koramnukara wa yaishiporore gurʼanak ne anunuke ne: Shinuma auwande aokere chiki, Utarapa omap utara otta akoropare kuni aitakamkire wa an inotu oma sapaumbe akore kusu ne gusu ne na.

¹³ Nen ne yakka akoramnukara ita, kuani anak Kamui orowa no a en koramnukara an iteki ye yan: inambe gusu ne yakun, Kamui anak ne wenbe gusu akoramnukara eaikapbe ne, shui, Shinuma yaikota shomo ainu koramnukara ruwe ne:

¹⁴ koroka, ainu pishno yaikota koro iki rusui keutum gusu apashte wa shiren chiki akoramnukan ruwe ne.

¹⁵ Orowa, yai-keutum iki rusuibe yairat chiki, katpak o: orowa, katpak anak shukup chiki; rai-arabe hetukure ruwe ne.

¹⁶ Aomap an ku iriwak utara iteki akokandama wa okai yan.

¹⁷ Obitta no okai pirika aikrap, obitta no okai aeramushinne an aikorep anak ne, rik orowa no an ap ne, yaiutasare shomoki, hosari gusu kurihi kara shomoki pekere koro Michi orowa no sap ruwe ne.

¹⁸ Shinuma yaikota irenga gusu chi utara anak ne Shinuma kara okaibe otta aro-ibehe ne kuni ne, son no an itak ani un hetukure nisa ruwe ne na.

¹⁹ Ku omap an iriwak utara, onnere yan. Koroka, pishno an guru anak ne nu gusu chashnu, itak gusu moire,

²⁰ irushka gusu moire yanro; inambe gusu ne yakun, ainu ki irushka ambe anak ne Kamui oupekap shomo kan ruwe ne.

²¹ Tambe gusu, obitta no okai turu-ushbe newa wenbe eikaunu kashpap ande wa echi kon ramat kashichiobiuki eashkai onnaige un hekatu wa an itak ramu-rotcha wa uina yau.

²² Koroka, echi utara anak ne nei itak ki, iteki ouse nei ambe nu wa echi yaikota yaikokandama yan.

²³ Inambe gusu ne yakun, inan guru ne yakka nei itak nu wa shomo nei ambe ki chiki, yaikunnukarabe otta ahetuku an koro nanuhu esanniyo guru koheraye ruwe ne:

²⁴ shinuma yainukara orowa oman wa nekon a anukarabe ainu ne ya ari an ambe oira ruwe ne gusu ne na.

²⁵ Koroka, aeramushinne an, rengaine an nrondum oma tuitak otta hotku wa ingara wa okai gurʼanak ne, shinuma oira no an nu guru shomo ne, koroka, ikip ki guru ne wa gusu, tan guru anak ne iki wa akoingara kusu ne na.

²⁶ Inan guru ne yakka, Kamui otta yaishieiwangere guru ne sekoro yaiyainu wa, koro parumbe shikkashima shomoki no, kon ramat kokandama chiki, nei guru ki yaishieiwangere ambe anak ne raka isambe ne ruwe ne.

²⁷ Chikoro Kamui newa Michihi tek-samata an turu-sak newa shomo echi yaishieiwangere-hi anak ne, tambe ne ruwe ne, — Aeramchuptek wa okai eshikop sak utara newa shiyompiyara shiwentep utara hotanukara, samata, iteki moshiri ani yaiturukotachi kuni ne yaishikkashima ambe ne ruwe ne.