Titus 2 - Ashiri Aeuitaknup Iyohaichish Yona 1897

2 Ik.

¹ Koroka, eani anak ne nei nisashnu an epakashi kopakeatbe ye yau:

² onne utara yairamatte, yaikatanu keutum yaieashirikara, eishokor-i gusu nisashnu, omap ki,

³ yaiyupupu no okai kuni kara yan: orowa, huchi utara ne yakka oripak an katu koro, ohaigekara shomoki, tonoto gusu yaiusshiunere shomoki, pirika orushpe epakashnu kuni kara yan;

⁴ upen shiwentep anak ne aeyaieashirikara hine koro hoku koomap,

⁵ koro poho utara koomap kuni ne kara yan, shui, keutum yaieashirikara, turu-sak, koro uni ta monraige, ramu-hauge, Kamui itak iteki akoatcha kuni ne yaikota koro hoku koitaknu kuni kara yan:

⁶ upen ainu ne yakka keutum yaieashirikara kuni kara yan:

⁷ nep ne yakka gusu eani anak ne pirika ikip epeka yaikota y aekoikarabe ne yai kara yan; epakashi gusu oheuge sak,

⁸ yaikatanu, pakekoshne eaikap nisashnu itak sange yan; tambe anak un epeka shomoki utara, un gusu sange wen itak isam no, yainikoroshma kuni gusu nep ne na.

⁹ Ausshiune okai utara anak ne yaikota kon nishpa koitaknu hine nep ne yakka gusu nupetnere kuni ne kara yan; iteki tasa itak ki; iteki eameokte,

¹⁰ koroka, ikipniukesh no okai; tambe anak ne nei utara nep ne yakka gusu chikoro un kashiobiuki Kamui koro epakashi tomtere kuni ne iki ambe ne ruwe ne.

¹¹ Inambe gusu ne yakun, Kamui irenga hetuku an wa obitta no okai utara eun kashichiobiuki ambe kore ruwe ne,

¹² aige, shomo Kamui kooripakbe newa kanna moshiri gusu an wenbe kon rusui keutum newa emaka wa keutum yaieashirikara hine, oupeka no, Kamui kooripak an no tam moshiri koapkash kuni gusu un epakashnu ruwe ne;

¹³ orowa, nei a shinnunuke an aechipachipa ambe newa chikoro pase Kamui newa un kashiobiukip ne Yesu Kiristo koro arakuru hetuku ambe ehuye ash ruwe ne;

¹⁴ Shinuma anak ne obitta no okai ikashpaotte otereke ambe orowa no un kikiraye hemhem ki, pirika ikip shiarikiki no iki yaikota korope ne gusu utara turu-sakte hemhem ki kuni ne yaiyange nisa ruwe ne na.

¹⁵ Ikashpaotte an korachi tap okaibe ye hemhem ki, onishnishi hemhem ki, pakashnu hemhem ki yan. Inan guru ne yakka iteki e pange kuni ne ki yan.