Roma 4 - Ashiri Aeuitaknup Iyohaichish Yona 1897

4 Ik.

¹ Yakun, kam gusu chikoro ekashi Abraham anak ne nekon a ambe pa nisa ruwe ne sekoro chi ye ya?

² Inambe gusu ne yakun, Abraham anak ne ki ikip gusu aoupekare yak anak ne yaiyomonnure kuni ushike an; a yakka, Kamui tek-samata isam ruwe ne.

³ Nei Kamui kambi hemanda ye ya? Orowa Abraham anak ne Kamui eishokoro, aige, tambe anak shinuma gusu oupeka ambe ne sekoro aesanniyo nisa ruwe ne.

⁴ Monraige ki guru gusu an iwayehe anak ne irenga nei no an ambe ne sekoro shomo aesanniyo ruwe ne, koroka ashoserep korachi aesanniyop ne.

⁵ Koroka, shomo ikip ki koroka, Kamui kooripak shomoki utara oupekare Kamui eishokoro guru gusu, shinuma koro eishokor-i anak oupeka ambe ne sekoro aesanniyo ruwe ne.

⁶ Aki ikip oyapi an wa oupeka ne sekoro Kamui orowa no aesanniyo ainu gusu Dabid poka nunuke ambe ye korachi ne; ene ani ne :—

⁷ Ikashpaotte otereke ambe atusare, Koro katpak akamure wa an gurʼanak ne anunuke ne ruwe ne.

⁸ Otta Utarapa katpak shomo kashiomare guru anak ne anunuke ne.

⁹ Tan nunuke ambe anak ne okarituye-buri akire guru otta patek san ruwe? shui, okarituye-buri shomo akire guru otta ne yakka san ruwe he an? Inambe gusu ne yakun, ene chi ye-hi :— Abraham koro eishokor-i anak ne shinuma gusu oupeka ambe kuni aesanniyo sekoro chi ye.

¹⁰ Yakun, hemanda nei no aesanniyo ya? Okarituye-buri akire etokota hene ne ya? akire okaketa hene ne ya? Okarituye-buri akire okaketa shomo ne, akire etokota nei no aesanniyo ruwe ne;

¹¹ orowa, shinuma anak ne okarituye-buri an shirosh koro, nei ambe anak ne shinuma naa shomo okarituye-buri akire etokota okai koro eishokor-i gusu an oupeka ne kuni han aomarep ne ruwe ne: tambe anak shinuma obitta no okai eishokoro utara koro michi ne kuni gusu an ambe ne; shui, nei utara okarituye-buri akire shomoki yakka, otta oupeka ambe aesanniyo kuni gusu an ambe ne ruwe ne;

¹² orowa shui, ouse okarituye-buri akire utara koro michi ne kuni gusu shomo ne, koroka, akoro michi Abraham naa shomo okarituye-buri akire etokota eishokoro ki korachi, obitta no okai eishokoro ki utara koro michi ne kuni gusu an ambe ne ruwe ne na.

¹³ Inambe gusu ne yakun, Abraham moshiri eikeshkoro kuni ari an eitakamkire ambe anak, Abraham otta hene, koro sanikehe otta hene tuitak an gusu aki shomo ne, koroka, eishokor-i gusu an oupeka ambe an gusu aki ruwe ne na.

¹⁴ Inambe gusu ne yakun, tuitak choropoketa okai utara anak ne eikeshkoro utara ne chiki, eishokor-i anak ohap ne akara, samata, eitakamkire ambe raka asakte ruwe ne na.

¹⁵ Inambe gusu ne yakun, tuitak anak ne irushka ambe iki; koroka, tuitak isam ushiketa ohaita

¹⁶ buri ne yakka isam ruwe ne. Tambe gusu irenga nei no an wa eishokor-i gusu an ambe ne; nei ambe anak ne eitakamkirep obitta no okai santek otta an kuni gusu an ambe ne; ouse nei tuitak otta kotuk santek gusu patek ne ambe shomo ne, koroka, Abraham koro eishokor-i otta kotuk santek gusu ne yakka an ambe ne ruwe ne: Shinuma anak ne otta ko-eishokoro guru kotchaketa,

¹⁷ Kamui samaketa obitta no okai chi utara koro michi ne ruwe ne (ene chieshinnuye wa an korachi ne :— Inne moshiri uirup koro michi e ne kuni Kuani e kara ash nisa ruwe ne na); nei Kamui anak ne rai-guru shiknure, orowa okai korachi isambe hotuyekan ruwe ne.

¹⁸ E koro santek ene ani ne kusu ne na — sekorʼan aye-hi korachi, inne moshiri uirup koro michi ne akara kuni ne, chipachipa gusu chipachipa ki nisa ruwe ne.

¹⁹ Orowa, eishokor-i shomo atumsakte wa tane rai korachi an kon netobake (shinuma tane ine hotne pa pakno pa poro ehange ruwe ne) samata, Sara koro rai okere honihi esanniyo nisa:

²⁰ ruwe newa, Kamui eitakamkirep orun ingara wa eishokor-i sak no an wa utumashire shomoki no an nisa ruwe ne, koroka eishokor-i ani yaitumashnure nisa ruwe ne;

²¹ aige, Kamui anak ne ki eitakamkire ambe nei no kara eashkai kuni aeramushinne no oshitchiu wa eishokoro hine Shinuma pasere nisa ruwe ne.

²² Tambe gusu nei ambe anak ne Shinuma gusu oupeka ambe ne sekoro aesanniyo nisa ruwe ne na.

²³ Nei ambe anak ne Shinuma gusu oupeka ambe ne sekoro aesanniyo nisa ruwe ne — ari an itak anak ne shinuma gusu patek shomo chieshinnuye ruwe ne,

²⁴ koroka, gusu aesanniyo kusu ne chi utara chikoro Utarapa ne Yesu rai orowa no hetopo-shiknure Kamui eishokoro wa okai chi utara gusu ne yakka nei ambe chieshinnuye wa an na;

²⁵ Shinuma anak ne chikoro katpak gusu aekoshi, orowa, a un oupekare gusu hetopo-ashiknure nisa ruwe ne na.